Gou cingq naengh youq henz dennauj, roengzsim dwk cih raiz faenzcieng, aen veihsin soujgih sawq- mwh yiengjdit, gou dingz fwngz gaem soujgih ma yawj, yienzlaiz dwg boux canyouj dangbing gou fat vah cam:“Laux canyouj, haeujdoeng lo, siengj gwn dangznding lwi? Siengj gwn couh dingh cawx. Aen mbanj Fuliengz yaek gauj oij cienq dangz lo.” Yawjraen “dangznding” song cih saw neix, gou doq lumjbaenz mup ndaej raq heiq dangznding homfwdfwd he, ngah dwk byailinx iemq raemx raeuzredred, gou nyaenx mbouj ndaej dajbak cupcup.

Gou ngah dangznding, dwg daj iq geiq roengzdaeuj. Youq seiz gou doeg siujyoz, swnghcanjdui moix bi cungj gauj oij cienq dangz. Bi daengz haeujdoeng, couhdwg seiz gauj oij nyaengqnyinyi. Seizhaenx, vunzlaux nyaengq, lwgnyez hix nyaengq. Vunz- laux nyaengq raemj oij、 daeh oij、nienj oij、cienq dangz. Lwgnyez ni, nyaengq guhcaemz, nyaengq gwn dangzniu. Mbouj lumj seizneix, gwn dangz dwg gwn ngah bak, seizhaenx, gwn dangz ndaej demh dungxiek. Doengh bi haenx, haeux noix gwn mbouj imq, buhvaq youh mbang, baez dungxiek, nit dwk ndang saenz- dwddwd, gwn di dangz roengz dungx, daegbied dwg gwn dangznding, ceiq ndaej raeuj ndang. Ndigah, yawj gauj oij, ndaej gwn dangznding, youh ndaej guhcaemz, baenzlawz mbouj sim- angq?

Cuengqhag le, dou geij boux doengzhag doxiu bae yawj gauj oij. Daeuj daengz henz reih, gaenq raen vunzhung dap ndei aen gyaqgaujoij.

Aen gyaqgaujoij aeu song ngauq faexgyaengh guh gyaq, caemhcaiq haem roengz ndaw namh laeglaeg bae, cungqgyang doxbe cang miz song aen nienjfaex, aennienj hung lumj aen gangraemx, youh ndongj youh net. Yienzhaeuh daj diuzsug doxriengh song aen nienjfaex haenx, yien song diuz cagraez okdaeuj, heuxdawz ekvaiz, caiq daep ekvaiz roengz hozlaeng duzvaiz bae. Baez hat sing, duzvaiz couh heux aen gyaqgaujoij baenqbangh byaij. Duzvaiz baez byaij, song aen nienjfaex hix riengz baenqngednged. Boux vunz fucwz cuengq oij haenx, ndwn youq bangxhenz, dawz gooij cug diuz cug oet haeuj cungqgyang song aen nienjfaex bae. Song aen nienjfaex doq nap bej diuzoij doq sup doxhaeuj, nyaqoij daj lingh mbiengj haiz okdaeuj, raemxoij hix doengzseiz laecemcem coq roengz doengj bae. Deq doengj rim le, couh riuj bae raix roengz aen rek gwnz cauq. Laj rek coemh feiz foengxfofo, mbouj geij nanz, gij raemxoij ndaw rek couh goenjcancan. Goengsae capmax ndwn youq henz rek, song fwngz gaem maenh gaiqleq, haenqrengz hoedndau, mbouj hawj raemxdangz caem rek dawz remj. Bouh cienq dangz neix, ceiq raen gij goengfou goengsae lo. Raemxdangz mbouj gwd mbouj cuk, dangznding cij ndaej baenz sa, saekdangz cij bienq henjgim, guh ok gij dangznding haenx, cij baenz hom diemz habsik.

Gij lwgnyez dou mbouj rox gijneix, hix mbouj botyak gijneix. Dou caenh rox, daengz baez cienq dangz, dou couh miz hong guh lo. Bouxboux ndaw fwngz gam diuz dukraez he, byaiduk con duz daek roxnaeuz dug byaek he, deq youq henz rek, yawjraen raemxdangz baenz byouz, couh dawz diuzduk caemj roengz rekdangz, baez log couh diem hwnjdaeuj, gaenj- rienrien aj bak doq byoq doq iet linx rizledled. Va, youh rang youh diemz, dauqcawq dingqnyi gij sing dajbak cupcup. Gwn sat youh log, log le youh gwn, caengz gwn gaeuq, raemxdangz gaenq gwd baenz niunwgnwg, caiq log mbouj roengzbae lo. Goengsae couh doq boenq dou veqdeuz, doq daek dangzniu raix roengz aen vuenqfaex bae. Raix sat, youh aeu leq bued bingz. Langh caep le caiq aeu cax gat baenz gaiq lumj gaiq cien nei. Cawz le louz di he faen gwn, gizyawz cungj aeu mbawoij duk ndei, gai bae vuenh cienz cawx haeuxceh. Aenvih swnghcanjdui bibi haeux mbouj gaeuq gwn, bae gyawz lw haeuxceh dem.

Yawj gij vah canyouj, gou youh ngeix daengz gij saeh song ndwen gonq. Ngoenz gouj nyied cogouj, gou ma ranz gvaq ciet, naengh ci ok ndoi bae sauqmoh cojgeq. Itloh yawjraen reihnaz gvangqmbiengmbieng. Cingq dwg cib nyied seiz dajsou, haeuxriengz henjrwgrwg, lwggyoij duengqroem- roem, haeuxyangz baenz fak baenz fak mbotlulu, makgam lai lumj ndaundeiq naep rim gwnz nye. Youq gij doenghgo ndaw reihnaz neix, ceiq hawj gou dawzyinx sisi haenx, dwg gooij. Langhda muengh bae, baenz benq baenz manj, heuswdswd, youq baihlaj nditndat, rumzcou cififi, mbawoij lumj raemxlangh nei doenghrubrub, aensim gou hix riengz mbawoij diuqbubub. Yawj, diuzoij sohrangrang, daengj- vidvid, diuzdiuz mbotlulu. Caen siengj raemj diuz he ma gaet gwn gaij hozngah. Gou cam:“Gij oij neix caen baenz, seizlawz ndaej sou la?” Daeglwg dangzgo han naeuz:“Vaiq lo, haeujdoeng couh sou.” Gou youh cam:“Oij sou le, dawz bae gyawz gauj ha?” “Daxau, mwngz okrog bae nanz lo, mbouj rox gij hong lajmbanj lo.” Daeglwg dangzgo riu naeuz, “Laj- mbanj gaenq mbouj gauj oij lo, cienzbouh gai hawj dangzcangj.”

Gou biekliz mbanjranz geijcib bi lo, yienznaeuz gek geij bi hix dauqma byaijyawj, hoeng, aenvih gou youq ndaw singz naebsim gij hong swhgeij, mbouj miz sim bae haemqheq gij saeh lajmbanj, ndigah, doiq lajmbanj cungj bienq najseng liux. Gyoengq beix- nuengx lwnh gou nyi, daj aen sigij gonq 80 nienzdaih hainduj, lajmbanj couh dawz ndaem oij dangguh cungj monzloh cauh cienz ndeu. Nungzminz bau ndaem oj, dangzcangj bau sou oij. Dangzcangj dwg guekgya cauhbanh, fucwz gauj oij caemhcaiq guh baenz begdangz gai bae canh cienz. Yiengh- neix, nungzminz caenh roengzrengz ndaem oij couh ndaej, mbouj caiq feiq rengz bae gag gauj oij, yousim gai dangz gai mbouj gat. Baengh ndaem oij, gyoengq beixnuengx lajmbanj ciemh ngoenz ciemh duetgungz, ciemh ngoenz ciemh baenzfouq. Baezgonq gauj oij gai dangz vuenh cienz cawx haeux, seizneix gai oij canh cienz hwnq ranzlaeuz. 10 bi gonq, gou ma mbanjranz, raen ranzcien yied daeuj yied lai, baezneix ma mbanjranz sauqmoh, youh raen ranzcien bienq ranzlaeuz moqsaksak. Gyoengqvunz heuh gij ranzlaeuz neix guh “laeuzoij”. Aenvih gij cienz hwnq laeuz cungj dwg cienz gai oij ndaej daeuj.

Seizneix, nungzminz miz lai cungj roenloh ra cienz lo, hoeng, ndaem oij lij dwg diuz loh ndaej cienz ceiq maenh. Ndaem oij canh cienz le, gyoengq nungzminz youh douzswh bae guh gijwnq, miz ranz ciengx gaeq, miz ranz ciengx yiengz, miz ranz ndaem makngaiz, miz ranz ndaem makgam. Ranzranz cungj ra raen gij roenloh cauh cienz moq. Bouxfouq ciemh daeuj ciemh lai, miz geij hoh daengx ranz beuj bae ndaw singz cawx ranz youq, miz mbangj hoh lwgnyez youq ndaw singz guhhong cawx ranz, vunzlaux haengjheiq bae riengz lwg youq saek duenh, niemhgyaez mbanj- ranz youh ma ra lauxdoengz cejgoj. Ceiq hawj gou doeksaet dwg, miz mbangj hauxseng lij ndaej cawx ciiq, haififi haeujok luengqmbanj, vifung dangqmaz, caeuq vunz ndaw singz ca mbouj geijlai lo. Gou vih gyoengqde simsoeng, Geijcib bi gonq, byawz ndaej liuh daengz, gooij bienqbaenz yienghneix dijbauj. Gou yied ngonz reih’oij yied roxnyinh gooij dwggyaez.

Raen oij niemh daengz dangz, niemh dangz couh bakngah. Hojsik seizneix caiq ra mbouj raen gij dangznding aeu fapdoj guh lo. Cixbah, seizneix swdungva gauj oij, maz dangz mbouj miz, ngah gwn couh cawx. Gou cix mbouj daih dawzhaeujrwz baenz- raeuh, dauqma ndaw singz couh lumzlag gij saeh neix.

Siengj mbouj daengz, seizneix lij miz vunz guh gij hong fapdoj gauj oij, gou roxnyinh gig caenciet.

Canyouj dwen daengz aenmbanj gauj oij cienq dangz haenx, heuhguh Mbanjfuliengz, youq baihsaenamz Vujmingz Yen Fujcwngz Cin, liz Hawfouj miz 4 goengleix gyae. Dingq- nyi naeuz, geij bi daeuj, aen mbanj neix baengh gij dangznding fapdoj, okmingz cienzgyae. Daegbied dwg 2018 nienz bauq ndaej Nanzningz Si si gaep feihvuzciz vwnzva yizcanj mingzloeg le, gij dangznding aeu fapdoj guh neix engq hawj lajmbwn rox doh. Seizneix gaenq baenz mingzbaiz lo.

Gou miz di ngeizvaeg, gij dangznding aen mbanj neix caen dwg aeu gij fapdoj cienq baenz ha? “Mbouj saenq? Mwngz hwnj muengx bae cazyawj, miz geijlai bauqnaeuz gyoengqde, miz doz miz caen vunz.” Canyouj gou youq ndaw veihsin naeuz.

Dahraix, gij dangznding Mbanj- fuliengz cingqhuq aeu fapdoj guh- baenz. Dangyienz, gij guhfap haenx miz haujlai gaijcaenh. Lumjbaenz, nienjfaex vuenh baenz nienjdiet; yungh gihgi baenq nienj, beij aeu vaiz rag nienj riengj geijlai boix. Aen rek cienq dangz caiq mbouj dwg aen dog, cix dwg haj roek aen doxyiengh baenz roix. Gij yienghceij dangznding hix lai cungj lai yiengh, mbouj caiq gat baenz gaiqcien dog, lij guh baenz yiengh- guenq, yienghvanj. Miz fueng miz luenz, miz raez miz dinj. Hoeng, aeu rekdiet cienq dangz, gij conzdungj neix mbouj bienq; aeu goengrengz hoedndau, aeu gwn haemz gaenx guh, gij hoenz vunz neix mbouj bienq.

Cingqdwg baengh gij cingsaenz neix, dangznding aeu fapdoj guh cij bienqbaenz diuz loh duetgungz baenz- fouq ndeu.