Bi 2019,

Couh yaek daengz bi nou,

Byawz rox mbwn dem you,

Souh binghraq nyaux biengz.

Vujhan deng daih’it,

Cigsoh daengx Huzbwz,

Binghraq daeujhwhw,

Huj vunzbiengz simcieg.

Vujhan cig heuh gip,

Vangzgangh ciep dem you,

Yauganj hix heuh gouq,

Daengx guek mbouj an’onj.

Dangjcunghyangh roengz lingh,

Fung singz gimq ok byaij,

Youq ranz mbouj ndaej vaij,

Duenh roen byaij binghdoeg.

Canghyw nyig roen byaij,

Ganj bae caij binghdoeg,

Sengj si bang doxgot,

Doed ok dangj yinghmingz.

Ngamq daeb Hojsinzsanh,

Youh ganj Leizsinzsanh,

Laeb yihyen fanghcangh,

Bang giz sou bouxbingh.

Binghraq mbouj rox gyaiq,

Vaih guek aen dem aen,

Hung iq de mbouj faen,

Hix gamj nyaenj guek daeuz.

Yidali baenzbyoz,

Meijgoz hix deng ngaiz,

Daengx biengz vunzbingh lai,

Yaepyai geijlai fanh.

Ouhcouh simvuengvueng,

Luenh lumj moed ndaw cauq,

Mungzyoux mbouj doxgauq,

Cauh vahriu gwnzbiengz.

Meijgoz aen guek daeuz,

Naeuz mbouj lau binghraq,

Byawz rox yaep seiz da,

De deng lah ceiq lai.

Bingh daeuj mbouj gangj gouq,

Naeuz vunz guh mbouj baenz,

Hix mbouj rox dwgcaengz,

Yaeng bae ciengj goujcau.

Naeuz saefueng fatdad,

Doeksat dwg yienghneix,

Dauqcawq mbouj gangj leix,

Miz maz daekeiq lai.

Dauq yawj raeuz Cunghgoz,

Seizneix mbouj lauheiq,

Baengh dangj dazyinx ndei,

Sevei ndaej andingh.

Dangj lingjdauj baihlaj,

Binghraq ndaej dwk hingz,

Ndaw biengz ndaej onjdingh,

Hai singz youh hai hong.

Bouxboux caez fuengzceih,

Laeb ndei ndaej guhyiengh,

Comz vunz miz ligliengh,

Goj ndaej biengj goengqbya.

Bae bang Yidali,

Lij coengh Saiveizya,

Yizmyauz rog guek caj,

Ra Cungguek gouqmingh.

Soengq yw youh baij vunz,

Cungj simsienh simndei,

Binghraq gaemhanh ndaej,

Vunzbiengz meiz(miz) maqmuengh.

Youq cainanh baihnaj,

Cij roxnaj byawz ndei,

Roen byaij ndei mbouj ndei,

Cij meiz(miz) din gag rox.

Sevei cujyi ndei,

Ceih guek baengh caenleix,

Cidu laeb guek ndei,

Fukheiq hawj gwnzbiengz.

Sevei cujyi ndei,

Ndaej meiz(miz) dangj yinx byaij,

Hojceh baihnaj daiq,

Byaij sevei cujyi.