“Bang mwngz guh di saeh iq suenq maz ne? Mwngz yawjsiuj gou lo.”

Lungz Byauh aeu fwngz uet hanh gwnz naj, hanh lae haeuj ndaw bop fajfwngz de, miz di in, de nyaenx mbouj ndaej dawz daengz henz bak boq le geij baez.

“Baenzlawz yiengh lo? Fwngz mwngz——”

Siu Cuh byaij gvaqdaeuj, yawj- raen bop gwnz fwngz Lungz Byauh, saeknaj baez bienq, gig sim’in.

“Mbouj youqgaenj.” Lungz Byauh riunyumj, yo fwngz daengz baihlaeng bae.

“Caen hojlienz, itdingh dwg gaem gaenzcax roengzrengz gvaqbouh lo……”

Siu Cuh gig sim’in muengh Lungz Byauh, loq hozndat, nyaeuq bwnda, ndiengq gokbak, yawj ndaej ok de youh gyo’mbaiq youh gvan- sim Lungz Byauh.

“Aen song aen bop suenq maz?” Lungz Byauh roxnyinh Siu Cuh nai de caeuq goq de, hawj de vuenheij fouzbeij, faj fwngz de lumj mbouj in lo.

“Ndei, seizneix mbouj aeu bang gou lo.” Siu Cuh ragrag gengoenh de, “Daeuj, raeuz daengz laj faex hung yietnaiq bae.”

Go faex hung baihlaj sangjsetset, miz raq rumz ci gvaqdaeuj, Lungz Byauh roxnyinh daengx ndang cwx- caih, go nywj ndaek rin dangqnaj, baenzlai ndeigyaez.

Siu Cuh riuj aen doengjfaex iq cang gijgwn daeuj, biengj hai fa, ndenq hawj de.

“Dungx iek luba? Hawj mwngz gwn!”

“Gou mbouj iek.” Lungz Byauh iet fwngz doi, “Mwngz gag gwn ba.”

“Mwnh, gijgwn miz haujlai ne.”

Lungz Byauh yawjyawj ndaw doengjfaex, cang ndaej rimrad dah- raix, beij ngoenzlwenz lai boix ndeu, lij lai miz song aen faengx dem.

“Mbouj!” De vanzlij doi, “Mbouj siengj gwn.”

(caengz sat)