Aennyenz dwg minzcuz vunznoix baihnamz ciuhgeq guek raeuz caeuq mbangjdieg Dunghnanzya cungj doxgaiq ciuhgeq ceiq miz daiq- biujsingq ndeu, daengz seizneix gaenq miz song cien lai bi lizsij lo, gwnzbiengz suenq dwg Guengjsae raen miz ceiq lai, dieg miz nyenz caemh ceiq lai, Hozciz Si couh ndaej aen mingzdaeuz ndei “mbanjranz aennyenz daengx biengz”, dangqnaj daengx seiqgyaiq gij nyenz louz ndaej roengzdaeuj haenx gungh 2400 lai aen, Hozciz couh louz miz 1400 lai aen lo. Dinfwngz caeuqguh aennyenz youq mwh Mingzciuz Cingciuz couh saetcienz lo.

Hozciz Si Vanzgyangh Mauz- nanzcuz Swciyen Sangcauz Segih Mbanjbanjcaiz nungzminz Boux- cuengh Veiz Gijcuh、Veiz Gijsanh song beixnuengx, aeu cungj fuengfap caeuqguh vunqsa gung roengz gvan youh gvan hojnanz mwh caeuqguh aennyenz, youq bi 2003 ndaej caeuqguh baenz le aennyenz yiengh Mazgyangh. 10 lai bi daeuj, song beixnuengx de gonqlaeng caeuqguh aennyenz hunghung iqiq 10 lai fanh aen, gai bae daengz Fazgoz、Dungh- nanzya daengj dieg.

Veiz Gijcuh song beixnuengx faenbied youq bi 1963 caeuq bi 1965 doekseng, ndawranz daj ciuhgeq daeuj couhdwg ranz caeuqguh, dax- goeng daxboh dwg canghcaeuqguh maenh’ak. Bi 1985, song beixnuengx de couh youq daxboh sonyinx lajde hainduj aeu vunqnaez、vunqsa caeuq- guh reklij rekhang, riengzlaeng geij bi couh ei gij yiengh doxgaiq ciuhgeq caeuqguh cenjgoujlungz doengz、batsongbya doengz daengj cungj ndaej baenz. Bi 2000 hainduj, song beix- nuengx de caenhrengz bae gunggvan caeuqguh aennyenz, daj leh sa daengz guh aenvunq, caiq daengz baenzdauq hong caeuqguh, cungj fanfoek bae naemjngvanh、fanfoek sawqguh, deng saetbaih baez dem baez geq mbouj sat gvaq le, gag cauhguh baenz dauq vunqnyenz miz aendaej、mbok- gyongxrog、vunqbyuknyenz、mbok- gyongxndaw、vunqnajnyenz caeuq vunqgoemq gag miz daegsaek naek- gywg haenx, dauqdaej youq bi 2003 ndaej dwkbyoengq hungloet, caeuq- guh baenz le aennyenz yiengh Mazgyangh lumj aen caen nei.

Youq gwnz giekdaej neix, Veiz Gijcuh song beixnuengx youh mbouj- duenh sawqniemh, caeuqguh aennyenz hungloet. Bi 2006 ndwen 5, song beixnuengx de ginggvaq 20 geij ngoenz haenqrengz guh, bang Swcigih Dangjveij 、Cwngfuj caeuqguh baenz le aennyenz hung ciggingq 110 lizmij、sang 60 lizmij ndeu soengq hawj Baekging; bi 2018 ndwen 6, song beixnuengx de youh caeuqguh baenz aennyenz hung songnajnyenz naj- nyenz ciggingq 6.68 mij、gyongxnyenz na 2.88 mij、naek 50 dun ndeu, cat moq Giznizswh seiqgyaiq geiqloeg, ndaej aen mingzdaeuz ndei “aennyenz gwnzbiengz ceiq hung”.

Veiz Gijcuh song beixnuengx swnjciep le dinfwngz cojcienz, youh daihdamj bae cauhmoq. Seizneix gij nyenz songde caeuqguh haenx, gaenq ndaej diuz ok seiq aen yaem, yaemsaek、yaemcaet cungj beij nyenz gaeuq ndei haujlai, gyoengq beix- nuengx Bouxcuengh、Yauzcuz gih raeuz caeuq Gveicouh daengj yungh le cungj habhoz haenhndei. Baenz- neix, bi 2011, Veiz Gijcuh song beixnuengx ndaej bingz baenz swcigih gaep feihvuzciz vwnzva yizcanj “dinfwngz caeuqguh aennyenz Boux- cuengh” bouxswnjcienz daiqbiuj- singq haenx.