It

Cunhveijvei bangunghsiz.

Haetromh, cunhcujyin Bohvuen cingq cingjleix gij caizliu fuzbinz gwnz congz, doq cingjleix doq gag nam:“Dan dwg loengh gij caizliu fuzbinz gaenq doh gou boenq, seizneix youh daengz seiz gyau ngaenzyihbauj. Ngaenzyihbauj vunz lajmbanj bibi hwnj gyaq, bimoq youh hwnj daengz boux vunz 280 maenz. Haujlai vunz- mbanj yiemz bengz, damzbyoebbyoeb. Mboengqneix gou cungj boenq roengz mbanj dungyenz vunzmbanj gyau ngaenzyihbauj. Hongranz hongreih cungj mbouj ndaej goq, ce hawj Mehvuen gag guh. Nanzgvaiq de mboen gou, naeuz gou lumj duzmax biq nei, gyaez youq rog youzlangh, mbouj ngah haeuj riengh. Ai! Mboen goj mboen lo, gou aeu guh sat gaiq hong neix cij ndaej simonj youq ranz caeuq de guhhong. Yaep dem, gou lij aeu roengz mbanj bae.” Bohvuen sousib ndei gwnz congz le, byaij daengz yiemhranz yawj mbwn.

“Cujyin, gouqmingh ha! Gouq- mingh ha!” Ma’ngeih ga ndiengjnded coh Bohvuen buet daeuj ndoj haeuj baihlaeng de bae.

“Duz mageq mabag mwngz, ngoenzneix gou aeu dub mwngz dai bae!” Mehyah Ma’ngeih gyang fwngz gaem gaiq sauqbaet ndeu gyaep Ma- ngeih.

“Hei, hei! Gvanbaz sou doxmoeb maz ne?” Bohvuen lanz mehyah Ma- ngeih roengzdaeuj.

“Dub dai mwngz! Bok gaiq naeng mwngz!” Mehyah Ma’ngeih haeb heuj haeb faenz ndaq Ma’ngeih.

“Nuengxbawx, Ma’ngeih guh loeng maz saeh lo?” Bohvuen cam.

“Cujyin ha! Duz mageq ranz gou baenzbag lo, mbouj baenz vunz lo!” Mehyah Ma’ngeih naeuz.

“Gou mbouj baenzbag!” Ma- ngeih bagyanyan naeuz.

“Lij naeuz mbouj bag dem? Bag daengz mbouj miz maz yw gouq ndaej lo. Gou sinhoj rom ndaej 2000 maenz ngaenz, ce daeuj gyau ngaenzyihbauj. Gou diem youq ndaw daeh cang ceh duhnamh, duz mageq neix ndaej raen, laeglemx dawz bae yungh caez, caen dwg mingh haemz lo!” Mehyah Ma’ngeih naeuz.

“Miz cungj saeh neix ha?” Bohvuen cam Ma’ngeih.

“Song ngoenz gonq, gou caeuq geij boux hujgeiq gwn laeuj, gwn daengz dingz daengz byongh byaek sat lo, mbouj miz maz soengq laeuj. Gou fwt siengj daengz ndawranz lij miz di duhnamh, couh dauqranz aeu. Yi! Raen ndaw daeh cang ceh duhnamh miz cienz, gou couh mbon aeu roengz daehbuh bae lo, gou nauq dwg guhcaeg?” Ma’ngeih naeuz.

“Ya! Ceh duhnamh ce daeuj ndaem, mwngz baenzlawz dawz bae gwn ni? Vahsug naeuz ‘gwn haeux- faen imq donq ndeu, iek ciuhvunz’, mwngz bouxguhnaz mbouj rox aen dauhleix neix la? Caiqnaeuz, cienz yo youq gyawz, mwngz doq raen doq aeu, lumj duznou nei——ndaeng soem bak gvij. Gij ngaenz mwngz yungh guh maz lo?” Bohvuen cam.

“Gou caeuq hujgeiq gwn laeuj, gwn dwk gwn dwk, haeujyinx lo, couh caimax. Hainduj, gou mbatmbat hingz, ak dangqmaz. Doeklaeng cungj saw, cungj ngaiz gwn laeuj, saedcaih gwn mbouj roengz le, gou couh cingj vunz lawh gwn, boi ndeu 50 maenz. Yaep yet, 2000 maenz couh bae liux lo!” Ma’ngeih naeuz.

“Bae caeuq geij ndaek hujgeiq mwngz gvaq ba.” Mehyah Ma’ngeih gangj sat youh yaek cung gvaqbae dub Ma’ngeih, Bohvuen youh lanz, de couh ndwn dwk ndaqsebseb.

“Gaej ndaq lai lo, ndaq lai hix mbouj mizyungh, baezlaeng aeu roxhit, gaej guh saehhuk.” Bohvuen naeuz.

“Cujyin ha, baezlaeng dem ha? Baezneix gaenq nguh saeh lo, nguh daihsaeh gou lo. Seizneix, ndaw mbanj ranzranz cungj gyau ngaenzyihbauj liux lo, gag ranz gou caengz gyau. Ranz gou miz 5 bouxvunz, song goenggeq, gvanbaz gou, daeglwg dem, hawj gou bae gyawz ra 2000 maenz daeuj gyau ne? Ndaek hab dai neix, guh mbouj baenz maz saeh, vaih saeh dauq maenh’ak, caen hawj gou cab- heiq!” Mehyah Ma’ngeih naeuz.

“Ya, yienghneix ha.” Bohvuenz naeuz.

“Mageq mwngz! Mwngz bae ra ngaenz dauq hawj gou!” Mehyah Ma’ngeih fwngz vix coh Ma’ngeih sing hung naeuz.

“Geij boux hujgeiq gaenq okrog bae dajgoeng lo, gou rox bae gyawz ra dem? Neix mbouj dwg roeg mbin cungq cij yiengj ha?” Ma’ngeih naeuz.

“Mwngz lij gangj vah daeuj nyex gou hozhwnj dem?” Mehyah Ma’ngeih youh cung gvaqbae yaek dub de, Bohvuen youh lanz.

“Bae! Ma’ngeih, bae caeuq vunz ciq ngaenz bae.” Bohvuen naeuz.

“Gou rox bae gyawz ciq ha?” Ma’ngeih naeuz.

“Mwngz, mwngz mbouj rox bae gyawz ciq, hixnaengz mwngz bae dai cixbah. Gou da mbouj raen sim mbouj fanz! Bae……dai, bae……dai!” Mehyah Ma’ngeih hozndat daengz gangj vah mbouj baenz coenz.

“Aiya! Heuh mwngz bae couh bae! Bae, vaiq bae.” Bohvuen gyaep Ma’ngeih deuz.

Ma’ngeih gaeugaeu gyaeuj, gig mbouj cingznyienh byaij deuz lo.

“Mwngz ra mbouj ndaej ngaenz dauq hawj gou, haemhneix mbouj hawj mwngz haeuj ranz!” Mehyah Ma- ngeih coh baihlaeng Ma’ngeih gveng sauqbaet, lij ndaqsebseb dem.

“Nuengxbawx, gaej ndaq lai lo, raeuz itheij siengj banhfap ba.” Bohvuen naeuz.

“Cujyin, lij miz maz banhfap dem? Mbouj miz ngaenz, maz banhfap cungj mbouj mizyungh.” Mehyah Ma- ngeih hozndaet gangj.

“O——” Bohvuen lawq yaep ndeu, “Yienghneix ba, ndang gou lij miz 2000 maenz, mwngz dawz bae gyau gonq ba.”

Mehyah Ma’ngeih bi fwngz laglag naeuz:“Gij ngaenz mwngz, gou……gou mbouj ndaej aeu.”

“Gaej doi lo, gyau ngaenzyihbauj youqgaenj.” Bohvuen naeuz.

“Cujyin?” Mehyah Ma’ngeih siengj aeu youh mbouj ndei eiqsei aeu.

“Lij lawq maz ne? Dawz bae.” Bohvuen naeuz.

“Cujyin, gyo’mbaiq mwngz lo.” Mehyah Ma’ngeih riengjret ciep aeu.

Bohvuen riuhehe naeuz:“Geq ndei nw, neix dwg 2000 maenz.”

Mehyah Ma’ngeih hix riuhihi naeuz:“Bouxlaux naeuz ngaenz mbouj geq mbouj bengz. Aeu geq, ndeu, song……”

Ngeih

“Bohvuen ranz gou dang aen cujyin iqet he, daengx ngoenz youq rog boenq, naeuz boenq hai hoih, boenq roengz mbanj, gou bae yawjyawj dwg mbouj dwg gonq.” Mehvuen coh cunhveijvei byaij bae.

Byaij gyawj le, de raen song aen ngaeuz baihlaeng ndwn youq gakranz guh maz. Aen ndeu duh Bohvuen, bouxgvan coemh baenz daeuhfeiz, de cungj yawj ndaej ok bw. Lingh aen dwg boux mehmbwk he, yawj mbouj ok dwg byawz, songde ndwn ndaej yaek doxnem bae. Mehvuen haenq- rengz ae “w” sing ndeu.

Bohvuen caeuq mehyah Ma- ngeih cungj doeksaet lo. Mehyah Ma- ngeih muengz oet cienz gyang fwngz roengz daehbuh bae. Songde caez baenq ndang dauq.

“Yi! Mehvuen, miz maz saeh langh mbanj ra gou ne?” Bohvuen cam.

“Mwngz langh ndaej, gou langh mbouj ndaej ha?” Mehvuen naeuz.

“Daxsauj!” Mehyah Ma’ngeih dongx Mehvuen.

“Yi! Song boux sou ndoj youq gakranz neix gangjgoj ha?” Mehvuen gangj vah soemjsebseb.

“Daxsauj, song dou……” Meh- yah Ma’ngeih caengz gangj sat, couh deng Mehvuen dajduenh lo.

“Yahgeq couh yahgeq luba, heuh maz Daxsauj? Heuh ndaej gou naenggaeq hwnjsasa caez!”

(caengz sat)