Beij haeuj canghsijcih gwnz lizsij mizmingz bae, canghguhbit cungj mbouj miz gijmaz mingz. Gyoengqde laebsim guh bit, gagnyienh guh ndaek “rindemhdin”. Namzningz Si Binhyangz Yen Mbanjdaloz couh miz gyoengqvunz yienghneix ciuhdaih cungj baengh guh mauzbit gvaq saedceij. Gij dinfwngz guh mauzbit neix gaenq riuzcienz le 300 lai bi lo, gij mauzbit Mbanjdaloz ok haenx ndaej vunzbiengz heuhguh “mauzbit Daloz”.

Loz Yuzgung dwg canghguhbit Mbanjdaloz. Geij bak bi gaxgonq, cojgoeng Ranzloz daj Fuzgen senj daengz Binhyangz, dawz dinfwngz guh mauzbit laeng Sezgyangh Sanlenz Cin hag ndaej haenx son hawj lwglan. Neix couh bienqbaenz dinfwngz cienzdoengj Mbanjdaloz. Gonj mauzbit Daloz ndei ndeu aeu miz song bak lai bouh、guh baenz ndwen cij guh ndaej. Gij caizliu、yunghcawq mauzbit mbouj doxdoengz, guh hwnjdaeuj caemh loq mbouj doengz. Ganjbit itbuen dwg dingh aeu, gyoengqde cawjdaeuz guh gyaeujbit. Ciuq dinfwngz cienzdoengj, gij bouhloh guh gyaeujbit aiq faen miz genj liuh、cawz youz、cawz bwnyungz、guh bwn bingzcup、dapboiq、fan bwn、cug bwn、haeuj ganjbit daengj. Genj liuh, bwndouq、bwnnouguk、bwnyiengz raen haemq lai. Bwndouq dwg aeu nyaeb bwnndaem laenghoz duzdouqndoeng haenx, ma guh bit baenz raixcaix, hoeng mbouj ndaej lai; bwnnouguk cix dwg gij bwnrieng duznouguk, guh baenz bit ma sijcih raeuzrad dangqmaz; bwnyiengz cix dwg gij bwn duzyiengzbya, cungj bwn neix haemq unq.

Guh mauzbit dwg cungj hong saeq ndeu, aen- aen bouhloh cungj gig yawjnaek. Lumjnaeuz mwh guh bit, raemx mbouj ndaej ndat lai, ceiq lai mbouj ndaej mauhgvaq 40℃ daengj. Baihlaj aendaiz guhhong Loz Yuzgung miz aenbat caeng raemx ndaej rag haeuj rag ok ndeu. Caenh raen de dawz bwn cuengq youq gwnz gaenzraez fag roindokvaiz bae, lienz bwn daiq roi cimq roengz raemx bae, dawz hwnj le youh youq gwnzdaiz baez roq, hawj gij bwn bienq bingz, caiq aeu nyazroi bae sijsaeq roi gij bwn, baez geu baez geu cawz bwncab okdaeuj. Aen bouhloh ndeu ciengzseiz aeu baedauq guh baenz geij bak mbat geij cien mbat, aeu gig naihsim cijndaej. Canghguhbit ngoenznaengz baez guh couh guh baenz cib diemjcung doxhwnj, fajfwngz gyoengqde deng raemx cimq dwk hau bae, hohfwngz cix dawzdaw dawz dwk nanwtnwt. Linghvaih, mwh hag guh bit lij aeu hag baenzlawz guh、coih hongdawz. Lumjbaenz fag roindokvaiz, danghnaeuz mbouj ciengzseiz muz, nyazroi maeuz le couh roi mbouj haeuj bwn lo. Ndigah yaek aeu caencingq dawz gij dinfwngz guh mauzbit bienqbaenz gij swhgeij, ceiq noix aeu hag cib bi doxbae. Bouhloh lai、hag ndaej nanz, haujlai bouxcoz raen yienghneix cungj lau liux. Seizneix, canghguhbit Binhyangz Yen lauxhangz gij dinfwngz guh mauzbit neix cungj mbouj daengz 10 boux, bouxgeq de vanzlij miz betcib lai bi lo.

Bi 2012, dinfwngz guh mauzbit Daloz Binhyangz ndaej senj haeuj swcigih gaep feihyiz mingzloeg. Loz Yuzgung couh ciq raq rumzdoeng neix, dawz aen bouqmauzbit de gaij baenz gunghswh. De lij cingj le lauxcangh ndaw mbanj, daihgya itheij ciepcienz gij dinfwngz cienzdoengj neix. Gij mauzbit Mbanjdaloz ok haenx youq gyaiqsijcih Gvangjsih menhmenh caiq dauq mizmingz lo, lij miz vunz ra daengz mbanj bae cawx mauzbit dem.