5 bi gonq, Cangh canghyw daj yanghcin aen veiswnghyen ndeu diuh daengz yen yinzminz yihyen bae guhhong, mehyah de hix riengz de haeuj singz lo.

Bonjlaiz mehyah de dwg boux guh hong reihnaz caixhangz ndeu, mwh youq ranzcoj lajmbanj de gaenx bae raeq geij moux reihnaz ndawranz, ciengx di bit gaeq caeuq mou, gij doxgaiq ndaw ranz bingzciengz gwn roxnaeuz yungh dauq hix lij ndaej gag gaeuq gwn gaeuq yungh, gwndaenj mbouj yousim.

Hoeng vahsug gangj naeuz “vunz yiengq giz sang byaij, raemx coh giz daemq lae”, Cangh canghyw mbouj rox baenz seiqvunz cungj youq ndaw yangh veiswnghyen guhhong, caiq gangj song laeq lwgnyez hix lij yaek aeu bae ndaw singz doegsaw ne. Ndigah mehyah Cangh canghyw hix cij ndaej riengz haeuj singz bae lo.

Daengz ndaw singz gvaq saedceij, cawz le ngoenznaengz ndawranz doenghgij gwn yungh aeu sai ngaenz le, miz ndwen daengz haemh lij aeu ciuqseiz boiz ngaenz cawx ranz dem, dan baengh di gunghswh Cangh canghyw souhaeuj gig noix mbouj gaeuq yungh geijlai ha. Caemhcaiq dahlwg hung ngamq hwnj dayoz, daeglwg hix hwnj gauhcungh lo, ngoenznaengz gij haisiu gig lai, hawj mehyah Cangh canghyw roxnyinh diuz rap gwnz mbaq engq naek lo. Baenzneix mehyah Cangh canghyw hix bae dieghong coengh vunz buen cien umj rin gvaq, hix bae guh gvaq hong dajbaet ……

Song bi gonq, mehyah Cangh canghyw hainduj baij dan, gai di byaekcwx gva mak, ndangdaenj boux- geq caeuq lwgnyez, dauq hix canh ndaej di cienz, hoeng moix ngoenz cungj aeu caeuq singzguenj doxndoj, gig mazfanz, loengh mbouj ndei deng gaemh lij deng fad ngaenz dem ne.

Miz baez ndeu, de cingq youq henz gai baij dan gai lwgmaenz, nyaengqfoedfoed seiz, singzguenj sawqmwh daeuj daengz lo. De caeuq doengh boux baij dan gizyawz vuengmuengz buetdeuz, aen daengq iq de aeu mbouj gib couh deng muedsou bae lo. De lau ndaej ndang saenzdedded, sim diuq- boebboeb mbouj dingz, caeklaiq vunz mbouj deng gaemhdawz, mboujnex couh mbouj rox deng fad geijlai cienz lo.

Vihneix, ngoenznaengz de mbouj noix caeuq bouxgvan Cangh canghyw dwen daengz aeu bae banh cingq habfap baij dan, Cangh canghyw hix dwg baezbaez cungj ngaekgyaeuj dapwngq lo, hoeng itcig cungj banh mbouj ndaej.

Miz baez ndeu, daxmeh singz- guenj duicangj Siuj Vuz baenzbingh bae yihyen, de rox le, couh heuh bouxgvan Cangh canghyw byaij “doulaeng”, hawj daxmeh Siuj Vuz anbaiz aen fuengzbingh ceiq ndei, vanzlij siengj banhfap hawj boux canghyw ceiq daeklig bae ywbingh. De lij cawx mak bae yawj dem, gouz Siuj Vuz ngoenzlaeng youq gwnz gai lai ciuqgoq de di. Hoeng daxmeh Siuj Vuz bingh ndei ok yihyen le, cingq baij dan hix banh mbouj ndaej, moix baez bae baij dan lij ciuqyiengh deng singzguenj gyaep.

Miz baez he, de youq henz gai baij dan gai byaek, cingq caeuq bouxcawx gangj gyaq boiz gyaq, sawqmwh miz vunz naeuz “singzguenj daeuj lo”, vunz wnq ganjgip rap doxgaiq hwnjdaeuj lumj duznou raen duzmeuz nei buetdeuz caez lo. De buet mbouj gvaq Siuj Vuz, deng gaemhdawz lo. Siuj Vuz naeuz bonjlaiz yaek fad de, hoeng de saeqsim goq daxmeh bonjfaenh gvaq, cuengq de baez ndeu, baezlaeng danghnaeuz caiq youq henz gai baij dan, gaemhdawz le couh yaek deng fad lo!

Dauqma le, de caeuq bouxgvan Cangh canghyw gangj gij saeh neix, nam Cangh canghyw mbouj miz bonjsaeh. Cangh canghyw hix cijndaej ngaemgyaeuj, mbouj rox baenzlawz guh.

Hoeng mbouj miz ngaenz baenz- lawz gvaq saedceij ha, gizgiz aeu sai ngaenz, mbouj miz cingq hix aeu mauhyiemj bae baij dan. Baenzneix de caiq bae baij dan, couh laebdaeb caeuq singzguenj doxndoj, singzguenj baez daeuj couh vaiqdi ndoj hwnj- daeuj, singzguenj baez deuz caiq baij okdaeuj, guh gij gaicawx iqetet lumj guhcaeg nei.

（caengz sat）