Siu Cuh mbouj caiq gyaep Lungz Byauh deuz, youzcaih de lo.

Lungz Byauh hix caen miz naihsim, gwq youq laj gofaex naengh daengz lajbyonghngoenz, mwh gyoengq dahsau yaek roengz bya seiz, lau deng gyoengqde yawjraen, cij mbouj cingz mbouj nyienh byaij deuz, roengz bya maranz gonq lo.

Couh yienghneix, Lungz Byauh ngoenzngoenz buet daengz gwnz bya daeuj buenx Siu Cuh gvej haz, song bouxcoz caemhyouq, miz gangj miz riu, guhhong hix mbouj roxnyinh naetnaiq, ngoenz he baez yaep da couh gvaqbae lo, saedceij gvaq ndaej gig vaiq.

Gij gamjcingz songde gaenq ngoenz beij ngoenz laegnaek, caemh- caiq cungj rox gij cingzeiq doiqfueng, hoeng cungj najmong mbouj gamj haibak gangj okdaeuj ndwi.

Ngoenzhaenx, Lungz Byauh cingq bang Siu Cuh cug fwnz, sawqmwh dingqnyi Siu Cuh doeksaet swenj sing he, ngiengxgyaeuj baez yawj, caenh raen Siu Cuh ndaw fwngz gaem vad fagcax, gwq doiq dauqlaeng, ndaw bak hemq dwk:

“Lungz Byauh…… Lungz Byauh……”

“Miz maz saeh?”

Lungz Byauh bongh gvaqdaeuj, byaengq da baez yawj, yenzlaiz dwg duz ngwzndaem he!

Duz ngwzdoeg saekndaem neix miz song cik lai raez, aiq deng Siu Cuh gik lo, de cingq ngiengx gyaeuj- samgak, menhmenh nod coh Siu Cuh daeuj.

Lungz Byauh baez rag Siu Cuh daengz henz, duz ngwzndaem haenx sikhaek couh riengz gvaqdaeuj. Lungz Byauh swnhfwngz ciengj fagcax ndaw fwngz Siu Cuh gvaqdaeuj, loq gungj hwet bae raemj duz ngwzndaem haenx.

Baez yaep da, duz ngwzndaem deng raemj baenz le song gyaengh, hoeng hix haeb deng gij gahengh Lungz Byauh lo.

“Aiya——”

Siu Cuh heuh sing daemq ndeu, cij raen gahengh Lungz Byauh miz le song aen baksieng, miz aen reb yienghneix hung, gij lwed cingq daj giz baksieng lae roengzdaeuj.

Duz ngwzndaem deng raemj baenz song gyaengh le, lij youq gwnznamh ningnyubnyub.

(caengz sat)