“O? Baenzlawz yiengh lo? Youq byongh roen deng sanq?”

“Mbouj deng sanq, cij dwg mbaq gou cungj deng muz ndaej foeg lo.”

“Naek lai?”

“Deng ha! Byawz hawj mwngz cug ndaej baenzneix hung, gou baenz- lawz rap ndaej hwnj?”

“Hab dai, hab dai!” Lungz Byauh roengzrengz roq aen’gyaeuj bonjfaenh, “Gou baenzlawz baenzneix huk?”

“Rap byaij roen youh mbouj ndei gwq yietnaiq, hix mbouj gamj oksing, gyoengqde lij youq baihlaeng coi gou byaij vaiqdi, mwngz naeuz, dwg mbouj dwg haih dai vunz lo?” Siu Cuh doq ienq de doq iet fwngz nyaenx mbaq bonjfaenh.

“Gou caen hab dai!” Lungz Byauh youh najmong youh sim’in Siu Cuh, byaij gvaqbae siengj iet fwngz bang de nyaex mbaq.

“Ngoenzneix caiq hix mbouj gamj hawj mwngz bangfwngz lo.” Siu Cuh loq nyaeuq ndaeng, baez cienq ndang couh gungj hwet roengzbae gip fagcax.

“Mbouj, ngoenzneix itdingh aeu hawj gou lai guh di hong daeuj rouh coih!” Lungz Byauh vaiq gvaq de, baez vax couh gip fagcax gwnznamh hwnjdaeuj, “Hawj gou daeuj gvej ba.”

Siu Cuh ndoj youq henz yawj de, fouznaih nyaeuq bwnda.

“Ndei ha!” Siu Cuh bibi fwngz, daenj hwnj mauhdiemx, “Yienghneix gou couh cug haz, mwngz aeu haeujsim gaej deng gij oen camx fwngz mwngz bw.”

“Gij naeng fwngz gou na raeuh, mwngz cuengqsim lo.” Lungz Byauh roengzrengz vad fagcax.

“Mbouj deng ba! Lauheiq dwg naeng naj ceiq na bw.”

“Caih mwngz baenzlawz gangj.” Gyaeuj Lungz Byauh ngiengx hix mbouj ngiengx baez he laebdaeb gvej.

Siu Cuh ndwn youq henz yawj le song baez, cij dawz cagndaij bu youq gwnznamh cug haz sauj.

Ngoenzneix Lungz Byauh gvej haz dwg vihliux rouh coih, ndigah daegbied haenqrengz, doenghgij haz caeuq faexcaz cungj boihseiz lo, baez go baez go laemx youq laj fwngz de, yaep he gaenq gvej ndaej benq hung he.

Siu Cuh cug ndei le song gwed, byaij gvaqdaeuj raen de lumj duz mouraih nei ngaemgyaeuj gvej haenq, mbouj ndei eiqseiq, doq heuh de:

“Vei, gaej baenzneix haenqrengz lo, ngoenzneix mwngz guh ndaej gig ndei lo! Yietnaiq yaep he ba.”

“Mbouj! Mwngz gag yietnaiq ba.”

Lungz Byauh cingq gvej ndaej miz yinxdaeuz, vad fagcax lienzlienz, itseiz hix daengx mbouj roengzdaeuj. Siu Cuh ndwn youq baihlaeng de bibi gyaeuj, cijndei hawj de laebdaeb guh roengzbae, bonjfaenh cingq angq ndaej ndojgik, cienq ndang naengh youq go faexhung lajde, youq gizgyae muengh Lungz Byauh gvej nywj, gok- bak riunyumj mbouj rox ngeix maz.

(caengz sat)