Bouxyauz laeng Lungzswng Gak Cuz Swciyen cungj dwg youq ndaw lueg gwnz bya lai, ndoengfaex ndaetfwdfwd, ciengzseiz mokfoenfoen, cojcoeng gyoengqde couh ra ywdoj goen raemxyw ma swiqndang, nyinh- naeuz yienghneix ndaej cawzsiu nitcaep、fuengzre fungheiq、hawj nyinzmeg ndaej doeng、hawj ndangdaej engq cangqmaengh, nanz le couh bienqbaenz aen sibsug raemxyw swiqndang Yauzcuz ndeu. Bi 2012, fap raemxyw swiqndang Yauzcuz Lungzswng ndaej senj haeuj buek daihseiq swcigih gaep feihvuzciz vwnzva yizcanj mingzloeg.

Gij yw raemxyw swiqndang Yauzcuz yungh haenx cungj dwg dieg lawz miz go maz couh yungh go maz. Gyoengqde baeznaengz ndaej hoengq couh ra yw ma cuengq, miz seiz dwg youq baihnaj ranz roxnaeuz baihlaeng ranz mbaet doenghgo cwx haenx, miz seiz cix daj ndaw suen mbaet aeu. Itbuen cungj ciuq go lawz yw maz ma doxboiq, mbouj miz danyw dinghmaenh haenx. Yaek aeu go lawz, aeu geijlai cungj yw, cungj dwg ciuq gij gvenq caeuq gingniemh gyoengqde, noix hix geijcib cungj, lai cix bak cungj doxbae. Gij yungh- cawq raemxyw swiqndang daihgaiq ndaej faen guh seiq cungj: Fuengzre bingh、yw fungheiq、mekmbwk seng lwg、yw sieng. Lumjbaenz raemxyw swiqndang doengjbangz Yauzbuenz, gij yw noix cix yungh baenz caet betcib cungj, lai cix sam bak lai cungj. Cau Cunhlinz miz 40 lai bi lo, de dwg raemxyw swiqndang ndaw ranz daih daihsam boux- ciepcienz haenx. Gij danyw daj ciuhgeq cienz daeuj gungh miz 70 lai cungj yw, yaek ra caez aeu ra baenz sam daengz seiq ngoenz. Mbangj cungj yw caenh rox gij coh Vahyauz mbouj rox gij coh Vahgun, ndigah de couh yaek gag hwnj ndoi bae ra yw.

Bouxyauz lij gvenq youq seiz gvaq ciet aeu raemxyw ma swiqndang. Lumjbaenz haemhndaep、ndwencieng coit caeuq co- ngeih gyanghaemh, daengx ranz cungj yaek aeu raemxyw swiqndang ma fuengzre bingh. Ciuq gij baizban ndaw ranz daj bouxlaux daengz bouxiq doxlwnz roengz doengj raemxyw bae cimq, moix vunz haemh ndeu aeu cimq 10 daengz 20 faencung. Yauzva Lungswng lij youq ngoenz liggaeuq ndwenngux co’ngux hwnj gwnz ndoi bae ra “yw bak nywj”. Gij ywdoj “yw bak nywj” cungj dwg aeu nge caeuq mbaw lai, mbangj cix yungh naeng、dujva、lwgmak roxnaeuz rag goenq. Lumjbaenz gorenh aeu naeng, gohaz vat rag, vagimngaenz mbaet va, makleizgaeq yungh lwgmak daengj. “Yw bak nywj” yaek aeu gyanghaet bae ra, aenvih vunzlai nyinhnaeuz haenx dwg ngoenz ndeu ceiq ndei haenx, seizde ra yw ma goen raemx swiqndang ndaej yw bingh, hawj ndangdaej cangqmaengh. Gyoengqvunz ra ndaej ywdoj ma le, couh swiq ndei langh raemx sak. Banhaemh, ndaw ranz boux ceiq laux、ndang cangq ndeu couh dawz ywdoj raemj guh baenz mbaenq baenz mbaenq aiq sam conq raez yienghneix, cuengq haeuj ndaw rek hung bae, dwk raemxsaw roengzbae goen. Aiq goenj baenz cibhaj faencung baedauq couh lauz gij nyaqyw hwnjdaeuj, dwk di gyu roxnaeuz mbouj dwk cungj ndaej. Deq raemxyw langh dwk habngamj swiq le, couh daj bouxgeq lwnz daengz bouxiq, gag daek raemxyw bae swiqndang.

Gyawj geij bi neix daeuj, Lungzswng haenqguh aen canjnieb minzcuz daegsaek, nyenggonz haifat gij yw cienzdoengj Yauzcuz; guh dieg ungmiuz, lai ndaem Ywyauz; laebbaenz nungzminz hozcozse raemxyw swiqndang Yauzcuz daengj, vih gyoengq beixnuengx Yauzcuz haivat diuz roen baenzmiz ndeu.