“Mehvuen, mwngz ren mbanj ra gou dauqdaej miz maz saeh?” Bohvuen cam.

“Gou caiq miz saeh hix dwg saeh iq. Gou dwg mbouj dwg gaujyauj sou gangjgoj ya?” Mehvuen naeuz.

“Mbouj miz ndwi!” Mehyah Ma- ngeih naeuz.

“Yu! Mwngz saundei lumj dahsien nei.” Mehvuen daj gyaeuj daengz din cim mehyah Ma’ngeih da ndeu, naeuz,“Nanzgvaiq miz vunz myaiz yag lo.” De da haengj coh Bohvuen.

“Mehvuen ha, boux neix dwg mehyah Ma’ngeih, raeuz baenz heuh de guh nuengxbawx nw.” Bohvuen naeuz.

“Nuengxbawx? Bawx vunz mwngz lij naemjgedged bw!” Mehvuen naeuz.

“Mwngz luenh gangj maz ne? Gou lauheiq mwngz deng fangz haeuj ndang luba?” Bohvuen naeuz.

“Deng! Miz vunz ngaiz fangz haeuj ndang lo, simgei mbouj cingq, naj hix mbouj goq. Gyangngoenz mbwnndaen, song boux sou ndoj youq gak ranz guh maz?” Mehvuenz naeuz.

“Cujyin gou, gou?” Mehyah Ma- ngeih yawj coh Bohvuenz, mbouj rox gangj maz, caemhcaiq lizbae rox- naeuz youq dwk dawz mbouj dingh cawjeiq.

Bohvuen nengh de gvaq henz bae, sing daemq naeuz:“Gij saeh gvanyah gou caeuq mwngz mbouj mizgven.”

“Ne! Vunzlai daeuj yawj nw, youq dangqnaj gou song ndaek marae neix lij fujfuj faetfaet nw, lij ndaej dem! Vunz guh mbwn raen, byajbag sou! Bag sou baenz nohloiq bae!” Mehvuen hemqgyagya.

“Mehvuen ha, mwngz hemq maz ne? Lumj mabag raeuq ronghndwen nei!” Bohvuen hat naeuz.

“Mabag cungj beij marae aeu- naj. Aeu ngaenz daeuj gou bae gyau ngaenzyihbauj, sou youq neix laeb- daeb damzsim youzcaih sou!” Meh- vuenz naeuz.

“Ngaenz……ngaenz?” Mehyah Ma’ngeih doeksaet, yawj coh Boh- vuen, fwngzgvaz goemq daehbuh cang ngaenz.

“Ngaenz, ngaenz maz ngaenz! Ndang gou mbouj daiq ngaenz nauq.” Bohvuen naeuz.

“Hw! Mwngz ngoenz lawz okdou mbouj daiq cien baj song maenz youq ndang? Ngoenzneix mwngz naeuz mbouj daiq, lau dwg soengq hawj saek meh marae luba?” Mehvuen naeuz.

“Cujyin, gij ngaenz neix mwngz dawz dauqbae hawj daxsauj ba, gou mbouj aeu lo.” Mehyah Ma’ngeih doq gangj doq mbon ngaenz okdaeuj.

Bohvuen raen le, gip lo, naeuz:“Aiya! Mwngz gaej dawz okdaeuj hawj vunz raen vei!”

“Dwg maz dijbauj mbouj ndaej hawj vunz raen ni?” Mehvuen cam.

“Daxsauj, 2000 maenz neix dwg cujyin hawj gou……” Mehyah Ma- ngeih caengz gangj sat, Bohvuen couh bongx gabi naeuz:“Mwngz, mwng guhmaz dawz okdaeuj? Aiya!”

“Dwg mbouj? Ngoenzngoenz naeuz boenq roengz mbanj haihoih, yienzlaiz dwg yienghneix ha? Cien- monz guh gij saeh raen mbouj ndaej vunz、raen mbouj ndaej mbwn ha! Guh gij saeh diuq ga diuq naj! Ngoenzneix gou caen mbouj hawj naj hawj mwngz!” Mehvuen doq hemq doq dawz sauqbaet gvangx Bohvuen.

Bohvuen goemqgyaeuj baenqlulu ndoj deuz naeuz:“Mehvuen, mwngz dingq gou naeuz gonq, dingq gou naeuz gonq!”

“Gaej moeb lo, gaej moeb lo!” Mehyah Ma’ngeih doq hemq doq gvaqbae cek, hoeng de caen miz di cek mbouj gvaqdaeuj.

“Dub dai mwngz! Dub dai duz marae neix.” Mehvuen hujdengdeng gyaep Bohvuen, doq gyaep doq gvangx sauqbaet. Gyaep geij hob le, de baegfofo lo, doeklaeng hixnaengz maeuq gwnzdieg daejngungu, doq daej doq damz:“Cungj ndwenngoenz neix mbouj miz banhfap gvaq roengzbae lo. Gou……gou aeu caeuq mwngz doxliz! ‘Ngungu’!”

“Daxsauj mwngz gangj maz?” Mehyah Ma’ngeih mbouj rox baenz- lawz gienq lo.

“Gaej leixlangh de! Duz vunz neix di dauhleix ndeu cungj mbouj gangj!” Bohvuen naeuz.

“Daxsauj, 2000 maenz neix mwngz dawz dauqbae ba, gou mbouj aeu lo.” Mehyah Ma’ngeih ndenq ngaenz hawj Mehvuen, Mehvuen mbouj ciep, de couh ce youq gwnzdieg dangqnaj Mehvuen.

“Gij ngaenz neix samj haex gvaq, uq! Gou mbouj aeu!” Mehvuen hemq.

Mehyah Ma’ngeih mbouj rox gangj maz ndei, couh cienq ndang yaek baema.

Bohvuen naeuz:“Nuengxbawx, gij ngaenz neix mwngz dawz bae gyau ngaenzyihbauj ba. Lwg mwngz ciengz- geiz baenzbingh, ciengzgeiz haeuj yihyen, ndawranz yungh cienz lai, rapdawz sou naek lai lo. Ma’ngeih vih neix deng dwk hungraeuh, aen uk de gaenq mbouj lingz geijlai lo. Seizneix ranz mwngz couh baengh mwngz boux dog dangranz guhcawj, sinhoj lai lo.”

“Cujyin ha, sinhoj dwg sinhoj, mboujgvaq, ranzranz cungj miz gun- nanz, gou mbouj ndaej vih swhgeij hawj ranz bouxwnq doxceng doxndaq. Gou gag siengj banhfap ba, gyo’mbaiq mwngz lo! Gou bae gonq nw.” Mehyah Ma’ngeih naeuz.

“Daengx gonq!” Mehvuen fwt hemq.

Bohvuen caeuq mehyah Ma- ngeih cungj doeksaet lo, laihnaeuz de yaek guh maz saeh lanhgyaeuj dem, couh singjgaeh yawj coh de.

Gizsaed, Mehvuen dingq le gij vah Bohvuen caeuq mehyah Ma’ngeih gaenq gangj le, de hix gig simcieg, gaenq menhmenh rox bonjfaenh ngeix loeng lo.

De hemq “daengx gonq” sing he le, gungj hwet vaz dawz gij cienz gwnzdieg, byaij daengz henz ndang mehyah Ma’ngeih, naeuz:“Nuengx- bawx, doiq mbouj gvaq, gou loengh loeng mwngz lo. Yienzlai gij ngaenz dwg yienghneix youq ndaw daehbuh mwngz. Aiya! Gvaiq daxgo mwngz mbouj gangj cingcuj. Doiq mbouj gvaq lo!”

“Daxsauj, dwg dou doiq mbouj gvaq sou. Hawj sou dem mazfanz lo.” Mehyah Ma’ngeih naeuz.

“Mbouj miz! Mbouj miz! Mwngz naeuz ndaej deng, gizsaed, ranzranz cungj miz gunnanz, mboujgvaq gunnanz miz hung miz iq, mboujguenj hung iq, ndaej bang couh bang. Gou hix mbouj rox gangj maz dauhleix hung, gij cienz neix mwngz dawz bae gyau ngaenzyihbauj ba!” Mehvuen naeuz.

“Daxsauj, gou, gou……” Meh- yah Ma’ngeih mbouj rox gangj maz lo.

“Gaej doi lo, ranz mwngz gunnanz lai, 2000 maenz neix couh soengq hawj mwngz lo.” Mehvuen naeuz.

“Hei! Hei! Gaenq gangj gvaq dwg ciq hawj, mbouj dwg soengq hawj nw!” Bohvuen naeuz.

“Cujyin, mwngz cuengqsim ba, gvaqlaeng miz cienz gou haengjdingh boiz!” Mehyah Ma’ngeih naeuz.

“Aiya! Haibak haepbak gangj cienz, sieng gij cingzngeih beix- nuengx. Gou naeuz soengq couh soengq.” Mehvuen naeuz.

“Gyo’mbaiq daxsauj! Gou rox, cujyin ndaej vih vunzmbanj raeuz guh baenz baenzlai saeh, dwg miz mwngz youq baihlaeng haeujcoengh de.” Mehyah Ma’ngeih naeuz.

“Mbouj deng! Mbouj deng! Dwg gou haeujcoengh de.” Bohvuen naeuz.

“Dwg daxsauj haeujcoengh cuj- yin mwngz.” Mehyah Ma’ngeih baez cih baez cih naeuz.

“Aiya! Byawz haeujcoengh byawz cungj baenz, dwg vunzranz couh aeu doxhaeujcoengh! Mwngz naeuz deng mbouj deng?” Mehvuen doq naeuz doq yawj coh mehyah Ma’ngeih.

“W—— Daxsauj mwngz gangj ndaej deng!” Mehyah Ma’ngeih sim- angq han. Doeklaeng song mehmbwk doxgot.

“Hix got gou mbat ndeu ba!” Bohvuen riuhaha aj song cik gen deq.

“Bouxcitien geq! Mwngz haeu- foegfoeg, byawz gyaez gyawj mwngz?”

“Haha!” Song mehmbwk doxyawj caemh sing riu.

(sat)