Haj

Seizneix ceiq youqgaenj couhdwg baenzlawz ra cienz daeuj boiz vunz gonq. Daj haq guh yah vunz daeuj, gaenq haujlai bi mbouj caeuq Daeg- mienz dox lienzhaeh caeuq raennaj lo, seizneix feiz coemh bwnda, mbouj goq baenzlai lo. Fangh Vanj daj aen dienhvah he hawj Daegmienz gangj mingz cingzgvang, fwngz miz di saenz.

“Gou laihnaeuz maz, gij saeh neix ndei banh, swnhbienh gvaq Sinhcin daeuj yawjyawj gou seizneix bienq ndaej baenzlawz yiengh vei.” Daegmienz youq ndaw dienhvah riuhoho, han ndaej gig vaiq, Fangh Vanj youh doeksaet youh angq.

“Yienghneix gou sien docih mwngz gonq bw.” Fangh Vanj naeuz.

Dingqnaeuz Daegmienz youq baihhaenx han ndaej sangjswt youh riu ndaej baenzde vaiqvued, Fangh Vanj ndawsim miz di raeujrubrub, de lumjbaenz yawjraen maqmuengh couh youq dangqnaj nei, baezneix cungj- suenq miz vunz daeuj bang swhgeij lo.

Fangh Vanj miz di mbouj siengj bae Sinhcin, siengj heuh Daegmienz daj cienz gvaqdaeuj couh ndaej lo, ciq ndaej cienz le gvaqlaeng menhmenh boiz, caiq naeuz swhgeij youh deuz mbouj ndaej gvaq gyawz bae. Yaepyet, Fangh Vanj ngaemgyaeuj sijsaeq youh naemjnaemj, seizneix miz saeh gouz vunz, lauheiq cingzgvang miz bienq- vaq, cij ndei ei gij vah Daegmienz, sikhaek doengh ndang bae Sinhcin.

Youq gwnz ci, aensim Fangh Vanj diuqbubbub, cungj roxnyinh miz di mbouj onj, de mbouj miz saekdi simcingz yawj gij gingjsaek gyaeundei rog cueng. Seizneix miz gunnanz gouz vunz, naemj lai hix mbouj miz yungh, Fangh Vanj gag nai swhgeij.

Daegmienz hai ciiq daeuj coux Fangh Vanj. Haujlai bi mbouj dox- raen, Fangh Vanj caeuq Daegmienz dauq hix mbouj roxnyinh najseng, song boux gangj neix gangj haenx, mbouj rox mbouj nyinh couh daengz aen ciujden hung ndeu.

Daegmienz riu doiq Fangh Vanj naeuz:“Vanj, neix dwg gou youq Sinhcin buek haujlai bi cij guh ndaej gijneix.”

“Va! Mwngz caen ak, yah mwngz miz fukheiq lai lo.” Fangh Vanj doeksaet cengq hung lwgda, ngiengx- gyaeuj muengh aen ciujden hungloet youh gyaeundei neix, lienzlienz haenh naeuz.

“Gou lij caengz baenzgya ne.”

“Lauheiq mwngz dasang lai bw.”

“Mbouj dwg ne, mwngz itcig youq ndawsim gou gehgungx haenx.”

“Luenh gangj, gou ciengxlwenx dangq mwngz dwg daegnuengx gou……”

Naengh roengzdaeuj le, Daeg- mienz caeuq Fangh Vanj mwngz coenz gou coenz, mbouj rox mbouj nyinh gwnz daiz gaenq baij rim byaek noh ndaetfwdfwd. Fangh Vanj naeuz:“Song boux vunz baenzlawz gwn ndaej sat daiz byaek neix, sai cienz.”

Daegmienz riu naeuz:“Gwn duh swhgeij youh mbouj dwg duh boux- wnq, mwngz nanz ndaej daeuj neix, raeuz vaiqvued lai ndoet di laeuj cij deng.”

Ndoet cenj laeuj he roengzbae, Fangh Vanj naeuz:“Daegmienz, mwngz gizneix gij fuzvuyenz bouxboux gyaeundei lumj dahsien nei bw.” Daegmienz dingq le, yaepyaep lwgda doiq Fangh Vanj naeuz:“Fangh Vanj, seizneix guh maz cungj nanz, lauxsaed lwnh mwngz nyi, gou gizneix dwg baengh guh cungj daegbied hangznieb haenx, cij ciuyinx ndaej bouxhek daeuj neix saengq cienz, mboujnex hix nanz guh roengzbae. Danghnaeuz yienghhaenx ra gwn cungj nanz, engq mbouj gangj canh ndaej cienz lai lo.” Daegmienz gangj ndaej cwxcaih diemzdwd, Fangh Vanj cix dingq ndaej bak aj da luenz, de roxnyinh Daegmienz bienq lo, bienq ndaej mbouj lumj gaxgonq yienghhaenx lo.

“Fangh Vanj, mwngz boux dog he, danghnaeuz mwngz riengz gou guh saeh, hix ndaej bienqbaenz boux miz cienz he, caiq naeuz gou lij itcig lumj gaxgonq yienghhaenx gyaez mwngz ne.” Caengz caj Fangh Vanj dap vah, Daegmienz youh riuhehe doiq Fangh Vanj naeuz.

Daegmienz doq gangj doq daj ndaw daehnaeng yut ok dab cienz nanupnup he okdaeuj, ndenq daengz baihnaj Fangh Vanj bae, “Neix dwg 5 fanh maenz ngaenz, mwngz dawz bae yungh gonq, seizlawz miz couh boiz, mbouj miz hix mbouj heuh mwngz boiz lo, cij aeu mwngz riengz gou caezsim bae guh, daengzcog mbouj you gvaq mbouj ndei.”

Dingq Daegmienz gangj gijneix, Fangh Vanj bak aj da daengx, lumj muengh boux vunzseng soqlaiz caengz roxnaj gvaq nei, naeuz:“Siengj ra cienzcaiz lai, miz daihbaj diuz loh ndei byaij, mbouj yungh guh gij saeh haih vunz haih gaeq neix law. Daegmienz, mwngz bienq lo, bienq ndaej gou mbouj roxnaj mwngz lo.”

“Max fouz nywj hwnz mbouj maj ndang, vunz fouz vengzcaiz mbouj baenzfouq, vunz daiq lauxsaed guh saeh mboujdan deng vunz hangz caemhcaiq yawjsiuj, seiqvunz hix nanz fatdad. Gij dahsau haenx miz di gaenx gwn gik guh cij daeuj guh hangz neix, miz di hix dwg deng gou lox yaeuh gvaqdaeuj mbouj ndaej mbouj guh gij saeh neix.” Daegmienz yut geu ien he daeuj cit, doq boq hoenz doq naeuz.

Muengh gij yienghceij soengswt Daegmienz, Fangh Vanj cix dingq ndaej daengx ndang hwnj naenggaeq, ganjmuengz nyoengx dab cienz haenx gvaq baihnaj Daegmienz bae, naeuz:“Gij cienz neix mwngz dawz dauqbae, gou mbouj aeu lo.” Gangj sat cienq ndang couh deuz.

“Fangh Vanj, mwngz seizneix gaenq rox gou baenzlai saehcingz, youh mbouj haengj caeuq gou caez guh saeh, heuh gou baenzlawz cuengqsim.” Daegmienz bek daiz haenq da naeuz.

“Hw!” Fangh Vanj gyaeuj hix mbouj ngeux couh deuz lo.

“Mwngz laihnaeuz mwngz gig ak luma? Gou couh yawjyawj mwngz dauqdaej byaij ndaej geijlai gyae? Gou hix lauxsaed lwnh mwngz nyi, youq aen dieg guek raeuz, mwngz cap fwed nanz mbin!” Baihlaeng cienz daeuj gij sing yakdoeg Daegmienz.

Fangh Vanj gyaeuj hix mbouj ngeux, de caen mbouj siengj caiq raen Daegmienz lo, de gig siengj lienz hwnz deuz bae, danghnaeuz yamq ndeu couh ndaej deuz ok aen singz neix engq ndei.

Roek

Boux ndeu byaij youq gwnz gai vunz bae vunz dauq, Fangh Vanj ndawsim hoengqhanghang, fouzvang- vang, aensim nanznanz mbouj ndaej dingh roengzdaeuj. Fangh Vanj ngeix hwnj gaxgonq haujlai saeh, hix ngeix hwnj gij vah Daegmienz haxbaenh ngamq gangj haenx, sim naemj: Boux vunz he baenzlawz gangj bienq couh bienq ne? Caiqlix bienq ndaej yienghde vaiq, swhgeij lij dwg swhgeij, hoeng Daegmienz cix mbouj caiq dwg Daegmienz lo. Mboujlwnh baenzlawz yiengh, seizneix sien ra dieg ninz youqgaenj, ngoenzcog sikhaek lizhai gizneix.

Fangh Vanj doq naemj doq youq geh gai gaebgeb he ra lijgvanj, de nyinhnaeuz yied doekgungx diegyouq yied bienzngeiz, ndaej ninz gvaq hwnz neix couh ndaej lo.

Sawqmwh daj ndaw laep cung ok song ndaek bouxsai najseng, lanz dwk Fangh Vanj, boux he riumaenj naeuz:“Mwngz ndeindei riengz dou song boux bae, bauj mwngz fouz saeh, mboujnex, heihei, mwngz gag rox.”

“Sou dwg byawz? Gou caeuq sou fouz ien fouz caeuz, vihmaz yienghneix guh?” Fangh Vanj doiq song ndaek vunz haenx hat naeuz.

“Mwngz haxbaenh mbouj dwg caeuq Gomienz dou gangjgoj ndaej cingq naemq luma? Yawj gij yiengh mwngz hix dwg vunz gvai, baenzlawz caenh gangj gij vah huk neix. Seizneix mwngz ienqhoij lij ndaej gib, dangh- naeuz siengj deuz, dou couh mbouj hekheiq lo!” Lingh ndaek bouxsai hix riunyaen hwnjdaeuj, loh ok gij heujdit de, yamqyamq bik gaenj Fangh Vanj.

Seizneix Fangh Vanj sikhaek singjsag gvaqdaeuj, song ndaek boux- sai neix dwg Daegmienz baij daeuj diunanz de! Seizneix cingzgvang youqgaenj, mbouj ndaej naemj baenzlai lo. Fangh Vanj yaengx din baez dik gvaqbae, song fwngz hix vaiq dwk cuk geij baez, ndaek bouxsai haenx sikhaek laemx youq gwnznamh, swenjngongo lumj mou deng iem nei.

Lingh ndaek bouxsai raen le, hix rongx dwk cung gvaqdaeuj, Fangh Vanj youh yaengx hwnj song gaemx- gienz gvaqbae, fwngzgvaz baez laengz gvaq laj hoz de, haenqrengz beg dauqlaeng, fwngzswix riengjret nyaenj dawz laeng hoz de, ciepdwk din’gvaz haenqrengz dik coh song cik ga de, in ndaej ndaek bouxsai haenx aj bak haeb heuj gvih roengz gwnznamh bae, sing swenj lumj vaiz deng gaj nei, lienzlienz heuh gouqmingh.

Haxbaenh ndaek bouxsai laemx gwnznamh haenx, bonjlaiz lij siengj ruenh hwnjdaeuj caiq bae moeb Fangh Vanj he, seizneix raen doengzdoih gij yienghceij camj neix, rox baezneix bungz daengz bouxak lo, caiqlix dwg boux mehmbwk ak he, gijneix gyoengqde caengz liuh daengz gvaq, hwk ndaej lienzmuengz got gyaeuj buetdeuz lo.

“Sou song ndaek ma neix, ringx gyae di bae!” Fangh Vanj youh hat naeuz. Muengh dwk song ndaek bouxsai haenx buetdeuz gyae le, Fangh Vanj soeng le gaemz heiq ndeu.

Boux mehmbwk ndeu gag youq, Fangh Vanj riengz vunz hag le di goengfou, mbouj hawj vunzrwix vunz- lanh luenh hangz, caen naemj mbouj daengz baez neix ndaej dawz okdaeuj yungh, gonqlaeng mbouj gvaq geij faencung, couh moeb ndaej song ndaek bouxsai yak haenx goq gyaeuj mbouj goq rieng buetdeuz lo. Seizneix, Fangh Vanj ndawsim maz cungj mingzbeg lo, Daegmienz fajnaj youh sug youh seng haenx youh youq dangqnaj bibuengq mbouj dingz, hawj de simcingz naekgywggywg.

Fangh Vanj goq mbouj ndaej ndang baeg yietnaiq saek seiz, lienz- muengz daj ndaw daeh mbon aen soujgih okdaeuj, aen dienhvah he sikhaek daj gvaqbae. Haemhhaenx, aen ciujden Daegmienz deng gingjcaz humx, Daegmienz hix deng gaemh bae lo.（sat）