Vunz Ndaw Heiq:

Daxboh, 41 bi, baihlaj heuhguh “Boh”

Daxmeh, 40 bi, baihlaj heuhguh “Meh”

Daegdaih, 18 bi, baihlaj heuhguh “Daih”

Daegngeih, 15 bi, baihlaj heuhguh “Ngeih”

Daegniq, bi ndeu, baihlaj heuhguh “Niq”

Gyoengq vunzmbanj

Vah baihrog: “Seiqgyaiq mbiengj baihdoeng, Cojcoeng raeuz cap youq, Aen guek vwnzmingz gaeuq, Dajndaem caeux gvaq biengz.” “Diegcuengh caux naz gonq, Fonx gohaeux guh gwn, Baez raen miuz maj mwn, Siengjmuengh gwn haeuxmoq.” Namzningz Si Liengzging Gih baih dieg Nazheuj neix miz aen mbanj heuhguh Mbanjgoreih, ndaem naz lij caux ndaej ok aen giuzfeizyieng ndeu daeuj hawj vunzlai guhcaemz lienhndang dem, aen de gaenq aeu ndaej gij mingzloeg feihvuzciz vwnzva yizcanj swcigih.

[Muq Daih’it]

(Haimuq. Gyanghaet, seizhah, ndaw doengh, gwnz naz nou buet roeg mbin, gizgiz doenghyukyuk. Boh daenj gyaep bax luiq, gaem diuz saux ndeu okdaeuj, doq rongx sing sang doq buet bae coh doenghnaz gizgyae.)

Laengmuq: (Boh swenj) Ai! Bang nou raq roeg raq neix! Geij mbaek naz haeux cungj deng sou sai liux lo! Ou—— Moeb dai sou bae! Ou—— Ai……

(Yaepyet, daengx aen daizheiq roeg mbinsusu, nou buetsiegsieg…… Boh buet okdaeuj, fwngz gaem gaem haeux mbouj lw geijlai naed ndeu, yied yawj yied hozgenx.)

Boh: (yaengx saux bae bangx) Ou! Moeb ha—— moeb dai sou bae——

(Meh caeuq 3 daeglwg buet hwnjdaeuj bangx roeg. Daih dawz fag danzgungh nyingz duzroeg ndeu doek roengzdaeuj, buet hwnjdaeuj gip aeu duzroeg. Gyoengq nou gyoengq roeg cungj deuz sanqsad. Boh ciengj aeu duzroeg gwnz fwngz daeglwg gvaqdaeuj, maenjheuj gwqgwq roengzrengz boemz duz de roengz gwnznamh bae.)

Meh: Bohdaegyinz ha——

Roeg dai mbouj rox in,

Cuengq cix mbin mbouj ndaej,

Mwngz hab siusiu heiq,

Gaej hozgaek nyaenx lai.

Boh:

Duzroeg dwgcaengz lai,

Naz haeux sai gvaqdoh,

Mwngz ha caen mbouj rox,

Dajndaem hoj ndaej gwn.

Haeuxriengz lij caengz henj,

Denhdenh (gizgiz) miz nou roengz,

Nazhawq naeuz nazboengz,

Ngoenzngoenz dwksiegsieg.

Dangq roeg dot simdaeuz,

Dangq nou mbon dungxsaej,

Yawjraen couh gag heiq,

Bineix gwn gijmaz.

……

Meh:

Mbaek naz mbouj caengz henj,

Senq ndi haeux roengz gva,

Iek ndaej da couh va,

Ra byaekcwx guh donq.

Hab gonz couh bae gonz,

Gongz iek mbouj miz yungh,

Ndi naed haeux roengz dungx,

Lwg ndaw rungj daej dai.

(Niq youq lingh giz mbouj gyae, ndang unqniekniek, yaek laemx yaek laemx…… Geij boux buet gvaqbae rex de cix guh mbouj gib lo. De gaenq daenghhangx laemx roengz gwnznamh, cik fwngz unqrieg ndeu iet coh daihgya——)

Niq: Daxmeh, iek, iek, gou dungx iek……

Meh: (got Niq ndaetndwtndwt bae)

Lwgsaeq mbouj miz gwn,

Hwnzngoenz couh hoj youq,

Caj dou bae gonz haeux,

Couh gwn souh gwn ngaiz.

(cienq naj coh Boh)

Dawz liemz bae yoenggawq,

Gvej haeux cawj guh ngaiz,

Daegniq deng iek lai,

Da raiz gyaeuj hix ngunh.

(Boh lij dwg ndwnsoengsoeng mbouj ning, Meh doq daej doq eu)

Bae couh bae yoenggawq,

Lij soengz yawj gijmaz,

Mbouj bae gonz dauqma,

Aeu gijmaz bwnq lwg?

(coh Niq) Daegniq gaej daej, gwn gaemz cij gonq (gej buh yaek biengj hawj lwg gwn cij, fwt singjsag gvaqdaeuj, youh dauq cw buh ndei).

Dungx iek yaek goenqcaw,

Bae gyawz aeu raemxcij,

Ndwenngoenz neix vijsij,

Daegniq deng haemz lai.

(Meh daejww, 3 daeglwg hix nyaenx mbouj ndaej daej ok sing. Boh raemxda rihvengveng, de guhmuengz yeu fwngz dawz dak bwnz muengx roengzdaeuj couh byaij okrog bae.)

Meh: (coh Boh) Mwngz……mwngz mbouj bae gonz haeux, mwngz bae guh maz?

Boh: Mwngz laihnaeuz ndaw naz lij miz haeux hawj mwngz gonz ha? (Goemz roengz gwnznamh bae lax gaem haeuxgaem gaenq mbouj miz saek naed yaengx hawj Meh yawj)

Mwngz gag hai da naeq,

Gij neix baenzlawz gonz?

Mwngz gag hai da ngonz,

Neix gonz aeu maz haeux?

Meh: Mehmbwn ha!……

(Meh bibuengq yaek laemx, Boh sikhaek umj dawz de mbouj hawj laemx roengzbae. Daengx ranz vunz got baenz ndaek ndeu, daej saekwk mbouj dingz.)

Baihrog eu:

Ciuhnduj goeng lauxbaeuq,

Ndaem gohaeux ciengx vunz,

Hai cin doek roengz namh,

Laemxsim bae ung ganq,

Fanhfanh ngeix mbouj daengz,

Cimhlaeng yaek dai iek.

——ronghdaeng ciemhciemh laep

[Muq Daihngeih]

(Ga Dahgorenh gyaeundei. Raemxdah saw- yauyau, lae bae ywdywd. Henz dah go faexgeq mbaw loenq yaek liux lo, yaek dai cix caengz dai. Boh ndwn youq henz raemx, song fwngz gej bwnz muengx okdaeuj, couh yaek vanq roengz dah bae.)

Boh:

Mbouj miz haeux roengz rek,

Dungx iek da cungj raiz,

Muengh dawz bya guh ngaiz,

Ndaej buq cai saek donq.

(Boh yunghrengz vanq bwnz muengx roengz dah bae, sou hwnjdaeuj, bwnz muengx hoengqvangvang, mbouj ndaej saek yiengh. De senj lingh gizdieg, caiq vanq muengx baez daihngeih. Youh sou hwnjdaeuj, bwnz muengx lij dwg hoengqvangvang mbouj ndaej saek yiengh. Boh fwngz dawz bwnz muengx, cingq yaek vanq baez daihsam, cix aenvih dungx iek gvaqbouh, daengx ndang unqniekniek, cuenq- vangvang yaek laemx roengz gwnznamh.)

Boh:

Baezbaez cungj mbouj ndaej,

Dungxsaej gaenq doxnem,

Gen ga unq ndi rengz,

Cengqgengz hoj dingj youq.

Neix fwngz byouq baema,

Cix venj gva deng iek,

Gag ngeix gag simcieg,

Mboujyawx biek bae dai.

(Boh soengz youq hamqdah cingq yaek diuq roengzbae, sawqmwh song da baez rongh, cik fajfwngz ndeu cw buengzda muenghyawj ndaw dah. Ndaw dah, miz yiengh doxgaiq ndeu daj baihgwnz fouzbembem……)（caengz sat）