Lozcwngz, daengx guek aen Mulaujcuz swciyen dog, gij vwnzva giekdaej minzcuz de gig naekna. Ndawde, gij fungsug baenzgya Mulaujcuz gvaq baenz geij cien bi daengz seizneix cungj lij mbouj bienq.

Bouxcoz Mulauj guhyoux cungj gig swyouz, gyoengqvunz cawzok cietheiq、hoihcomz caeuq ganjhaw ndaej doxgyau doxrox, seiz “byaij ndoi” lij doiqfwen gyau baengzyoux dem. “Byaij ndoi” itbuen youq ndwensam caeuq ndwenbet, bouxcoz ndang daenj buhvaq gyaeundei, bae gwnz haw ra doih doiqfwen. Aeu fwen guh moiz, mwngz cam gou han, song boux cungj habhoz couh soengq doxgaiq hawj baihde. Doeklaeng couh cingj bouxmoiz bae daengz ranz bauq hawj bohmeh, dingh ngoenzndei baenzgya. Baih bouxsai cingj bouxmoiz bae ranz bouxmbwk cam gonq. Danghnaeuz bohmeh bouxmbwk hab’eiq couh dawz gij betcih lwgmbwk hawj bouxmoiz gyau hawj baih bouxsai. Bohmeh bouxsai dawz betcih bouxmbwk daenz youq baihlaj lozyieng. Dangh- naeuz youq sam daengz gouj ngoenz ndawde, gyanghwnz duzgaeq mbouj luenh haen, mbouj sawqmwh luenh mbin bungq doxgaiq vaih daengj, couh cingj canghsuenqmingh daeuj “hab mingh”. Danghnaeuz betcih mbouj hab, baih bouxsai couh dauq doiq betcih ma, betcih doxhab cix ndaej roengzdingh lo. Seizde baih bouxsai aeu soengq song gaen nohmou daengz ranz bouxmbwk bae “raeuj vaen”, youz bouxmoiz caeuq song ranz yaengdingh. Daengz ngoenz dinghvaen, baih bouxsai couh dawz bet gaen nohmou、song duz gaeqdon、song huz laeuj、ngaenzlaex bae ranz bouxmbwk. Doeklaeng gyoengqde couh cingj canghsuenqmingh yawj ngoenzndei dingh ngoenzlaeuj, caiq lingh senj ngoenzndei hwnj haw bae caeuq bouxmbwk cawx baengz guh buh- moq. Bawxmoq okhaq ndwen gax- gonq, cib dahsau doengzban ndaw mbanj couh gagnyienh bae guh yahbuenx, bae ranz bawxmoq bang guh haizmoq、nyib buhhaq daengj. Daengz ngoenz okhaq, cib cej- nuengx caeuq bawxmoq cang ndang doxdoengz liux bae, caeuq bawx- moq itheij bae ranz lwggwizmoq. “Cib cejnuengx soenghaq” couh- dwg gij fungsug baenzgya Mulaujcuz ndawde aen yizsiz daegbied ndeu.

Haujlai dieg youq ngoenz coux caen lij laeb “dou fwen”. Couhdwg baih bouxsai yaek ciep bawxmoq aeu eu fwen hoizdap cij ndaej haeuj ranz bouxmbwk bae. Baih boux- mbwk gyoengqvunz soengq caen bae daengz mbanj bouxsai caemh yaek eu fwen hoizdap cij ndaej haeuj ranz bouxsai bae. Bawxmoq haeuj ranz le, lij aeu “nauh dangzfwen”. Couhdwg youq baihndaw baihrog rugmoq nda daiz doxdax eu fwen. Sing hemq ndei、sing angq riu goksatsat, nauhyied oen’oen. Ngoenz baenz- gya, song bouxmoq aeu buenx bouxhek caeuq beixnuengx gvaq haemh. Ngoenz daihngeih, bawxmoq couh riengz gyoengqvunz soengq caen ma ranzmeh youq. Ngoenzsix ndwenngeih bi daihngeih, bouxsai cij bae ciep bouxmbwk ma gvaq ciet, ngoenz daihngeih bouxmbwk youh dauq ma ranzmeh lo. Baeznaengz daengz seizhong, bawxmoq cij ma ranz bouxsai youq geij ngoenz bang guhhong, daengz mizndang seng lwgnyez le cij mbouj dauq ma ranzmeh youq.

Bi 2012, fungsug baenzgya Mulaujcuz ndaej senj haeuj Gvangjsih buek daihsam feihvuzciz vwnzva yizcanj mingzloeg.