Aen sibsug “venj daeng” dwg gij daiqbiuj vwnzva Maxgai, Liujgyangh dieg Maxgai youq haenx cungj riuzcienz miz gij fungsug neix. Gij yizsiz “venj daeng” itbuen cungj youq ndwencieng cocib daengz cib- ngux ndawde senj ngoenz ndeu ma guh. Bi neix ndaw gyog caemh singq haenx miz ranz lawz “demding”, ranz lawz couh yaek youq baihgwnz aending coengceiz venj aen daeng’va moq ngamq guh ndei ndeu. “Venj daeng” youh heuh “hwnj daeng”, youq Vahmaxgai ndawde “daeng” caeuq “ding” doeg doxdoengz. “Venj daeng” couh miz gij eiqsei “demding” lo. Gyoengq- vunz naeuz saeh ndei neix hawj cojgoeng rox, youh mbaenjgouz baujyou lwglan.

Gak dieg gak singq gyog Maxgai Liujgyangh banh aen ciet neix mbangj caemh ngoenz ndeu, mbangj cix mbouj doengz ngoenz. Gij bouhloh、banh ndaej hung roxnaeuz iq cungj gak miz mbouj doengz, mbangj haemq yawjnaek yizsiz, mbangj yawjnaek hozdung, mbangj cix dawz seizguh haeuj sim. Lumjbaenz Mbanjseiqlienz Ranzcwngh daj ciuhgeq couh yawjnaek foux, dawz yizsiz daeg- bied haeuj sim. Dawz daenggaeuq roengz seiz caenh hawj diuz faexsaux ndeu, boux dawz daeng- gaeuq roengz haenx yaek aeu naemj baenzlawz benz hwnj gwnz faexsaux bae dawz aendaeng venj youq baihgwnz dingjranz roengz- ma. Aen daeng’va yizsiz “venj daeng” yungh haenx faen miz song caengz, goetgangq aeu diuzduk ma san baenz, caiq aeu ceij biuj hwnjbae; baihndaw guh lumj yiengh daenggung, ndaw daeng baihlaj cuengq miz aen vanj iq ndeu, louz ma coux youzhom; baihrog daeng’va cix biuj miz ceijsaek, ndang daeng vamoq venj dwk rim bae; baihlaj daeng lij venj le gaem doxgaiq ndeu, baez sijsaeq yawj, dwg nye faexcoengz ndeu、gaem coeng ndeu、gaem suenq ndeu、ngeuq rinmaxluenx aeu ceijnding duk hwnjdaeuj ndeu.

Liuz Suihungz dwg boux- ciepcienz Liujcouh “venj daeng- va Maxgai” feihyiz hanghmoeg. Daj bi 1982 doxdaeuj, Liuz Biz- yih coengceiz laeng Liujgyangh Cindwz Cin Gihlungz Cunh Mbanjlaj, 30 bi neix cungj dwg venj gij daeng’va de gag guh. Liuz Bizyih coengceiz dwg ngoenz ndwencieng cibsam venj daeng. Ngoenzde banringzgvaq, vunz- mbanj couh coux samseng、bauq- rengh、yieng、lab daengj haeuj lamz bae coengceiz dajcaeq. Gij yizsiz “venj daeng” mbouj miz geijlai, hoeng cix gig angqyangz gig nauhyied. Gak ranz gak hoh sien siuyieng diemj lab baij samseng daengj huqbuiz caeq cojcoeng gonq, doeklaeng couh dawz aen daenggaeuq roengzmaz. Ciengj vadaeng dwg seiz hoengh aen hozdung “venj daeng”, couhdwg vunzlai doxciengj mbaet aeu gij vaceij gwnz daenggaeuq. Aenvih Vunzmaxgai nyinhnaeuz ciengj lai ndaej lai dangq naeuz lwg lai fuk lai. Baez venj daeng, daeng’va deng rag hwnjdaeuj, vunzmbanj cungj sim’angq dangqmaz, foenxfoenx humx gvaqbae doxciengj lumhlax daengmoq. Bouxcoz cix cit bauq, sing bauq youq lajmbanj dinghrik haenx yiengj dwk goksatsat. Doengxhaemh, doenghgij ranz- demding lij aeu dauq bae coengceiz “raeuj daeng”, raek bingjdangz、mak daengj huqbuiz bae buiz cojgoeng. Gyongqvunz cix foenxfoenx bae cam aeu di huqbuiz, nemnem gij fukheiq cawjgya.

Ciuhdaih doxcienz caeuq hwngfat le 200 lai bi, venj daeng’va Maxgai Liujgyangh seizneix gaenq bienqbaenz cungj minzsug vwnzva Maxgai daegbied ndeu. Yienznaeuz neix dwg ciepcienz le gij fungsug ciuhgeq, hoeng cix dak miz gij maqmuengh daengx ranz vuenyungz、sengfat majhung gyoengqvunz.