Cang gyaekbam dwg Bouxcuengh Cingsih Si cungj minzsug youq cietheiq biujyienj haenx. Cingciuz satbyai, gij gaicawx Cingsih haemq hoengh, mbangj bouxdiegrog bae Cingsih guh seng’eiq le couh youq gizde youqdingh. Boux- seng’eiq Guengjdoeng dawz cungj dinfwngz gwnzbiengz heuhguh “biusaek” haenx daiq daengz Cingsih bae, neix couhdwg “cang gyaek- bam”. Bi 2012, cang gyaekbam Cingsih ndaej senj haeuj buek daihseiq swcigih gaep feihyiz mingzloeg.

Gyaekbam dwg Cungguek cungj yisuz gaeuqgeq gwnzbiengz, de baumiz bajheiq、meijsuz、cangndang、diuq foux、yinhyoz、heiq. Youh youq gwnz daiz iqetet haenx langhbaij gij gvaigvet ndeiriu lwgnyez, dauq yienj gij gojgaeq cienznaeuz bouxsaenz caeuq gak cungj gojgaeq lizsij. Doeklaeng gij dinfwngz guh’ angq Bouxgun neix youq Cingsih couh bienqbaenz gij Boux- cuengh lo. Gij vunz cang guh duzyou Bouxgun menhmenh aeu vunz ndaw cienznaeuz Boux- cuengh dingjlawh.

Cang gyaekbam cienzdoengj Cingsih, youh heuh fandaihguek、guhheiq、rambam、gyaekva、diengzva daengj. De cawjdaeuz dwg vih le angqhoh mbaenj fuk, haenh doenghgij vunz cungcig hauqswnh、mingzmuengh gig daih haenx. Gyaekbam dwg aeu faex dap baenz aendaiz seiq bingzfueng hung ndeu（raez gvangq cungj miz song goengcik, miz 3 daengz 5 caengz sang）, seiqhenz aeu gak cungj baengzcouz lai saek longz hwnjdaeuj. Gwnz gyaekbam cuengq aen bya- gyajiq、gova、gofaex、duzmax、roegbeghag daengj bae dajcang. Geij boux lwgnyez cix cang guh duzyou ndwn youq gwnzde. Lumjbaenz yaengx bien fad max、dahsien vanq va、Nungz Cigauh okciengq daengj. Doenghbaez dwg aeu geijcib boux lwgmbauq ndangrengz doxcaeuq ram gyaekbam, gwnz aen’gyaq cix miz cibngeih sam boux lwgnyez cang guh duzyou ciuhgeq roxnaeuz vunz ciuhneix. Baihgwnz fajfwngz、aencenj、fagcax、faggiemq cungj ndaej ndwn vunz, boux ndeu baihgwnz lij ndwn miz boux dem, cang dwk lumjlili. Seizdaih bienq le, gyaekbam caemh bienq lo, lumjbaenz aeu ci lawh vunz bae rag gyaekbam, vunzsai mehmbwk bouxlaux lwgnyez cungj ndaej cang guh duzyou bae youzhaw.

Gyaekbam baez ok haw, bouxyawj vunz lai vunz daih. Cingsih gak dieg cungj dwg youq mwh gvaq cieng banh cang gyaekbam. Mbangjbaez, mbangj dieg banh gij hozdung haemq hunghoengh haenx cungj cang gyaekbam bae dem nauhyied. Gyoengq vunzmbanj gak aen yanghcin gap guh cibgeij aen doih biujyienj, lumj man、aendomq、duznyanh、hanqmbwn、daeng’va、foux lungz foux saeceij daengj. Gyoengqde youq aen daiz iqet gwnzde langhbaij gij cienznaeuz caeuq gak cungj gojgaeq Bouxcuengh raeuz. Aendoih cang gyaek- bam gak dieg cungj gak miz gij daegsaek swhgeij, yinx baenz fanh vunz bae humxyawj, yienhciengz gyukgyad nauhyied. Bi 2011、bi 2012 gvaq cieng, aendoih cang gyaekbam Cingsih gonqlaeng camgya Baksaek ciet vwnzva minzcuz gwnzbiengz liebyouz doxdax, cungj aeu ndaej it daengj ciengj; bi 2009, lij youq Guengjcou camgya yisuz gwnzbiengz liebyouz doxdax cix aeu ndaej ngeih daengj ciengj.

Cang gyaekbam mboujdan dap miz gij siengjgyaez hongsaeh ndei vunz Cingsih, lij yienh’ok gij minzcuz vwnzva lauxsaed、 angq- yangz Bouxcuengh hawj vunzbiengz.