Bouxcuengh Swcigih,

Daengz ngoenzneix,

Mbouj dwg nuengx couh beix,

Minzcuz doxgiet ndei,

Van fouzbeij,

Lumj feiz raeuj doxdoengz.

Minzcuz doxgiet ndei,

Lumj seizcin,

Va caeuq ngeiq caez mwn,

Haj roek duj cienz hoengz,

Cungj doxdoengz,

Baengh daengngoenz ndaej maj.

Doenghbaez raeuz caezgya,

Youq gwnz bya,

Goemq rum haz guh vax,

Moix mbat roengz fwnraq,

Rumz hung gvaq,

Gwnz mbin laj ciengx bya.

Dangj hwnj guh fuzbinz,

Raeuj aensim,

Hawj ngaenz guh laeuz moq,

Bouxlaux caeuq bouxcoz,

Caez ciuqgoq,

Ndwenngoenz guh ndaej hwnj.

Ranzlaeuz ronghdangdang,

Hwnj rim mbanj,

Lai sang gvaq fwjndaem,

Ndaundeiq youq gwnzmbwn,

Daj gyae raen,

Daengz haemh aeu daeng yawj.

Doenghbaez ndaw mbanj gou,

Youq ndaw bya,

Hai dou byacapcap,

Langh bae haw saek mbat,

Caen fouzfap,

Daemx dat youh bungq oen.

Gungcanjdangj caen guh,

Hawj bouxhoj,

Guh loh daengz bakdou,

Diuzdiuz gvangq youh soh,

Ronghyouyou,

Doeng seiq fueng bet baih.

Minzcuz doxgiet ndei,

Daengz seizneix,

Beij feiz lij lai raeuj,

Gwn daenj mbouj aeu you,

Saedceij raeuz,

Beij laeuj lij lai rang.

Minzcuz doxgiet ndei,

Caez ciuqgoq,

Miz laeuj noh caez gwn,

Doxgiet it diuz sim,

Bengz lumj gim,

Fwngz camx rin hix byoengq.

Doenghbaez raeuz minzcuz,

Caen gungzhoj,

Byaij loh lau raen vunz,

Seizneix raeuz miz gwn,

Angq hwnj mbwn,

Sing riu lumj byajraez.

Raeuz siujsoq minzcuz,

Vunzvunz rox,

Swnghoh ndaej daezsang,

Lumj bakmbanj gorangz,

Gogo cangq,

Hoh lai sang gvaq hoh.

Minzcuz doxgiet ndei,

Ndei fouzbeij,

Bibi meiz(miz) cinbu,

Guhhong mbouj byaij loh,

Naengh mohdoz,

Soh hai daengz henz naz.

Seizneix youq ranz mbwq,

Ok bakdou,

Bouxboux ndaej naengh ci,

Langh siengj naengh feihgih,

Hix yungzheih,

Mbouj lau mbouj meiz(miz) cienz.

Daxbuz caeuq daxgoeng,

Caen vuenyungz,

Mbouj haeuj ndoeng dwk danq,

Diuqfoux ma daengz ranz,

Riengz lwglan,

Naengh ranzding guh’angq.

Minzcuz doxgiet ndei,

Bi beij bei(bi),

Doxcaux meiz(miz) cinbu,

Batgak ndaem gwnz fwj,

Rangfwfw,

Mbin doh daengz lajmbwn.

Minzcuz caez doengzsim,

Youq geh rin,

Ndaem rim golwgfog,

Gai bae daengz guek rog,

Seiz caen hob,

Ngaenz baenz rop dawz ma.

Gwnz bya ndaem lwgmak,

Youq bangxdat,

Ciengx rwi gag miz lai,

Mboujlwnh mbwk naeuz sai,

Gaenx lumj rwi,

Ndwenngoenz diemz gvaq dangz.

Minzcuz caez doxgap,

Miz banhfap,

Cauxmoq gag miz lai,

Ciengx vaiz yiengz bae gai,

Ndaej ngaenz lai,

Ciengx cwz vaiz gai cij.

Dangj minzcuz cwngcwz,

Hawj bouxhoj,

Hai diuz loh ndaej gim,

Doxgiet caemh aensim,

Ndongj gvaq rin,

Cij dwg aen dijbauj.

Hajcib roek minzcuz,

Va hai duj,

Dujduj hai lwenqda,

Caez caeuq ngeiq caemh nga,

Youq baihlaj,

Gyazgyaz caez caemh rag.

Rag cap youq ndawnamh,

Daemq naeuz sang,

Namh dwg namh guekgya,

Baengh dangj baengh guekgya,

Dujduj va,

Gyaz beij gyaz hoengzmoq.

Gwn raemx mbouj lumz mboq,

Laux caeuq coz,

Byaij loh mbouj lumz haiz,

Doxgiet riengz dangj byaij,

Cien fanh daih,

Bouxboux lai gyaez guek.

Vih guekgya giengzdaih,

Riengz dangj byaij,

Lwgminz lai fouqmiz,

Byacax hix aeu bae,

Mbouj aeu lau,

Haijfeiz hix gamj diuq.

Vih saedyienh aen moengh,

Cienz guek vunz,

Caezsim roengz goengfou,

Gak minzcuz beixnuengx,

Fanh daih aeu,

Doxhuz caeuq doxgiet.