●1 nyied 28 hauh, ciuq aenhoih lwnh saehmoq youz Swcigih Cwngfuj Sinhvwnzban gawjhengz de ok siusik, bi neix Gvangjsih dajsuenq guh 107 yiengh gaijgwz.

（Couh Goh）

●1 nyied 28 hauh, ciuq aenhoih sibinz hong gyaudoeng daehyinh daengx gih de ok siusik, bi’gvaq Gvangjsih gungh roengz 1780 ik maenz guh cunghab gyauhdungh guding swhcanj douzswh, beij bi’gyai caemh duenh gyalai 34.7%. Ndawde roengz cienz- ngaenz guh goengloh baez daih’it mauhgvaq 1000 ik maenz, gungh roengz 1334.2 ik maenz, beij bi’gyai caemh duenh gyalai 35.7%； roengz 92.9 ik maenz guh gwnz raemx daehyinh, beij bi’gyai caemh duenh gyalai 54.5%.

（Vuz Libingz）

●1 nyied 27 hauh, Binhyangz Yen doenghhong guh 10 aen hanghmoeg, gungh roengz ngaenz mauhgvaq 4 ik maenz, nangqdaengz aen hanghmoeg sienqnga guenjvangj heiqdenhyenzgi Gvangjsih、hwnqguh aen hanghmoeg Cwngzveij Muzyez dajciengx mouseng daengj.

（Youz Ginjveij）

●Ciuq Bujbwz Yen Caizcwnggiz ok siusik, bi’gvaq, aen yienh neix aeu ndaej 435 aen hanghmoeg“it saeh it yaeng”guh hongsaeh ikleih lajmbanj, baudaengz roensuijniz doeng mbanj、giekroen roennamhsa、ciengz dangj namh、giuzcangz daengj, gungh roengz 3672.53 fanh maenz, nangqdaengz 2959.54 fanh cienzngaenz caizcwng ciengjbouj, baudaengz 251 aen cunhveij 1970 aen mbanj, 34.45 fanh vunz ndaejleih.

（Banh Yinzfungh）