Fouxlazgim youq Denzdungh Yen Cozdwngh Yauzcuz Yangh Mbanj Meizlinz、Bingzloz daengj dieg hingqhwng, dwg gyoengqvunz Bunujyauz ndaw gyaiq Denz- dungh cungj foux minzcuz ndawbiengz gig miz daiqbiujsingq ndeu, dwg cungj diuq- foux ndujdaeuz vunzcoj Yauzcuz dangdieg vih gyaeplaeh nyaenyak henre gomiuz cix cauhfat okdaeuj. Daengz seizneix foux- lazgim gaenq bienqbaenz cungj diuqfoux cuengqcaeq daeuz dieg Byayauz angqhoh fungsou angqhoh ngoenzciet ndeu. Moix bi ndwencieng caeuq liggaeuq ndwenngux ngeihgouj, sing lazgim couh youq ndaw Mbanjyauz yiengj goksad, gyoengqvunz angqvauvau ciengq go diuq foux, ciengz- mienh nauhyied dangqmaz.

Fouxlazgim aeu vunzlai caez diuq guhcawj, ndaej sam boux haj boux diuq, caemh ndaej geij bak baenz cien vunz caez diuq. Mwh diuqfoux, sien youq cungq- gyang diegdangz rag cug diuz gaeu roxnaeuz diuz cag ndeu, dawz lazgim roix venj hwnjdaeuj, caemh ndaej venj aen lazgim youq gwnz gyaqfaex roxnaeuz ngafaex, lazgimz liz gwnznamh mij haj sang, caenh fuengbienh diuqfoux mbouj deng gazged couh baenz. Gij yienghdoengh diuqfoux ciuqei gyoengqvunz dangdieg ngoenznaengz byaij roen guh hong haenx miz daixga ndaek laz、yukdin diemj laz、song faexroq gvaq gyaeuj、song faexroq vetlaeng roq、baenqluq diemj laz doengh gijneix, hailangh angqyangz, hawj vunz yawjraen cungj rengzlangh sengmingh caeuq gyaeundei yisuz ndeu. Seizneix, fouxlazgim mboujdan dwg vunzmbanj cungj hanghmoeg hozdung youzangq vwnzva ndeu, caemh baenz Denzdungh Yen aen cietmoeg noix mbouj ndaej ndaw hozdung cietgingq hungloet ndeu. Foux- lazgim gig ndaej daengz vunz dangdieg angqcoux, youq giz dieggoek fathwnj de Mbanjmeizlinz, saimbwk lauxnyaeq cungj rox diuq, dwg Byayauz cungj yienghsiengq vwnzva ndeu, engq dwg aen cietmoeg diuqfoux ndawbiengz minzcuz vunzlai Denzdungh haengjgyaez ndeu. Bi 2006, aen diuqfoux neix camgya gaiq daih’it Baksaek Si minzcuz conzdungj dijyuz hanghmoeg doxdax ndaej ngeih daengj ciengj. Doengh bi neix gvaqdaeuj, foux- lazgim Yauzcuz Denzdungh bae ndaw yienh rog yienh biujyienj baenz geij bak ciengz, hawj gyoengqvunz roxyiuj de haengjgyaez de lai dangqmaz.

Bi 1985, fouxlazgim Yauzcuz Denz- dungh ndaej lied haeuj guekgya yisuz siendaeuz haifat hanghmoeg; bi 1992 ndaej sou haeuj “Sawcomz Diuqfoux Ndawbiengz Minzcuz Cungguek Gienj Guengjsae” bae; bi 2010, ndaej lied haeuj swcigih gaep feihyiz hanghmoeg youqgaenj mingzloeg; bi 2014 ndwen 11, ndaej Gozvuyen baecinj lied haeuj buek daihseiq guekgya gaep feihyiz mingzloeg.