Youq mwh liggaeuq gyawj ndwencieng bi vaiz aenciet cienz- doengj Cunghvaz Minzcuz neix, Cunghgung Cunghyangh cungjsuhgi、Gozgyah cujsiz、Cunghyangh Ginh- veij cujsiz Siz Ginbingz bae daengz Gveicouh, camnai gak cuz ganbu ginzcung, gangj vah hohfuk daengx guek gak cuz lwgminz、gyoengq beixnuengx Yanghgangj Aumwnz Daizvanh caeuq beixnuengx youq rog guek, hoh daihgya ndang cangq youq onj、ndawranz vuenyungz、guh saeh baenz saeh、 bi vaiz cungj ndei! Hoh aen guekcoj hungmbwk raeuz bya heu raemx seuq、gizgiz hoenghhwd、mwnhoengh fouqgiengz!

2 nyied 3 hauh daengz 5 hauh, Siz Ginbingz miz Gveicouh Swngjveij suhgi Sinz Yizginz caeuq swngjcangj Lij Bingjginh buenx- riengz, gonqlaeng daengz Bizcez、Gveiyangz daengj dieg, bae daengz lajmbanj、segih、cauhsi daengj cazyawj, hawj gak cuz ganbu ginzcung roxdaengz Dangjcungh- yangh gvansim caeuq camnai gyoengqde.

3 hauh lajbyonghngoenz, Siz Ginbingz daengz Bizcez Si Genz- sih Yen Sinhyinz Myauzcuz Yangh Vavuh Cunh cazyawj. Youq ndaw ranz bouxmbanj Myauzcuz Cau Yiyoz, Siz Ginbingz sijsaeq yawj ndawranz rogranz, caeuq Cau Yiz- yoz cienz ranz guhdoih guh ceiz, caemhcaiq gangjgoj. Cau Yiyoz lwnh cungjsuhgi, gyoengqde bonjlaiz youq aen Mbanjmazvoh mbouj doeng raemx、mbouj doeng dienh、mbouj doeng roen de, seizneix youq ranzlaeuz song caengz, raemx dienh roen cungj doeng daengz ranz. Siz Ginbingz dingq le sim angq baenz- maz bae. De vixok, vunz miz hong guh dwg aen banhfap giekbonj gyamaenh gunggeng duetgungz baenzsaeh. Aeu gaenxmaenx hwngfat canjnieb lajmbanj, fuengbienh vunz- lai youq gyawj ranz guhhong, hawj vunzlai doz ndaej cienz, youh ndaej ganq ndawranz, son’gyauq ciengx- ganq lwgnyez ndaej ndei. De hohfuk Cau Yiyoz cienz ranz gvaq ndaej ngoenz beij ngoenz ndei.

Cieplaeng, Siz Ginbingz byaij haeuj ndaw cehgenh banggungz bae, yawj gij canjnieb dajsiuq Myauzcuz miz daegsaek de、gij minzcuz conzdungj vwnzva de hwngfat、ciepcienz ndaej baenzlawz yiengh. De vixok, doenghyiengh minzcuz caemh dwg doenghyiengh seiqgyaiq. Gij doenghyiengh dajsiuq Myauzcuz gaeuqgeq youh seizhwng, dwg vwnzva youh dwg canjnieb, mbouj- dan ndaej fatyiengz conzdungj vwnzva, vanzlij ndaej doinyoengx lajmbanj saenqhwng, yaek ciepcienz、hwngfat gij minzcuz conjdungj vwnzva baudaengz doenghyiengh dajsiuq Myauzcuz de ndaej ndei.

Youq gwnz vwnzva gvangj- cangz aen cunh neix, gyoengq beixnuengx mbanjranz nyaengq guh hozdung minzsuz ndwencieng, roq gyong、boq aenvenz, ciengq go diuq foux, ciengq go coux hek Myauzcuz. Raen cungjsuhgi daeuj daengz, gyoengqde caemh langh sing angq hemq“Cungjsuhgi ndei”. Siz Ginbingz naj riunyumnyum doiq gyoengq beixnuengx mbanjranz naeuz, bineix raeuz guh baenz saeh hungmbwk, couhdwg gizgiz cungj laebbaenz aenbiengz siujgangh、guhdaengz aen moegbiu buekguh daih’it aen bak bi. Cunghvaz Minzcuz caemh aen ranz hung ndeu, hajcib roek aen minzcuz hajcib roek duj va. Gizgiz cungj laebbaenz aenbiengz siujgangh, aen minzcuz lawz cungj noix mbouj ndaej; gizgiz cungj cauhlaeb sevei cujyi yendaiva, aen minzcuz lawz hix cungj noix mbouj ndaej. Duetgungz gvaqlaeng, aeu laebdaeb doinyoengx lajmbanj saenqhwng, doinyoengx nungzyez nungzcunh yendaiva lai vaiq. Maq- muengh gyoengq beixnuengx mbanj- ranz laebdaeb haenqrengz buekguh, hwngfat canjnieb lajmbanj ndaej lai ndei, cauhlaeb lajmbanj ndaej lai gyaeu. Mwh yaek doxbiek, gyoengq beixnuengx mbanjranz humx youq henz ndang Siz Ginbingz mbouj nyienh hawj de bae, doengzcaez ciengq go hen hek Myauzcuz, sing go yiengj gvaq gwnz Dahvuhgyangh nanznanz mbouj dingz.

Dingh Sezsiengz、Liuz Hwz、Cinz Hih、Hoz Lizfungh caeuq boux dungzci fucwz cunghyangh mizgven bumwnz de caemh riengz gaujcaz.

（ciuq Sinhvazse，doz/Lij Yozyinz）