“Gou mbouj ndaej caiq gwn lo.” De ndenq aen doengjfaex hawj Siu Cuh, “Aen dungx yaek bengq dek lo.”

Siu Cuh riuhehe coux aen doengjfaex iq gvaqdaeuj, caiq aeu fagliemz dat faexcuk baenz gouh dawh, cienq ndang bae gwn.

Lungz Byauh ndwn hwnqdaeuj gvax daengz dangqnaj Siu Cuh, Siu Cuh vadvad fwngz coh de.

“Deuz, gaej yawj vunz gwn haeux.”

“Haxbaenh mwngz vihmaz yawj gou gwn haeux ne?”

“Mwngz caen dwgcaengz!” Siu Cuh youh cienq ndang gvaqbae.

De mbouj nyaenxsim caiq nguh Siu Cuh gwn haeux, gag maeuq wij, dinghdingh yawj gwnznamh gyoengq duz moedndaem ram diuz gangjbya, diuz gangjbya dwg de haxbaenh ngamq vut youq gwnznamh, duzmoed yied comz yied lai, diuz gangjbya menhmenh daeh coh go faexhung baihde bae. Danghnaeuz bingzciengz de bungz raen, cungj aeu siengj caenh banhfap bae gauz, lumjbaenz duet vaq ok gong nyouh ndeu cung duzmoed sanq bae. Hoeng ngoenzneix de dauqfanj naihsim ngonz, caemhcaiq yawj ndaej angqfwngfwng, hix mbouj rox dwg bang duzmoed gwnzbya neix seizheiq ndei roxnaeuz dwg bonjfaenh bienq lo.

Sing fa doengjfaex goemq yinx Lungz Byauh yawj gvaqbae. Siu Cuh gaenq gwn imq lo, de cingq sousib, venj doengjfaex iq cang gijgwn youq gwnz nyefaex.

“Gwn liux le?” Lungz Byauh doq cam, “Gaeuq mbouj gaeuq gwn?”

“Gaeuq!” Siu Cuh aeu laeng- fwngz uet naengbak, “Seizneix mwngz bae ranz ba.”

“Vihmaz? Mwngz youh gyaep gou deuz?”

“Fwngz mwngz in lo. Lij dwg caeuxdi bae ranz yietnaiq gonq ba.”

“Mbouj youqgaenj, mwngz gvej nya faenh mwngz, gou naengh youq laj faexhung yietnaiq faenh gou.”

(caengz sat)