Lungz Byauh ngauz gyaeuj Siu Cuh, aeu genbuh bae uet gij hanh caeuq raemxda gwnz naj de, linj- byubyu hemq.

Siu Cuh menhmenh byaengq da, danq le gaemz heiq ndeu, song fwngz baez sou, gaenjgaenj got hoz Lungz Byauh, fajnaj ngaem youq ndaw rungj Lungz Byauh, daejfwtfwt hwnjdaeuj.

“Ah Byauh, mwngz aiq dai luba?”

“Yaek dai, lauheiq caeux dai lo.”

“Wnggai dwg gou dai, Ah Byauh, duz ngwz haenx bonjlaiz yaek haeb gou, hoeng mwngz……”

“Dou byawz hix mbouj wnggai dai, Siu Cuh, mwngz gouq diuz mingh gou lo!”

“Mbouj! Dwg mwngz gouq diuz mingh gou.”

“Yienghneix gangj mbouj deng, mbouj miz mwngz, mwhneix gou gaenq dai lo.”

“Mbouj miz mwngz, gou lij ndaej lix? Mwngz dwg vih gou deng haep.”

Raemxda Siu Cuh youh laeleklek lo, de dauqngeix haxbaenh deng duz ngwzndaem gyaep, nyaenx mbouj ndaej daengx ndang saenzdwddwd, ngiengxgyaeuj hwnjdaeuj aeu fwngz bae lumh gahengh Lungz Byauh, gij baksieng gaenq gawhngoetngoet lo.

“In lwi?”

“Lij ndei.” De rag fwngz Siu Cuh, gig gamjgik cim de.

“Aeu mbouj aeu caiq sup baez he?”

“Gaej, mwngz gaenq caenhrengz lo!”

“Cijaeu mwngz ndaej lix, gou lij goq maz dem?”

“Mwngz——caen simndei, gou wnggai baenzlawz gangj?”

“Gaej gangj vah, gou rox sim’eiq mwngz……”

“Gou hix rox……”

Songde doxing doxumj, lumz le gij nditndat dak, lumz le gij baksieng in, lumz le gij dwglau haxbaenh, hix lumz le lij youq gwnz bya.

Ngoenzhaenx, dwg ngoenz ndeu songde ciuhvunz cungj mbouj ndaej lumz, miz lwed miz raemxda, miz yungyiemj hix miz cingzeiq, song aen sim youh ndat youh cingh gaenq hab baenz aen ndeu lo.

(caengz sat)