“Yo, yo…… Caen gyaeundei bw!” Daxmeh bungj aen soujgih gou, yawj gij siengq mboqraemxraeuj yawj ndaej da cungj mbouj yaep, gwq haenh mbouj dingz bak, ndaw da cungj dwg gij vuenheij caeuq maqmuengh.

Daj gwnz naj daxmeh, gou lumj yawjraen gij haengjheiq mwh iq de——ranzdaiq couh youq henz Mboqraemxraeuj Budou. Yienghneix, buenx daxmeh daengz ranzdaiq bae liuh Mboqraemxraeuj Budou, couh- dwg gienh saeh daih’it ndaw gyajgeiz gou lo.

“Aen mboqraemxraeuj nit hix raeuj, cibfanh bya ndoi cungj heu- loeg.”Neix dwg sei vunzciuhgonq haenh Mboqraemxraeuj Budou. Ndaw 《Sangswh Couhci》geiq miz, Mboq- raemxraeuj Budou youq Mingzcauz seiz couh ndaej fatyienh lo, gij raemx ndei, gwn ndaej swiq ndaej, cujyau aeu daeuj ngauz laeuj caeuq cimq ndang, dwg aen gingj mizmingz ndeu ndaw 8 aen gingjsaek Sangswh Yen, heuhguh “Haemh Muengh Mboq- raemxraeuj”.

Mboqraemxraeuj Budou dwg mboqraemxraeuj dienyienz lajnamh, daj henz mieng gehrin nyoenx ok- daeuj, raemxmboq sawdikdik. Raemx- raeuj ciengzseiz dwg dohraeuj 38-42, ndaw raemx hamz miz lij、swh、diet、sinh、dungz daengj cibgeij cungj veizlieng yenzsu doiq ndang vunz mizik. Caemhcaiq, gij raemxmboq neix vanzlij dabdaengz gij biucinj raemxmboq ywbingh dem, miz hoh naengnoh、dingj geqgoem、unq lwedguenj daengj goengyauq, doiq haeujninz、dingz get、saenzging get、gvanhcezyenz、fungcaep、binghnyouh- dangz daengj cungj miz itdingh liuzyau. Mboqraemxraeuj Budou dwg aen raemxmboqgvangq daih’it ndaw guek、aen mboqraemxraeuj ngoenz ok raemx ceiq hung ndaw guek caeuq saek lamz dienyienz daih’it ndaw guek.

Mboqraemxraeuj Budou baez hai, gyoengq hek gyae’gyawj cungj coh mingzdaeuz de daeuj youz. Dauq dwg daxmeh daj iq youq henz de maj- hung, seizneix gaenq 70 lai bi lo, lij caengz ndaej bae caemz Mboq- raemxraeuj Budou gvaq…… Ndigah, gou gietdingh caiq nyaengq, hix aeu daiq daxmeh bae yawjyawj Mboq- raemxraeuj Budou, ndeindei youz baez ndeu.

Gaen dawz mbwn fuemx, dou hai ci coh Mboqraemxraeuj Budou buet bae. Daxmeh seiz mbouj seiz caeuq dou gangj seiz lwgnyez de yawjraen aen yiengh Mboqraemxraeuj Budou, gwnz naj cungj dwg riunyumj.

Mwh aen ci ginggvaq aen mbanj iq seiz, ha, neix mbouj dwg mbanj ranzdaiq gou lwi?

Seizneix, daxmeh engq haengj- heiq lo, mbouj dingz lwnh haujlai saeh ndeidingq gvendaengz Mboqraemx- raeuj Budou hawj dou dingq. Daxmeh mizseiz lumj lwgnyez nei daekeiq fwngfwng gangjsebseb, mizseiz youh miz di simyou. Siengj daengz neix, gou lumj yawjraen Mboqraemxraeuj Budou nei. Gij raemxraeuj laelulu neix, caen lumj gij ndwenngoenz daxmeh gvaqbae nei!

Gizneix seiqhenz bya sang ndoi lingq, nywj faex mwnnoengq, bya heu raemx saw, dwg dieg gyaeundei ndeu. Moix ngoenz haetromh, gaeqboux haen, ranz wenj rongh, mwhde daxmeh lij iq, caeuxcaeux dajswiq le, gij sing roeg ciuzcetcet daj ndaw mok cienz okdaeuj, daxmeh song ga riengjret coh mboqraemxraeuj byaij bae rap raemx. Dawz gij gang hunghung iqiq cungj cang rim liux, daxmeh youh iu geij dahyoux ranznden rap buh bae saeg. Gyoengqde itloh eu fwen, miz gangj miz riu coh diuz rij gyaeuj- mbanj laj gocueng caeuq makgai bae saeg buh, diuz dah iq neix couhdwg daj mboqraemxraeuj lae roengzdaeuj.

Daxmeh gangj, aenvih mboq- raemx neix seiqgeiq raeujrub, Boux- cuengh bonjdieg couh heuh de guh “Mboqraeuj”, seizneix ciuq yaem Vahcuengh hoiz baenz Vahgun“Bu- dou”. Mwhhaenx, vunzlai raen geij aen congh mboqraemxraeuj nyoenx raemx, mbouj miz geijlai hung, hoeng, ngoenz gvaq ngoenz, bi gvaq bi, mboqraemxraeuj daj aen congh neix mbouj dingz mbouj duenh nyoenx ok- daeuj, lae gvaq seiqlengq, menhmenh baenz aen daemz gvangq miz saek sam seiq bingzfanghmij yienghneix. Raemx rim le, couh roenx ok rog lae baenz rij iq, lumj duzngwz nei heuxgeuj youq ndaw lueg Sizvan Dasanh, riengz bya lae roengzdaeuj.

Haetromh, youq gwnz najraemx diuz rij mboqraemxraeuj baihlaj, gij mokraemx cungj dwg lailai noixnoix, roxnaeuz na roxnaeuz mbang, itloh hoenzloedloed, daegbied dwg seizcou caeuq seizdoeng mbwn nit gij mokraemx engq gienjloedloed, heux- geuj youq ndaw bya ndaw lueg, couh lumj miz gyoengq dahsien naengh fwj mbin daeuj, youh riengz rumz lizbae, lumj youq ndaw loq nei.

Youq diuz loh uteuj ndaw ndoi, bakdou Mboqraemxraeuj Budou couh youq baihnaj lo. De lumj Bouxcuengh nei yiedcingz, mbe song gen, angqcoux bouxhek.

“Ya, aen bakdou guh daengz gizneix ha? Daihfuengz youh rongh- gywg, gizneix caeuq mboqraemxraeuj lij haujlai gyae bw!” Daxmeh nyinh- caen yawj gij bya ndoi gyae’gyawj sim’angq naeuz. Youq ndaw da daxmeh, gij gingjsaek conghcueng aen ci baihrog, goengqgoengq bya ndoi cungj gig sug youh najseng.

Baez yaepda, ci couh hai daengz ndaw mboqraemxraeuj dieg cawx biuq lo. Cuengq da yawj bae, cungj dwg caijdaeng migmyanz mbouj dingz, lwenqda dangqmaz.

Daxmeh sikhaek ndonj ok ci bae, bak aj loengqloengq, saenqdoengh liux, buenq ngoenz cungj gangj mbouj ok vah.

“Meh, neix couhdwg Mboq- raemxraeuj Budou Sizvan Dasanh lo, bienqvaq hung lwi?” Gou riu cam daxmeh, hix gaen daxmeh ndawsim hailangh hwnjdaeuj.

“Neix gyawz dwg Mboqraemx- raeuj Budou gaxgonq ni? Gou dava caen nyinh mbouj ok bw!” Daxmeh daj ndawsim haenh naeuz, gangj sat couh yamqdin vaiqvet, caj mbouj gip coh giz genj biuq buet bae.

Caen dahraix, neix dwg aeu 50 lai moux dieg daeuj laebbaenz aen gingjgih mboqraemxraeuj lumj aen suenva bw, faen miz 3 aen daemz hung caeuq 5 aen daemz iq, baihgwnz lij daeb baenz daemz lumj nazmbaek nei, heiqseiq hungmbwk. Gak aen daemz faensanq youq dingzbam caeuq suenva ndawde. Lij miz baizeij、liengj hung daengj youq henz daemz, mboujlwnh daj gyawz yawj bae, cungj hung iq mbouj doxdoengz, lai cungj lai yiengh, hoeng, cungj doxhab doxbouj, boiq ndaej gig ngamj, caemhcaiq gij raemxmboq raeujrub sawdikdik, saek lamz lumj raemxhaij nei, gyaeundei raixcaix!

Daegdied dwg youq gyanghaemh, song aen daemz hung ndaw rug roxnaeuz rog rug, bouxlaux lwgnyez cungj roengz daemz bae caemz raemx, nauhyied dangqmaz; 5 aen daemz iq engq vaiqvued、daegbied、langman、youhyaj. Miz gij daeng doxdaengh, gizgiz cungj dwg ronghsagsag, geuj- heux youq gij dingz sangvidvid caeuq saeklamz mboqraemxraeuj, daegbied gyaeundei. Gyoengqvunz daeuj caemxndang guhcaemz, riengz dawz gij yinhyoz baebae dauqdauq youq laj ronghndwen cingxdikdik guh’angq…… Cungj dwg yubyab mbouj dingz, lumj youq diegsien nei.

Seizneix, daxmeh gaenq dawz- maez youq ndaw lo, moix daengz aen gingjdenj he, cungj gig geizheih, youh angqvauvau. Yaep ndeu dingz din yawjyawj mboqraemxraeuj iq, yaep ndeu youh rubrub aen eijninz. Byaij baeg le, de youh naengh youq laj liengzdingz yietnaiq, riunyumj yawj gingjsaek gyaeundei. Daxmeh baenz- lawz hix siengj mbouj daengz, mwh lij iq aen mboqraemxraeuj iqetet gyangndongj, lae le baenz nanz, gaenq geij bi ndwi, gingqyienz cauh ndaej aen diegsien baenz hung!

Ndawde gizgiz cungj miz gingj- saek gyaeundei, mboqraemxraeuj cawqcawq cungj raeuj aen sim bouxhek. Daxmeh itloh yawj, itloh riu. Mwh de yawjraen aen daemz dajcaemx yaek miz cien bingzfuengmij seiz, de caiq hix nyaenx mbouj ndaej aeu roengz raemx cimq baez he lo. Gou buenx daxmeh itheij cimq roengz mboqraemxraeuj bae, laep da menh- menh roxnyinh mboqraemxraeuj dumx gvaq naengnoh daengx ndang. Seiz- haenx, lumjbaenz menhmenh deng baengzsei raeujrub duk hwnjdaeuj nei, raeuzrad youh sim sangj. Gij raemx Mboqraemxraeuj Budou raeujrubrub caemhcaiq “unqmenmen”, mboujdan swiq ndang vunz caiqlix lumj swiq gij hoenz vunz dem.

Daxmeh aij ninz youq henzgyawj gou, song da loq haep loq hai, muengh gyoengq bya gizgyawj, gij yiengh de lumj ngamq gwn vanj laeuj haeuxcid Bouxcuengh ngauz nei……