Ngoenz singhgiz, youq aen laj- byonghngoenz seizcou ndeu, gou caeuq baengzyoux doq seizbienh coh henz singz youzbyaij doq gangjgoj. Seizcou mbwn lamz fwj hau, hawj vunz simsangj dangqmaz.

Byaij daengz diuz loh sohswdswd、seuqsatsat ndeu, song henz gij byaek baenz coij baenz rongh, heuruemruem mwncupcup maj youq gij ndit raeuj- rubrub seizcou dak daengz haenx. Gizgyae nazhaeux saekgim baenzraih, bineix bouxguhnaz haengjdingh ndaej fungsou lo.

Sawqmwh, dou raen miz ndaek rin loet ndeu gaek miz “Ranzmbanj Lauxyieng” geij aen cih saekgim hung he daengj youq aen bakdou siujgih he. Baengzyoux naeuz gou nyi:“Neix couhdwg aen Sangswh Yen Gyangh- bingz Yidi Banhcenh Anhcidenj lo.” Gou ndawsim gag haenh: Aen siujgih neix daj baihrog yawj gij ranzlaeuz caeuq ndaw singz gij ranzsanghbinj cungj ca mbouj geijlai, gyoengqvunz ranz gungzhoj ndaej buen daengz aen siujgih gyaeundei neix youq, caen ndei bw! Siengj daengz seizneix, dou cungj nyaenx mbouj ndaej yamqdin byaij haeuj ndaw bae yawj mbat he.

Dou song boux seizbienh youz- byaij youq diuzloh cungqgyang ndaw siujgih, cij raen song henz gij laeuz saekhenj aen dem aen daengj dwk. Moix aen laeuz cungj miz 6 caengz, mboujlwnh daj baihrog roxnaeuz daj gij yangzdaiz yawj bae, cungj rox gij laeuz neix sezgi hableix youh gyaqciq, haengjdingh ndeiyouq.

Baengzyoux youh lwnh gou naeuz:“Aen ‘Ranzmbanj Lauxyieng’ neix dwg Sangswh Yen song aen Yidi Banhcenh Anhcidenj ndawde aen ndeu, lingh aen anhcidenj hwnq youq lajmbanj Nanzbingz Yauzcuz Yangh. Aen neix faen song geiz hwnq baenz,daj 2016 nienz 8 nyied haigoeng, daengz 2018 nienz 12 nyied laeb baenz. Hanghmoeg cungjdouzswh 14587 fanh maenz, gij dieg gvangq miz 116.66 moux, hwnq 32 aen laeuz 686 dauq ranz, doengjit gveihva、 doengjit hwnq baenz. Gij ranz baenz dauq neix faen miz 5 cungj: Ranz miz song boux vunz ndaej youq 50 bingzfanghmij, ranz miz 3 boux vunz ndaej youq 75 bingzfanghmij, ranz miz 4 boux vunz ndaej youq 90 bingz- fanghmij, ranz miz 5 boux vunz ndaej youq 108 bingzfanghmij, ranz mauh- gvaq 6 boux vunz ndaej youq 120 bingzfanghmij. Daengz 2019 nienz- daej, gaenq miz 530 ranz 2464 vunz buen haeujdaeuj youq rim lo.” Gij soq raezrangrang neix, hawj gou doiq aen “Ranzmbanj Lauxyieng” hanghmoeg banggungz neix haenh mbouj dingz, caen boiqfug aen dangj aen cwngfuj raeuz, caen caezsim vih beksingq!

Youq ndaw suen, gij va rum ndaem ndaej gag miz daegsaek, moix aen luengq laeuz song henz cungj ndaem nywj ndaem faex ndaem va. Gij faex gij va miz sang miz daemq, cabceb mizeiq, va gak saek hai hoengh, caeuq gij cangzlangz doxingj doxhab, hawj vunz cwxcaih simhai youzbyaij.

Dou youzbyaij youq ndawde, gij mbungqmbaj gak cungj gak yiengh youq ndaw va ndaw faex riengjret diuqfoux, mizseiz lij miz saek duz roemx haeuj ndaw rungj gou daeuj. Gij roeg iq hix ciengzseiz daj gwnz faex coh dou ciengq go, nauhyied dangq- maz.

Youq aen laeuz vangok he, miz bang lwgnyez ndaej caet bet bi ndeu cingq diuq cag guhcaemz. Gyoengqde riengz diuz cag hwnjhwnj roengz- roengz. Baenzraq baenzraq sing riu lwgnyez hix gaen diuz cag hwnjhwnj roengzroengz cienz youq ndaw siujgih.

Ngamq gvaq lingh diuz loh, dou youh raen 3 boux lwgnyez hung daekeiq fwngfwng cingq youq ndaw lanzgiuzcangz dwk lanzgiuz. Boux he gungj hwet, fwngzgvaz daiq giuz, fwngzswix yo youq henz hwet cingq fuengz bouxwnq daeuj ciengj giuz, swnh doiqfueng mbouj haeujsim, couh sikhaek cienq ndang, daiq giuz 3 yamq buet hwnjbae coh lanzgvangh lo…… Couh youq de baez yat hwnj seiz, gij hanh gwnz gyaeuj hix fwt gaen gij byai byoem mbin okbae, youq gij ndit baihlaj ciuq ndaej lwenqda dangqmaz!

Youq giz laj gofaex seiqhenz lanzgiuzcangz lij miz haujlai dijyuz gicaiz hawj gyoengqvunz haethaemh lienhndang dem. Seizneix cingq miz geij boux daxbuz daiq lan okdaeuj naengh youq giz he gangjgoj. Gij lwgnyez humx youq seiqhenz buet bae buet dauq, riuhihi guhcaemz mbouj dingz.

Dou mboujlwnh byaij daengz gyawz, cungj raen gyoengqvunz miz gangj miz riu, vuenyungz angqyangz.

“Gou rom cienz buenq ciuh cij cawx ndaej aen ranz ndeu, lij caengz ndaej lumj aen siujgih neix baenzneix gyaeundei bw! Hoeng, gou siengj mbouj doeng: Gyoengqde daj gak yanghcin buen daengz gizneix youq le, mbouj reih mbouj naz, baenzlawz guhgwn ni?” Gou gangj le, baengzyoux ngaekngaek gyaeuj, hix roxnyinh gig geizheih.

Seizhaenx, dingjlingz miz meh- simj he gaenjgaenj gipgip cung ok baklae daeuj, cadi caeuq dou dox- bungq lo.

De caeuq dou riunyumj ngaek- gyaeuj mbat he, couh sikhaek yamqdin coh douhung buet bae. De naeuz mbouj ndei eiqseiq de aeu ganjvaiq bae hwnjban.

“Hwnjban?” gou geizheih cam de, “Byaij loh bae ha?” Aenvih gizneix haeuj ndaw singz bae lij miz saek song sam goengleix gyae.

“W, couh youq rog dou, song yamq din couh daengz.” Mehsimj riunyumj han gou, “Mbouj saenq, sou gaen gou bae yawjyawj ba.” Mehsimj rox dou gig geizheih, couh swnh bak gangj. Aiq dwg gaxgonq miz vunz hix lumj dou doxdoengz, de raen gvenq luba.

Vih bae yawj de youq gyawz hwnjban, guh maz, dou caen gaen- laeng mehsimj hix byaijgoemgoem coh douhung.

Mehsimj daiq dou doq byaij doq vix gij suenbyaek hawj dou yawj, rimhoz naeuz:“Aen dangj raeuz aen cwngfuj raeuz caen ndei, mboujdan hawj ranzlaeuz hawj dou youq, vanzlij hawj ranzranz faen aen suenbyaek iq. Dou cungj ndaej gwn gij byaek ‘saekloeg’, mbouj yungh aeu cienz bae cawx byaek lo.” Gij byaek gyoengqde maj ndaej heuswdswd caemhcaiq hoenghhwdhwd.

Van gvaq baihswix, youh byaij saek bak lai mij, mehsimj dingz youq aen gunghswh bakdou le riu gangj:“Gou couh youq gizneix hwnjban.”

Gou ngiengxgyaeuj baez yawj, “Banggungz Cehgenh” geij aen cih saekgim hungloet ronghmeb ciuq haeuj ndaw da daeuj. Baizbenj venj youq henz sij miz—— “Sangswh Yen Swhyangz Cin Anhcidenj Banggungz Cehgenh”. Gizneix gingqyenz miz aen cehgenh iq he hawj gyoengqde hwnjban!

Laxlawz aen cehgenh neix youq 2018 nienz 10 nyied laeb baenz, cujyau dwg gyoep cang wjgih, ndaej anbaiz 40 lai boux gunghyinz, ndawde miz 32 boux dwg gij vunz ranz- gungzhoj. Aen gunghswh neix hawj gyoengqde youq douranz couh ndaej hwnjban canh cienz, vanzlij ndaej fuengbienh ciuqgoq bouxlaux lwgnyez bw!

Mehsimj dinfwngz sug, doq guhhong doq lwnh dou nyi aen cehgenh neix dwg baenzlawz guh hong. “Neix dwg guek raeuz cwngcwz ndei, anbaiz gyoengq dou ranz- gungzhoj buen daengz henz singz, engq ndaej lumj vunz ndaw singz nei ndaej hwnjban lingx gunghswh dem, dou miz souhaeuj, youh miznaj……” Mehsimj haenh mbouj dingz.

Mwhhaenx, miz bouxsai cung- nienz he haeujdaeuj, mehsimj sing iq naeuz hawj gou, de couhdwg boux lauxbanj aen cehgenh neix, singq Lingz, miz maz saeh cam de couh ndaej lo.

Dou docih mehsimj le, couh caeuq Lingz lauxbanj gangjgoj hwnj- daeuj. Lingz lauxbanj hix dwg vunz bonjdieg, de gyaez ranzmbanj bonj- faenh, gij hong banggungz cungj hawj de ciengzseiz venj dungx venj saej. Gaenh song bi neix daeuj, ndaw yienh gig yawjnaek gij canjnieb moq, youh bang ndaej gyoengqvunz ranz gungz. Ndigah couh gujli Lingz lauxbanj hai aen banggungz cehgenh neix.

“Bi’gvaq daeuj, aen banggungz cehgenh gou neix gaenq daiqdoengh henzgyawj haujlai vunz demsou, hawj gyoengqde gvaq hwnj saedceij engq ndei……”

Lingz lauxbanj angqvauvau gangjsebseb, dou cungj dingq haeuj- maez lo.

Mwh lwgda de coh baihnaj yawj bae, raen ndaw gyang doengh gij haeux henjgim baenz benq caeuq gij byaek heuswdswd, lumjnaeuz ndaw- sim de youh cang rim maqmuengh moq lo……