Cietvujyiz cuengqgyaj geij ngoenz, gou gietdingh dauqbae ranzcoj yawjyawj.

Ranzcoj gou youq ndaw lueg, seiqlengq dwg ndoi, gwnz ndoi faex heuswdswd, bi seiqgeiq raemxrij lae mbouj dingz. 5 bi gaxgonq, ga roen doeng bae ranzcoj dwg roen namh, baedauq mbouj miz ci gvaq, haeujok cungj aeu byaijdin, ngoenz ndit faenx gienj rim mbwn, ngoenz fwn loh mbaeqmbatmbat, haeujok baez he, namhboengz uq rim dinvaq, mizseiz nem daengz gagoek bae. Baenzneix seiz doek fwn, gyoengq vunzmbanj mbwkmbwk saisai haeujok cungj aeu gienj dinvaq hwnjdaeuj cij ndaej.

Dingqnaeuz seizneix ranzcoj bienq lo, bienq baenzlawz yiengh gou hix mbouj rox. Gou dwg boux meh- mbwk ndeu, youq diegrog guhhong, hix haq youq diegrog, baenz baz vunz, baenz meh vunz, ndwenngoenz couh yienghneix gvaqbae lo, liz ranzcoj yied daeuj yied gyae, dauqbae ranzcoj couh yied daeuj yied noix.

Ranzcoj gou liz haw gyae, gwnz roen gig noix bungz daengz vunzsug. Garoen doeng bae ranzmbanj dwg roensuijniz, yienznaeuz riengz dinndoi coih bae utut vanvan, hoeng lohmienh bingzcwtcwt, ci hai youq gwnz loh onjdwddwd.

Roxgeiq baez daih’it raen vunz hai aen soujfuz dohlahgih haeuj mbanj daeuj seiz, dou daengx mbanj vunz cungj humx gvaqbae yawj nauhyied, gig geizheih, miz lengq daeg lwgsai, damj hung, bin hwnj gwnz soujfuz dohlahgih bae naengh, cig daengz bouxcawj soujfuz dohlahgih maenj le cij saet roengzdaeuj.

Seizneix gou gag hai ciiq dauq- ma, gag naemj: Gyoengq vunzmbanj dwg mbouj dwg hix lumj gaxgonq raen soujfuz dohlahgih yienghde daeuj humx yawj aen ci gou ni?

Gou hai ci daengz bakmbanj, roxnyinh doiqnaj moqsagsag, gaxgonq bakmbanj dwg benq reih hoengq ndeu, benq reih neix dwg reih goenggya, mbouj miz byawz dajleix, nya rim lumj ndoeng, gumzgumz gamxgamx. Seiz- neix dwg aen giuzcangz moqsaksak ndeu, gwnz giuzcangz cuengq miz caet bet aen ciiq, mbouj raen miz saek boux vunz. Raen daengz neix, gou gag vih gij naemjngeix haxbaenh riu hwnjdaeuj.

Daegnuengx gou youq yienhsingz guh saeh, daxboh daxmeh gaen daegnuengx youq yienhsingz, ranzcoj mbouj miz vunz youq, gou cuengq ci ndei le, couh dajsuenq bae ra godangz gonq.

Doiqnaj miz bouxsai ndeu vueng- vueng muengzmuengz buet coh gou daeuj, gou baez raen couh rox dwg godangz. Gou hemq:“Godangz, mwngz baenzneix muengz, yaek bae gyawz?”

Godangz fwt raen gou dauq daengz, miz di doeksaet, de vix hangz ranz gwnz ndoi haenx naeuz:“Gou yaek bae ranz mou, ngoenzneix gou gai mou, mwngz dauq cingq ngamj lo, gou miz boux bang fwngz lo.”

Godangz naeuz aen ranz mou neix gaenq guh ndaej 5 bi lai lo, de bi ciengx mou ndaej gai 2000 lai duz, ngoenzneix gai 600 lai duz, vunz hai ci daengz ranz mou daeuj aeu mou, dangciengz ndaej ngaenz roengz daeh.

Gou itloh dingq godangz lwnh goj, itloh doeksaek, roxnyinh godangz bienqbaenz boux vunz hawj gou yaek mbouj roxnaj bae.

Bihaenx gou ndaej 16 bi, youq yienhsingz doegsaw, ndawranz gungz- hoj, daxboh daxmeh ngoenzngoenz bae guh reih guh naz, bi daengz haemh couhdwg ciengx di mou ciengx di gaeq daeuj cawx gyu cawx lauz caeuq hawj dou geij beixnuengx doegsaw sawj- yungh.

Bi ndeu, couh yaek haihag lo, ndaw daeh daxboh mbouj miz saek faen ngaenz, ndawranz miz rouh moulwg ndeu cingq baenz gai, daxboh couh dajsuenq gai rouh moulwg neix ndaej ngaenz le hawj gou dap ci caeuq ra gwn. Daxboh heuh gou caeuq godangz rap moulwg bae haw gai, aen haw liz mbanj 30 lai leix loh, gou gig angq. Byawx rox hwnz haenx doek fwn hung, fwn naed roengz soegsoeg sagsag itcig daengz ranz yaek rongh cij dingz. Gwn ngaizromh le, gou rap 3 duz moulwg, godangz rap 6 duz moulwg, dou couh boux gonq boux laeng okdou.

Loh namh mbaeqmbwtmbwt, yamqyamq hoj byaij, geu buh deng fwn rwed ndaek haenx nem youq gwnz ndang ndaetndaet bae, faj din youq ndaw liengzhaiz raeuz bae raeuz dauq, gou gaemdawz gij go’nya bien roen, roengzrengz mbouj hawj laemx roengz, yienghneix yamq bae yamq dauq, byaij menh lumj duzmoed raih nei. Lij ndei, daeuj daengz mbanjnden, miz boux vunzmbanj ndeu caeuq dou cawx duz moulwg ndeu, bouxmbanj neix aeu si, naeuz gvaq duenh seizgan he cij ndaej hawj ngaenz.

Godangz raen gou dwgrengz lai, youh daj gwnz rap gou aeu duzmou lwg he gya daengz gwnz rap de bae, ga rap gou mbaeu di lo, dou lau nguh seiz ndei gai moulwg, mbouj gamj yietnaiq, mbouj dingz ganj roen.

Ginggvaq cien haemz fanh hoj, dou swenjfofo daeuj daengz gwnz haw lo. Ngoenzhaw bingzseiz, aen haw neix cungj dwg vunz ndaetfoedfoed, ngoenzneix gwnz haw boux byaij mbangbyekbyek, youq gyaeuj haw gwnz couh ndaej yawjraen daengz gyaeuj haw laj. Cij miz geij boux canghdoz caeuq geij bouxsai youq ndaw hawciengz byaij bae byaij dauq. Raen daengz yienghneix, gou caeuq godangz simliengz lumj seiznit deng raemxgyoet rwed nei.

Mbouj miz vunz daeuj haw, bae gyawz miz vunz daeuj cawx moulwg? Ndawsim gou gag naemj mbouj dingz, naemj dwg naemj, dou lij dwg naihhoz caj, maqmuengh bouxcawx fwt ok- daeuj caeuq dou gangjgangj gyaq- cienz, doeklaeng couh caeuq dou cawx mou.

Mbwn bumzrwdrwd, dou caj le geij diemj cung, gwnz haw vunz byaij yied daeuj yied noix, gou iek ndaej dungx goenjyoyo, mwhnduj laihnaeuz gai mou couh ndaej ngaenz, ok ranz seiz dou cungj mbouj daiq saek faen ngaenz, gwnz haw dou mbouj roxnaj saek boux, seizneix ra ngaenz gwn haeux gwn faenj cungj mbouj miz, cijndei naih iek youq, gij moulwg hix heuh iek mbouj dingz, sim gou nyap yaek dai lo.

Seizgan menhmenh gvaqbae, gwnz haw cij miz geij boux canghdoz caeuq dou song boux ndwi lo, yawj daeuj mou gai mbouj baenz lo, dou doxnaeuz rap mou maranz. Seizneix geij boux canghdoz haenx gvaqdaeuj naeuz yaek caeuq dou cawx mou, gyoengqde duz moulwg hawj dou 15 maenz. Duzmou dai hix mbouj ngamq dij ndaej di ngaenz neix ndwi bw, dou mbouj nyienh gai hawj gyoengqde.

Dou byaij ok gyaeuj haw mbwn couh ciemhciemh laep roengzdaeuj. Dou baengh gij rongh ndaundeiq yaengyaeng lumh baenaj. Ndaw lueg gyanghaemh, roeg heuh daek swenj, lumj caeuq dou gangjgoj, youh lumj riu dou nei, yied dingq yied roxnyinh coegrwz. Dungx iek lai, song faj ga lumj miz bak gaen naek nei, gou yied byaij yied menh, godangz raen gou yienghneix, de mbouj dingz lwnh goj hawj gou dingq, lij naeuz gou aeu ndeindei doegsaw, roengzrengz yamq ok ndaw lueg bae, gaej caiq souh gij sinhoj neix.

Gienh saeh haenx gaenq gvaqbae geijcib bi lo, gou hix caen byaij ok ndaw lueg, daengz diegrog bae guhhong lo, gwn imq daenj raeuj, saedceij gvaq ndaej ngoenz beij ngoenz ndei, hoeng gienh saeh gai mou neix, seizseiz baenqcienq youq ndaw ukgyaeuj gou.

Ranz mou godangz faen miz 3 bouhfaenh, dingz he ciengx moumeh, dingz he ciengx moulwg, dingz he ciengx mounoh. Saujdangz youq ndaw ranz mou baet haex mou, raen gou daeuj daengz, hix doeksaet angq naeuz:“Dahnuengx dauq ndaej ndei, dahnuengx dauq ndaej dengseiz.”

Ngoenzneix youh dwg gai mou lo, ngoenzgonq dou ngoenz ndeu gai mbouj bae saek duz mou, seizneix godangz ngoenz ndeu couh gai bae 600 duz mou.

Gou vix duz mou ceiq hung haenx cam godangz:“Duzneix aiq miz geijlai gaen? Aiq ndaej geijlai ngaenz?”

Godangz naeuz:“Duzneix aiq miz 256 gaen naek, 3000 lai maenz.”

Gou naeuz:“Godangz mwngz caencingq fat lo, daih fat lo.”

Godangz naeuz ndaw mbanj mbouj gag de boux ndeu fat, cibgeij bi neix daeuj, vunz ndaw mbanj ciengx gaeq bang bit bang, ciengx mou bang cwz bang, gwnz ndoi ndaem faex, ndaw reih ndaem mak, seizneix ranz- ranz cungj fat caez lo.

Gou baenq laeng dauq yawj ndaw mbanj, mbanjcoj ranzlaeuz aen’aen moqsaksak, gij ranzhaz seizgonq cungj mbouj raen lo, roen ndawmbanj youh soh youh seuq. Gou ndawsim gag naemj: Vunz lajmbanj cungj baenzneix fouqmiz lo, guekcoj baenzlawz mbouj fouqgiengz ni!