Liujcwngz Yen dwg Gvangjsih aen dieg ok mengheu youqgaenj ndeu, louz miz haujlai dieggaeuq yiuzoenq haenx. Gij saekyouh、rizraiz、dwkyouh、giekdaej daengj aenmeng gyoengqde oenq haenx cungj maqhuz doxlumj. Lumjbaenz mengheu Yiuzliujcwngz, saekyouh heu hix loq hau, youh miz di mong; yungh gij fuengfap deuved、yaenqva、diemjsaek ma cangyiengh; giekdaej faen miz dinhop caeuq dinhop gyaj; gij raiz hix miz doenghduz doenghgo lumj vagut、 va’ ngaeux、 gomez、 duzbya、 duzroeg、duzmaxloeg daengj, caiqlij miz cihsaw “fuk”“fouq”“bauj”“gitleih” daengj, gig miz gij heiq ndwenngoenz ndawbiengz.

Bi 1985, Ciengj Daivaz caeuq nuengxgoux de daeuj daengz Liujcwngz, raen gij namh rangh dieg Mbanjsangleiz habngamj guh meng, gyoengqde couh youq Liujcwngz Sabuj an’gya. Ciengj Daivaz dwg boux- guhcawj Cangjmeng Yungjhingh Mbanjsangleiz Liujcwngz Yen, bau gij gisuz sonyinx caeuq ndaguh aenmeng. De 18 bi hainduj riengz saefouh guh meng ndip、oenq yiuz, guh cungj hong neix gaenq miz 44 bi. De gig sughangz gij dinfwngz oenq meng, lumj genj namh bwh liuh、caij naez、gaenx naez、daj meng ndip、langh dak、coux yiuz、oenq guh daengj. Cangjmeng Yungjhingh bi 1996 cauhlaeb, daengz seizneix lij yungh gij yiuzlungz ciuhgeq ma oenq aenmeng. Aeu gij saekyouh yungzdiemj daemq gvaq namhmeng haenx ma oenq guh, youh yungh gij gisuz cienzdoengj aeu vunz rag meng ndip haenx, hawj gijde gag deng rumz ci hawq, doeklaeng couh hwnj youh cangndang le doq aeu dohndat ma oenq. Aen yiuzlungz neix miz 48 mij raez, dohraeuj ceiq sang ndaej oenq daengz 1340℃, seizneix de youq Gvangjsih dwg aen yiuzlungz maqhuz hung、louz ndaej ndei hix ndaej cingqciengz oenq meng ndeu. De ok gij ganglaeuj meng 1-1000 goenggaen lai, lij miz ganglaeuj meng doj cienzdoengj、bingzlaeuj meng、mbaenjlaeuj meng、gang’oemq meng doj caeuq dangz doxgaiq ngauz laeuj daengj. Gij huq neix gai daengz Gvangjsih raeuz caeuq Guengjdoeng、Gyanghsih daengj dieg, lij cuzgouj daengz Biengzgeu daengj guekgya. Yiuzlungz aenvih yiengh lumj ndanglungz cij miz aen coh neix, youh yaek baengh ndoi bae hwnq(aen ndoi aeu miz 8-20 doh lingq), gij aenmeng yiuzlungz dwg aeu fwnz ma oenq, yienghneix gwnz aenmeng couh ndaej miz caengz youhmong ndeu, gij saek de raeujrub、faencaengz lai、gaiqmeng co, mbat dog oenq okdaeuj, gij dozraiz cungj mbouj doengz.

Riengz gij hwngfat gunghyezva, gij huq suliu yied ok yied lai, aenmeng menhmenh couh gai mbouj bae lo, haujlai giyez guh meng haenx cungj gvendou doekbaih liux. Vih le hawj aencangj dauqcungz hoengh hwnjdaeuj, Cangjmeng Yungjhingh gaenxmaenx diuzcwngj gij naemjfap guhmeng, gaijbienq diuz sienq guhmeng, gaijndei gunghyi, diuzcwngj gij gezgou aenmeng, gij aenmeng de oenq haenx daj yiengh cocat、saedyungh bienqbaenz yiengh gyaqciq habyungh、naih yawj. Aen cangj neix lij dawz gij dinfwngz guh meng gaeuqgeq haenx caeuq hawj vunz gag doengh fwngz seizneix riuzhengz doxgap hwnjdaeuj, banh doenghgij hozdung hawj vunz daejniemh guh aenmeng, itmienh gya’gvangq gij roenloh gai aenmeng, itmienh hawj vunzlai roxyiuj caeuq dawz gij hong guh aenmeng haeuj sim. Vihliux cienzciep gij dinfwngz guh meng, aencangj neix lij caeuq Liujcouh Gunghyi Meijsuz Yozyau、Gvangjsih Gohgi Dayoz、Liujcouh Yisuz Hezvei doxgap, cauhlaeb gij dieggoek guh caeuq lienh oenq aenmeng, dapcauh aen bingzdaiz ma gyaulouz gij guh、hag、maeqmu gunghyi meijsuz aenmeng, mboujduenh daezsang gij goengfou guh aenmeng.