Diuqgyangndoi, youh heuh cietgyangndoi, dwg Gimnamz Gih、Gimbaek Gih、Lingzsanh Yen caeuq Bujbwz Yen aen ciet Mbanjcuengh、Mbanjgun hunghoengh ndeu. Gij lizsij de daengz seizneix gaenq miz 470 lai bi. De daj vwnzva Yahnoz daeuj, youq lajmbanj dwg cungj hozdung caeqbaiq ndeu, daep mauhngeg gyaep fangz cawz binghraq. Ceiq caeux dwg raen Mingzciuz Gyahging《Gimcou Ceiq》bien “Fungsug” geiq: “Ndwenbet cibngux, ciq gij mingz neix dajcaeq, youq gyangndoi cang guh fangzsien diuqfoux, couh heuhguh diuq- gyangndoi, bouxsai mehmbwk cungj bae humxyawj, doiqfwen.” Nanz le, diuqgyangndoi couh daj aen yizsiz caeqbaiq gyo’ mbaiq boux- sien bienqbaenz biengzdieg aen vwnzva guh’ angq hozdung seizneix.

Moix bi liggaeuq ndwenbet daengz ndwencib, gak aen Mbanj- cuengh、Mbanjgun diegdde cungj doxlwnz gvaq cietgyangndoi, bae- dauq aiq gvaq baenz sam ndwen lai, guh lai mbat le couh baenz gvenq lo, vihneix youh heuh “laehboizbi”. Seizde ranzranz hohhoh cungj gaj gaeq gaj bit、gaj mou gaj vaiz, baij laeuj daih hek, noix cix song sam daiz, lai cix bet daiz cib daiz, caiqlij geijcib daiz cungj miz. Ndawde, diuqgyangndoi dwg aen hozdung dajcaeq ceiq youqgaenj haenx, dwg vihliux gyaepcawz yak- rwix、mbaenjgouz gomiuz maj ndei sou lai、bouxvunz doenghduz cungj bingzan. Caiqlij cungj youq gwnz ndoi henz Miuhdojdeih banh hoz- dung, ndigah couh heuh “diuq- gyangndoi”. Banhaemh, goeng- daeuz naj daep mauhngeg Noz, ndang daenj buhgoeb diuq foux ciengq go, cingj goengcoj guhcawj, sou deuz iucing iugvaiq seiqhenz. Doeklaeng, canghheiq biujyienj doenghgij foux “mbe daihhoengz” “diuq samsae” “diuq goengsae” “diuq bouxciengq cungcig” “lienh bing” “diuq seiqcieng” “bau laefwj” “diuq yahsien” daengj. Itbuen daj mbwnlaep yienj daengz ngoenz daihngeih ranzrongh bae.

Gij daegdiemj diuqgyangndoi dwg ciengq go couh mbouj diuq foux, diuq foux couh mbouj ciengq go, miz gij foux cingq haenx, hix miz buenq doeg buenq ciengq bae langhbaij cingzciet gojgaeq. Giek mbouj doengz, canghheiq couh daenj gij ndangdaenj caeuq daep mauhngeg mizgven haenx, diuz foux ndeu diuq sat, canghfwen couh ciengq gij gojgaeq mizgven haenx. Ndawde, mauhngeg Noz dwg aen hongdawz yienjheiq ceiq lai ndeu. Couhdwg aeu gij yienghsiengq caeuq cangndang mbouj doengz haenx bae langhbaij gij singqheiq bouxvunz, lumjbaenz yakdoeg、yiemzhaenq、dasang、ganvad、cingqcig、unqswnh daengj. Gij yozgi cujyau dwg laz、gyong、nauz, lij miz hauh gaeuvaiz daengj. Gyoengqde cang vunz ndaw heiq cang ndaej sengdoengh miz saenz, gangjvah hix loenghriu mizyinx, yinx bouxyawj cungj got dungx riuhaha. Ngoenz daihngeih gyanghaet couh diuq gij foux “soucing” “gyaep ruzlungz”, eiqsei naeuz dawz gij cinggvaiq daiq miz yakrwix、binghraq haenx sou haeuj ndaw ruzlungz aeu ceij biuj haenx bae, soengq daengz henz dah le youh aeu feiz coemhcag, dawz gij daeuh vanq haeuj ndaw dah bae, eiqsei dwg dajneix rengxdumh couh riengz raemxdah riuz deuz lo, yienh’ok gyoengq- vunz maqmuengh saedceij aeu maz ndaej maz, biengzbing an’ onj. Yienghneix, aen hozdung diuq- gyangndoi couh guh sat lo.

Diuqgyangndoi daj ndaw vwnzva Bouxcuengh bonjdeih bienq daeuj, seiz riuzcienz gij cietheiq vwnzva Bouxgun youh baez di baez di gya haeujdaeuj, siengcwngh minzcuz doxgiet baenaj. Bi 2014, diuqgyangndoi Gimcou ndaej senj haeuj guekgya gaep buek daihseiq feihvuzciz vwnzva yizcanj hangh- moeg mingzloeg.