Ngoenzhaenx, songde boux gonq boux laeng bae daengz ndaw reih haeuxyangz, gwnzmbwn fwjndaem mbwn bumzsubsub, yawj daeuj yaek aeu doek fwn lo, hoeng gyoengqde ndai reih buenq ngoenz, mbwn lij ciuqyiengh laepsubsub. Ginh Ginh roxnyinh fwngz miz di inmanh lo, heuh Vwnz Linz yietnaiq yaep ndeu. Vwnz Linz mbehai geu buh demh youq gwnznamh, song boux itheij naengh roengzdaeuj.

Ginh Ginh youq henz ndang Vwnz Linz, de sijsaeq ndaejnyi Vwnz Linz diemheiq, aen damj Ginh Ginh hix bienq hung lo. De gotdawz Vwnz Linz haeuj ndaw rungj swhgeij daeuj, youq gwnz faj naj de luenh cup, Vwnz Linz hix mbouj euq, ing youq ndaw rungj Ginh Ginh……

Daj Ginh Ginh dang hwnj cunh cujyin le, de gietdingh hai diuz goengloh daj Mbanjdiendangz doeng ok rog bae. Aen ci daih’it haeuj mbanj seiz, vunzmbanj bouxboux sim’angq. Vwnz Linz youq bakdou ranz raen ci le, coh Ginh Ginh daengj hwnj mehfwngz riunyumnyum.

Mbouj daengz song bi, Mbanj- diendangz loh doeng, dienh doeng, raemx doeng, Ginh Ginh ndaej bingz guh “lauzdung mozfan”. Ndaw yienh gietdingh dawz Mbanjdiendangz guh denjsifan lajmbanj moq, ndaw mbanj ranznamh ranzvax cungj aeu cek bae, guekgya boujdiep hawj 5000 maenz, daengx mbanj aeu hwnj ranzlaeuz liux. 5000 maenz mbouj gaeuq hwnj ranzlaeuz, boh meh Vwnz Linz hix mbouj rox bae lawz ciq ndaej baenzlai cienz daeuj hwnj.

Ngoenzneix Vangzmehbaj hwnj ranz daeuj, de riu cam:“Boh Vwnz Sih, dingqgangj sou yaek aeu hwnj ranz- laeuz ha?”

“Aeu hwnj ha, couhdwg gip dai mbouj miz cienz ne!” Boh Vwnz Sih cup hwnj gaemz ien raezraez he, menhmenh boq ok gaemz hoenz oenqfwgfwg ndeu.

“Mbanjvaizrin Daeggyangz dak gou daeuj, de naeuz, danghnaeuz Vwnz Linz nyienh haq hawj de, de ok cienz hwnj ranz hawj sou.”

Daeggyangz dwg guh max vaiz gaicawx, geij bi neix daeuj seng’eiq ndei, canh le haujlai cienz, hoeng de miz aen da ndeu mengz, gaenq ndaej 40 bi lo, caengz aeu ndaej yah.

“Daeggyangz vunz mbouj yaez, danghnaeuz Vwnz Linz haq le, bau mwngz yiengjfuk daengx ciuhvunz, ranz hix hwnj ndaej, neix mbouj dwg gienh saeh song yiengh canh ha?” Vangzmehbaj gangj.

“Mwngz gangj hix deng, hoeng aeu cam Vwnz Linz gonq.” Meh Vwnz Sih gangj.

Vwnz Linz youq ndaw rug dingq ndaej cingcing cujcuj, de doq gip hwnj buhvaq uq cuengq haeuj doengj, doq byaij okdaeuj, de doiq Vangzmehbaj gangj:“Mwngz dauqbae lwnh de nyi, ranz gou caengz guh ranz, hawj de ra dahmbwk wnq ba!”

Vangzmehbaj dauqbae lo, ndaw- ranz cungj caemrwgrwg. Ndaw mbanj nauhnauh yiedyied cek ranzgaeuq, cij miz ranz Vwnz Linz caengz doengh, Ginh Ginh gip ndaej lumj naed duh gyang rek, de mbouj miz ngaenz bang youh simyou guh mbouj daengz gij iugouz baihgwnz.

Gvaq cibgeij ngoenz, Vangz- mehbaj youh daeuj lo, Vwnz Linz mbouj siengj raen bohmeh gvaq ndaej baenzneix sinhoj, de hamz raemxda doengzeiq lo.

Mbouj geij nanz, ranz Vwnz Linz hix cek ranz ciengz lo, Ginh Ginh daeuj ra Vwnz Linz, Vwnz Linz gaenq daej ndaej da hoengz liux.

Vwnz Linz caeuq Daeggyangz bae ndaw singz dwnghgi gezvwnh, Vwnz Linz gvaq lohnga seiz, sawqmwh miz aen cimohdoz ndeu lumj mbin nei cung coh Vwnz Linz……

Daj Vwnz Linz gvaqseiq le, aen ranzlaeuz moq ranz de couh dingz roengzdaeuj lo, Daeggyangz caiq mbouj swt lo. Boh meh de roxnyinh doiq mbouj gvaq dahlwg, roengzsim gag guhhong ra cienz hwnj ranzlaeuz moq. Dahyen caeuq Vwnz Linz dwg ndaw mbanj doengzdoih ceiq ndei, songde ciengz caez guh’angq gangjriu. Seiz ndaejhoengq, Ginh Ginh caeuq Dahyen doxiu daeuj dieg ranzlaeuz moq Vwnz Linz hwnj, Ginh Ginh bang daeb cien, Dahyen ndenq cien caeuq aeu naez.

Mbouj geij nanz, ranz moq ranz Vwnz Linz dauj dingj lo, Ginh Ginh caeuq Dahyen cawx bauqrengh daeuj cuengq, gij gunghcwngz cauh yiengh mbanj moq guh baenz lo. Gyang mbanj lij laeb aen daizheiq ndeu, moix daengz gyanghaemh, ndaw mbanj couh daeng ronghsagsag, gyoengq vunz- mbanj youq gwnz daizheiq ciengq go diuqfoux, angq doh gyae’gyaw.

Caet nyied caet daengz lo, haemhde boh meh Vwnz Sih vih dahngeih Vwnz Linz banh laeujyaem. Vuz goengdauh daeuj guh dauh, hawj vunzgyaj daenj buhvaq moq, caiq hawj bouxsai mehmbwk gag gaem duz vunzgyaj he doxbaiq. Gyoengqvunz baez yawj, songde mbouj dwg Ginh Ginh caeuq Dahyen ma?

Ginh Ginh caeuq Dahyen baiq liux lo, Ginh Ginh coh daihgya gangj:“Haemhneix gou caeuq Dahyen banh laeuj doxaeu, daj haemhneix hwnj, Vwnzbohlungz caeuq mehbaj couhdwg bohmeh dou, dou aeu ciengx geq hauq dai gyoengqde!”

Raen daengz neix, boh meh Vwnz Sih raemxda gaenq rim naj lo, gyoengqvunz cungj goengheij.

Couh youq mwh dox gingq laeuj angqhoh seiz, miz aen ci ndeu hai haeuj Mbanjdiendangz daeuj, menh- menh dingz youq dangqnaj daizheiq, ndaw ci byaij ok boux sai boux mbwk, miz vunz gangj:“Neix mbouj dwg Vwnz Sih ha?”

Boh meh Vwnz Sih dingqgangj le, buet daeuj yawj, meh Vwnz Sih baez raen couh heuh:“Dah neix dwg dah- lwg gou Vwnz Sih!” De aeu song fwngz bae got Vwnz Sih, doeklaeng daej hwnjdaeuj.

Vwnz Sih doiq vunzlai gangj:“Boux neix dwg duicangj Gvangcanj Ganhcazdui ndaw si. Geij bi daeuj, gou caeuq gyoengqde bae hag damq- caz, geij ndwen gonq gaenq damq ok lajnamh ndaw mbanj raeuz moek haujlai gvang, ndaej hai 50 bi. Daengz seizhaenx mbanj raeuz doeng dietloh、banh gunghcangj, vunzmbanj raeuz ndaej cienz boizbouj caemhcaiq cungj ndaej guh di hong gvendaengz hai gvang, gij ndwenngoenz couh yied daeuj yied ndei!”(sat)