Majleij mbouj ndaej doegsaw gvaq, hoeng de daj seiziq couh hag rox iem mou, youq ndaw mbanj henz mbanj loq okmingz.

Majleij bineix ndaej 25 bi, daxboh de bang de ra dah lwgsau beij de hung 5 bi ndeu guh yah. Majleij dangyienz mbouj nyienh, daxboh de naeuz mbwk hung gvaq sai, fouq daeuj heux. Euq mbouj gvaq bouxlaux, Majleij cij ndaej doxaeu lo.

Mehyah de heuhguh Sizyah. Sizyah maj ndaej gyaeundei, couh- suenq ngoenzngoenz youq laj ndit guhhong, najnoh de cungj dwg haumaeq, fajnaj lumj aen makbingzgoj sug nei dwggyaez. Hoeng de caeuq Majleij doxdoengz, mbouj ndaej doeg gvaq saek ngoenz saw.

Doxaeu mbouj geij nanz, Sizyah caeuq Majleij naeuz:“Raeuz ciengx bitgyaeq ba, aeu 10 doiq.” Majleij mbouj rox vihmaz aeu ciengx aen soq neix. Sizyah gejnaeuz:“Huk, bouxlaux mbouj dwg naeuz saehndei baenz doiq lwi? Caemhcaiq gou heuhguh ‘Sizyah’, aeu Vahgun daeuj gangj, mbouj couhdwg 10 doiq bit ha?” Majleij dingq le riunyumnyum.

Daengz ngoenz haw, Sizyah caeuxcaeux couh daeuj daengz gwnz haw, cigsoh buet bae giz gai bitlwg. Lauxbanj raen Sizyah, riunyumj naeuz:“Dahnuengx ha, yaek cawx bitlwg ma, duz bitlwg gou dwg duz bitmaz Sihlinz cingqhuq, ciengx seizgan dinj, maj ndaej maengh gig vei……”

“Gou mbouj guenj duz bit mwngz maj ndaej baenzlawz, mwngz couh bang gou senj 10 duz bitboh caeuq 10 duz bitmeh okdaeuj.” Sizyah dajduenh gij vah lauxbanj gai bit.

“Yu, mwngz mbouj dwg hawj gou hoj guh ha? Gou baenzlawz yawj ndaej ok duz lawz dwg bitboh, duz lawz dwg bitmeh? Gyoengqde mbouj miz geiq- hauh ha!” Lauxbanj naeuz.

“Gwnz haw baenzlai vunz, mwngz couh faen ndaej ok byawz dwg boux- sai, byawz dwg mehmbwk. Mbouj lai gangj lo, mwngz bang gou senj, moix duz gou lai hawj mwngz 5 gak ngaenz, senj mbouj deng, gou heuh mwngz aeu cienz ma.” Sizyah haengjdingh naeuz.

Sizyah cawx bit ma ciengx ndaej song ndwen, bitboh bitmeh caen faen ndaej okdaeuj lo, cingqngamj dwg 10 duz bitboh, 10 duz bitmeh. Sizyah ut lwgfwngz geq gij seizgan gyoengq bitmeh ok gyaeq, gag guhcaeg angq- vauvau.

Daengz 7 nyied, cingq dwg mwh bitgyaeq bwh ndei ok gyaeq. Sizyah aeu youzcaet mai gwnz ndang gyoengq bit, faen baenz doiq bitboh bitmeh ndei.

Miz ngoenz ndeu, Sizyah raen duz bitboh riengz duz bitmeh geiqhauh wnq, de ganjgip gyaep duz bitboh gvaq lingh mbiengj bae. Hoeng mbouj geij nanz, youh raen lingh duz bitboh bae caeuq duz bitmeh geiqhauh wnq, de youh bae gyaep sanq song duz de. Mbouj haeujsim dawz, songde youh doxnem doxndiep, Sizyah youh bae gyaep. Buenq ngoenz roengzdaeuj, de youh huj youh baeg.

Ndwen haenx, ndaw cin vihliux guh ndei gij hong doihduz fuengzraq, cingj Majleij bae yangh souyihcan guh canghywdoihduz. Majleij moix ndwen cungj miz cienzhong lingx lo, Sizyah hix sim’angq raixcaix.

Majleij guh buenq bi lo, aenvih de rox aeu ywdoj bae yw duzvaiz duzmax dungxraeng caeuq gvanhcez- yenz, caemhcaiq mbouj sai geijlai cienz couh yw ndei, ndigah Majleij youh deng diuh daengz ndaw yienh cuzmuzgiz bae lo.

Majleij diuh bae ndaw yienh le couh gig noix ndaej dauq ranz lo, Sizyah ngoenzngoenz ciuqgoq duzbit couh lumj ciuqgoq lwgnyez bonjfaenh nei.

Mbouj rox ngoenz lawz, miz vunz naeuz hawj Sizyah, naeuz Majleij caeuq mehmbwk wnq doxndei lo. Sizyah buenq saenq buenq ngeiz. Gvaq le geij ngoenz, de laeglemx daeuj daengz ndaw singz, youq aen dou hung Majleij hwnjban yawjraen Majleij caeuq boux mehmbwk ndeu miz gangj miz riu.

Sizyah youh daej youh nauh, daej gaeuq lo, nauh gaeuq le, youh yaek haeuj ndaw giz bae gauq. Majleij ndatheiq lo, sing hung hut:“Mwngz fatbag luba? De dwg boux doengzsaeh gou, mwngz gauj maz luenh ? Mwngz siengj bae gauq couh bae.”

Sizyah youh siengsim youh hozndat. De ndaq Majleij:“Mwngz dwg duzma, mwngz mbouj dwg bouxvunz!” Riengzlaeng doq buet hwnj aen banci bae ranz lo.

Sizyah dauq daengz ranz, ndoet mbouj roengz dungx, ninz mbouj ndaej ndaek.

Geij ngoenz le, boux cangh- ywdoihduz ndaw cin daeuj daengz ranz Sizyah hawj gyoengq bit dwk cimyifangz, de raen gij geiqhauh gwnz ndang bang bit neix le, couh cam guh gij geiqhauh guh maz, Sizyah gangj le, de youh cam:“Gyoengq bit neix dwg ciengx gaj gwn ma?” Sizyah ngauz- ngauz gyaeuj dap naeuz:“Gyoengq neix dwg bitgyaeq, ciengx guh ceh.”

“Ciengx guh ceh?” Boux cangh- ywdoihduz riu naeuz, “Dahnuengx, mwngz cij ciengx 10 duz bitmeh, ciengx duz bitboh ndeu couh gaeuq yungh lo, mbouj……”

Caengz gangj sat, Sizyah daj ndawranz aeu fag sauqbaet he coh de baet gvaqbae, sing hung hat:“Deuz, deuz, bouxsai sou couhdwg yiengh- neix, couh rox boux ndeu aeu lai boux yah……”

Boux canghywdoihduz mbouj rox gyawz gangj loeng, da daengx bak aj caez.