Gaenq geij ndwen mbouj ndaej okbae baij dan lo, mbaet youq ranz geij ndwen, vunz dauq dwg cwxcaih le mbouj noix, hoeng baez siengj daengz yaek daengz ndwen daej lij aeu boiz daigvanj dem, lij miz gij cienzyungh song boux lwgnyez haihag aeu gyau, mehyah Cangh canghyw ndawsim mbouj onj hwnjdaeuj, de danq gaemz heiq naek ndeu. Youh siengj daengz gvan de Cangh canghyw bauqmingz bae haeujcoengh Vujhan, lienz mbaw cingq baij dan ndeu cungj banh mbouj ndaej, miz ndaek roet yungh ha, roet lij raen haeu bw!

Sawqmwh, dienhvah yiengj lo, de doq dawz hwnj ciep, dwg sing bouxsai sug ndeu:“Daxsauj, gou dwg singz- guenj Siujvuz.”

Mehyah Cangh canghyw ndang saenz liux, de, de baenzlawz gyaep daengz ndawranz gou daeuj ha? Binghraq caenh neix bonjfaenh cungj mbaet youq ndawranz mbouj okbae baij dan gvaq, geij ngoenz neix cingzgvang bienq ndei di, ngamq miz gij siengjfap okbae baij dan, lij caengz okbae ne, dienhvah couh gyaep daengz ndawranz daeuj lo, mbwn gaj byajbag! Mehyah Cangh canghyw youq ndaw sim nambyoebbyoeb.

Siujvuz naeuz:“Daxsauj ha, baezlaeng mwngz mbouj yungh banh cingq baij dan lo.”

Mehyah Cangh canghyw naeuz:“Yi, daengngoenz yaek daj baihsae okdaeuj la? Mbouj miz cingq baij dan, sou mbouj dwg lij yaek gyaep gou, gaemh gou, fad gou ha?”

“Mwngz couh cuengq bak aen sim roengz ndaw dungx bae ba! Guekgya raeuz seizneix gujli youq henz gai baij dan, coicaenh gij ginghci fazcanj, youq gij seizgan ceijdingh caemhcaiq dieg ceijdingh, cinj hawj baij dan lo!”

“Neix dwg caen ha?” Mehyah Cangh canghyw buenq saenq buenq ngeiz, lij haenqrengz mbaengq swhgeij mbat ndeu dem, dinghcinj mbouj dwg fangzhwnz.

Siujvuz naeuz:“Dwg caen ha, yaeuh mwngz gou couhdwg duz mameh seng, gou bang mwngz anbaiz aen dan ndeu, mwngz daeuj bakdou hawciengz hung daeuj ba!”

Bakroen hawciengz hung lai dem le hangz gai ndeu baij dan. Siujvuz yiedcingz vad fwngz coh Mehyah Cangh canghyw, de byaij daengz giz dieg ceiq yienjda. Siujvuz naeuz neix dwg baihgwnz daegdaengq anbaiz, hawj boux ndawranz miz vunz bae haeujcoengh Vujhan mienx cienz sawjyungh.

Fwj hai mok sanq, binghraq ndaej daengz mizyauq gaemhanh, seizcin daeuj lo, ndit ndat ciuq haeuj aen yienhsingz henzgyaiq aen guek baihnamz neix daeuj, dienheiq raeuj- rubrub, gij nywj rog cueng hainduj heuoiq hwnjdaeuj lo, roegenq seizcin youq laj yiemhranz heuhgitgit mbouj dingh, gyoengqvunz mbaet youq ndawranz geij ndwen seizneix youh hainduj ndaej okrog bae nyaengqnyat lo. Bakdou hawciengz hung, mehyah Cangh canghyw cingq youq aen dan swhgeij guh seng’eiq nyaengq mbouj dingz, rog singz va rang roeg heuh, de roxnyinh gij gingjsaek seizcin gig gyaeundei gig maezvunz!

（sat）