Boh: (gag damz naeuz) Yi, neix dwg maz doxgaiq ni?

(Yiengh doxgaiq fouz gwnz raemx yied daeuj yied gyawj, dwg mbaw ronggya hung ndeu, Boh goemz hwet iet fwngz bae riuj aeu mbaw ronggya, gwnz ronggya miz 3 diuz yieng, geu bwngaeq ndeu, ngeih samcib naed doengzcienz. De dinghdingh cimyawj gij doxgaiq dijbauj ndaw fwngz, ndawsim angqfwngfwng, da laepnwnq mbouj guhsing, gag ngeixloekloek. Sawqmwh, gwnzmbwn sing byajraez yiengjhumhum.)

Boh: O! Gou rox baenzlawz guh lo!

Mehmbwn hai lwgda,

Ronggya soengq cienz daeuj,

Aeu bwngaeq dawzsouj,

Hen gohaeux gomiuz.

(Boh sikhaek gvih roengz gwnzdeih, song fajfwngz doxnem, goemzbaiq gwnzmbwn.)

Baihrog eu:

Ndwenloeg mbouj miz gwn,

Mehmbwn soengq cienz daeuj,

Fuengz gohaeux deng cai,

Mehmbwn son raeuz gvai,

Naz byai cang “duzromh”,

Bae hen homh dajdawz.

——ronghdaeng ciemhciemh laep

[Muq Daihsam]

(Gij naz caengz ndaej gonz. Naz seiqhenz cungj hoij miz haujlai “duz romh”. Boh daeuj daengz henz naz, de gyaeuj daenj gyaep, ndang bax luiq, fwngz dawz diuz faexsaux raez ndeu, gwnz faexsaux hoij miz geij “duz romh” aeu ronggya、bwngaeq caeuq yieng guh baenz. Giz mbouj gyae haenx miz sing roeg heuh cici cetcet.)

Boh: (daeuq roeg) Daeuj vei! Miz mbei couh daeuj vei! Guh lawz mbouj gamj daeuj la? Daeuj vei! Daeuj vei……

Boh: (lumhlumh “duz romh” hoij henz naz)

Duz romh doenghduz ak,

Mbinyagyag gyang mbwn,

Ngoenz ndit rox ngoenz fwn,

Lawh vunz dawz nazhaeux.

(Boh youh dem hoij le song “duzromh”. Lij youq gwnz baihlaeng de cap hwnj 3 diuz yieng, aeu lwggvaek gvaek feiz diemj yieng.)

Roeg lau raen “duzromh”,

Nou lau rongh feizyieng,

Mbouj gamj caiq iucieng,

Ram rieng ndoj caemrwd.

Baihrog eu:

Duz neix “duzromh” saenz,

Ndaej laengz nou laengz roeg,

Daj mbwn doek roengzma,

Yiengh vifung dangqmaz,

Hen naz bauj loekcak,

Gaiq neix ak lailai.

——ronghdaeng ciemhciemh laep

[Muq Daihseiq]

Ndawranz

(3 beixnuengx doxcanj dawz geij “duzromh” Boh ngamq guh baenz haenx daeuj cugcag buet guhcaemz, bouxboux faengz ndaej sim angq- fwngfwng. Boh hix gaem cag rag duz ndeu, caeuq geij boux lwg caemh guh’angq.)

Daih:

Gaiq neix dajdawz baenz,

Guhcaemz mbouj fuengbienh,

Langh gaij lumj lwgyienq(lwgyienh),

Gij yiengh aiq lai ndei.

Boh: O, deng deng deng. Hoeng……

Mwngz yaek gaij couh gaij,

Doxgaiq gaeuq mbouj gveng,

Bwngaeq doengzcienz yieng,

Yungh caezcienz cij ndaej.

(Boh caeuq 3 daeglwg doengh fwngz gaijcauh “duzromh”, yaep ndeu couh gaij guh ok yiengh moq daeuj.)

Daih:

Aen luenz lumj lwggiuz,

Bwngaeq iu baenz romh,

Boh:

Baeuh couh lumj aendomq,

Rongh feizyieng riengz mbin.

Hahaha! Baenz lo! Aen neix couh heuhguh giuzfeizyieng ba.

Daih: Ndei ha! Giuzfeizyieng! Giuzfeizyieng!

(Bouxboux angqvauvau, doxcanj yungh fwngz bae bau dwk giuzfeizyieng, guhcaemz haeujyinx bae. Lienz Meh hix nyaenx mbouj ndaej caemh okdaeuj dwk giuzfeizyieng.)

Boh: (heuh lwg) Daegngeih Daegsam, sou nem daxmeh sou caemz gonq, gou caeuq Daegdaih lienh goengfou gonq. Caiq gvaq buenq ndwen, vujgij gaujsi couh hai gauj lo, dou song bohlwg yaek bae ganjgauj, gauj aeu goengmingz dauqma ronghnaj cojcoeng.

(Boh caeuq Daih boux ndeu dawz fag cax hung, boux ndeu riuj ndaek sujrin lienh gen, foux goengfou hwnjdaeuj.)

Baihrog eu:

“Duzromh” henz naz souj,

Mbaekmbaek haeux ndaej baenz,

Raeuz biek haemz biek hoj,

Doxcanj dwkgiuz hoh,

Ngoenz moq van lumj diengz,

Giuzfeizyieng guh’angq.

——ronghdaeng ciemhciemh laep

[Muq Daihhaj]

(Aen ranz Banh Yenzduh. Song mbiengj henz gvaengh dou nem fouq doiq hung ndingfwgfwg ndeu——“Song roeg caez mbin hoj raen daengz, Bohlwg caemh buengj caengz miz gvaq”, vengzngeg dwg “cungqgawj”.

(Boh caeuq Daih daenj buhhak naengh youq gyang ding ndawranz yaeng saeh. Baihrog, sing bejlez、sing gyonglaz、sing angqhoh doxgyonj yiengjsumsum.)

Boh:

Ngoenzneix ndit lai rongh,

Ciuq rim hongh rim ranz,

Bohlwg naengh giuh ram,

Angqyangz ndaej cungqgawj.

Daih:

Gyoengq beixnuengx couh gangj,

Gyoengq vunzmbanj couh naeuz,

Giuzfeizyieng yiengh gyaeu,

Daiq hawj raeuz fukheiq.

Boh:

Neix hab mbaiq mehmbwn,

Bang vunz naemj ciekeiq,

Hix mbaiq goeng dojdeih,

Hoh raeuz ndaej miz gwn.

Daih:

Baengh miz gwn miz daenj,

Ndaej haenq lienh goengfou,

Gyo nazhaeux baenz sou,

Ndaej bae gouz caizhag.

Boh:

Raeuz miz giuzfeizyieng,

Gaiq gitsiengz baujyouh,

Guh yienghyiengh couh caeuh,

Byaij bouhbouh couh baenz.

Daih: Daxboh ha——

Bineix caijsoq ndei,

Raeuz ndaej caez cungqgawj,

Hixnaengz nda guhcawj,

Hawj vunzlai dwk giuz.

Boh: W, baenz.

Saehndei doengzcaez angq,

Daengx mbanj daeuj caemh faengz,

Vunzrog cungj hozhaenz,

Mbanj raeuz baenz lai raeuh.

Laengmuq sing vunzlai:

Gyoengq dou ngamq daeuj laeuh,

Daeuj ndaej cingq ngamj seiz,

Ranz neix ranz vunz ndei,

Bohlwg caez cungqgawj!

(Baenz buek vunzmbanj daenj buh moq vaq moq daj laengmuq okdaeuj, daihgya doxcanj dwk giuzfeizyieng, lij miz foux goengfou、foux saeceij, nauhyied raixcaix.)

Baihrog eu:

Miuzmiuz haeux demsou,

Ranzranz mou dem maj,

Doxdax giuzfeizyieng,

Lumj gvaq ciet gvaq cieng,

Daengx biengz caez angqhoh,

Ngoenz hoj bienq ngoenz miz.

——roengzmuq

（sat）