Daegcwngz dwg bouxhoj ndeu, de gig lingzleih. Miz bi ndeu, de bae ranzbouxcawj gairengz, bouxcawj neix ged caemhcaiq simdoeg, Daegcwngz bae guhhong romh daengz laep, dauqmaz le cij ndaej gwn haeux lw、raemxdang lw ndwi, mbouj dawz Daegcwngz dang vunz. Baenzneix Daegcwngz hozndat dangqmaz, de couh naemj ra seizlawz boizhaemz bouxcawj neix cij ndaej.

Miz ngoenz ndeu, bouxcawj hawj Daegcwngz bae cawx bak duz bit caeuq 5 duz vaiz dauqma. Bouxcawj hawj Daegcwngz cienz le, Daegcwngz couh okdou lo. Daegcwngz doq byaij doq ndaq:“Bouxcawj ged neix, ngoenzneix gou hawj mwngz raen fangz cij baenz.”

Daegcwngz daengz gyang haw, ngoenzneix dwg ngoenzhaw ceiq byai baenzbi, vunzlai baedauq, ndaet- fwdfwd, nauhyied raixcaix. Daegcwngz yawj bae yawj dauq, youzyouz langh- langh, mbouj gaenj bae cawx huq saekdi, doq youz doq eu fwen guh- angq. Mbwn yaek laep lo, de cij bae cawx gaiq bak duzbit ndeu caeuq gaiq hajvaiz ndeu, aeu mbawrong cumh le oet haeuj ndaw daeh couh dauqbae lo.

Daengz ranz le, bouxcawj hai bak couh ndaq:“Daegcwngz, mwngz vihmaz dauqma baenzneix laep? Bak duz bit ni? 5 duz vaiz youq gyawz?” Daegcwngz han naeuz:“Ngoenzneix baeg lai lo, maz cungj mbouj ndaej gwn, seizneix dungx iek lai, gwn caeuz gvaq caiq hawj mwngz.”

Doeklaeng gwn caeuz le, Daeg- cwngz cij menhnyednyed daj ndaw daeh biengj gaiq bakbit ndeu caeuq gaiq hajvaiz ndeu okdaeuj, song fwngz ndenq hawj bouxcawj. Bouxcawj hozndat dangqmaz, fok naeuz:“Gou hawj mwngz bae cawx bak duz bit caeuq 5 duz vaiz, mwngz dauq cawx gaiq bak duzbit caeuq gaiq hajvaiz hawj gou na?” Daegcwngz dap naeuz:“Deng ha, bouxcawj, neix mbouj dwg bak duzbit, nanzdauh dwg bak duzgaeq na? Neix mbouj dwg haj duzvaiz, nanzdauh dwg haj duzma na?”

Coenz vah saek ndaej bouxcawj mbouj rox baenzlawz han lo, de raen ceng mbouj gvaq, cij ndaej nyaenx- heiq ndwi lo.

Bouxcawj vaih neix dangyienz mbouj nyienh couh baenzneix cuengq gvaq Daegcwngz.

Doeklaeng miz ngoenz ndeu, de youh naemj daengz aen banhfap ndeu daeuj doiqfouq Daegcwngz. De heuh Daegcwngz ma daengz gyang hongh, vix geij aen gang caeuq Daegcwngz naeuz:“Daegcwngz, ngoenzneix mwngz couh aeu aen gang hung neix bae daeb aen gang iq haenx, hawj de daeb haeuj ndaw gang iq bae. Danghnaeuz mwngz guh mbouj baenz, mwngz couh mbouj ndaej ngaenzhong!” Bouxcawj ndaw- sim caeg riu, de nyinhnaeuz baezneix Daegcwngz haengjdingh guh mbouj ndaej baenz, couh ndaej mbaet gij ngaenzhong Daegcwngz roengzdaeuj lo.

Daegcwngz mbouj guhsing, maz cungj mbouj gangj, de byaij daengz baihnaj aen gang hung bae, mbaet caw mbat baez dub, aen gang hung neix dek soiq bae, yienzhaeuh dawz gij vax soiq gang hung cuengq roengz ndaw gang iq bae.

Bouxcawj doeksaet caez, sim’in aen gang hung bonjfaenh deng soiq, gipmuengz buet gvaqbae hut:“Aiya, Daegcwngz, mwngz baenzlawz dub aen gang hung gou vaih bae ne? De youh mbouj nyex mwngz gvaq!”

Daegcwngz soengsetset naeuz:“Mbouj dub de vaih, baenzlawz ndaej dawz aen gang hung bae daeb haeuj ndaw gang iq? Bouxcawj, mwngz guh hawj gou yawjyawj! Danghnaeuz mwngz guh ndaej baenz, gou mboujdan mbouj aeu ngaenzhong caemhcaiq gou lij boiz gij cienz hawj mwngz bae cawx aen gang hung moq dem!”

Bouxcawj baez nyi, bakaj ngoengngoeng, gik ndaej muenh gvaqbae lo.

(Vangz Bwnjli gangj Ouh Caijfangh cingjleix)