Siu Cuh goemq bak riuhihi, gij yiengh de riu youq ndaw da Lungz Byauh, caen ndeiyawj, mbouj miz maz beij ndaej hwnj.

“Menhmenh gwn! Yawj gij yiengh mwngz gwn doxgaiq neix——”

“Gou lau mwngz dungx iek deq gou nanz lai.”

“Gou mbouj iek.”

“Aen ceiz ndeigwn o.”

“Duh gou guh hane.”

“Gvaiq mbouj ndaej.”

“Lai gwn di, noix gangjvah.”

“Ndawranz mwngz miz geij boux vunz?”

“4 boux.”

“Daxboh?”

“W.”

“Daxmeh?”

“W.”

“Lij miz daegnuengx ndeu dem?”

“Mwngz caen ngah dajdingq gij saeh ranz bouxwnq. Mbouj lwnh hawj mwngz.”

“Sai le geijlai rengz bwh gij haeux byaek neix ha!”

“Lij miz byalwg dem, daxboh gou haemhlwenz daj ndaw dah dwk hwnjdaeuj ne, daxmeh gou haetneix ngamq cawj hawj gou hane.”

“Ndeigwn! Ndeigwn!”

“Ndeigwn couh gwn liux bae ba.”

“Ndei lo, hawj mwngz gwn!”

“Lij caengz gwn bae dingz ndeu, caiq gwn di.”

“Imq lo.”

“Mbouj baenz, caiq gwn 10 gaemz.”

“Ndei ba!”

“Caiq gwn duz byalwg dem.”

“Yienghneix mwngz gwn maz ne?”

“Ndaw ranz gou ngoenzngoenz miz bya gwn.”

Lungz Byauh mbouj ndei caiq doi lo, de youq ranz gwn mbouj roengz haeux byaek, youq gwnz bya cix gwn ndaej imq cungj mbouj roxnyinh, sam gaemz song ndwnj, gijgwn ndaw doengjfaex iq cij lw dingz ndwi lo.

(caengz sat)