Lingzconh Yen Giujvuz Cin Mbanjgyanghdouz youq baihsae Dah- hohlungz, gyawj bya gyawj dah, gij vunz diegde hix cinghseuq lauxsaed, dwg aen mbanj lwglan Sungciuz Couh Dunhyiz youq dieg neix guh haenx, daengz seizneix gaenq miz cien lai bi lo. Gij ranz Mbanjgyanghdouz deugyoeng gyaqciq, dan deuva couh miz 20 lai cungj 500 lai yiengh. Vunz cwng guh “Cungguek aenmbanj deuva daih’ it”.

Cienznaeuz Mingzciuz satbyai, aen ranz hoj ndeu laeng Mbanj- gyanghdouz miz lwgmbwk ndeu heuh Dahhaemz, de coengmingz maenh’ak, gig sughangz guh buh. Moix bi ndwenseiq ndwenngux, Dahhaemz couh bae ndaw naz gvej go’ndaij ma guh buh. Gij sa de doz haenx youh saeq youh maenh, gij baengz de daemj haenx cix unq cix ronghsien, gij doz de siuq haenx lumj gij caen nei. Dinfwngz ndei de couh ciemh- ciemh cienz okbae lo, bouxseng’ eiq cungj haengj laeng de cawx baengz cawx buh. Gij saedceij Dahhaemz bienq ndei le, de caiq bae bang ranz hoj ndaw mbanj caeuq mbanj nden. Gyoengqvunz cungj gig maij de. Dahhaemz haq le, vunzmbanj youh heuh de Guxiq. Miz bi ndeu liggaeuq ndwenngux cibseiq, duz roeglingz gamz le fagroi Guxiq deuz, de couh gyaep bae mbouj dingz, baeg le couh youq gwnz gaiq benjrin bakgamj Gamjbyadoeng yietbaeg, mbouj liuh daengz doeklaeng couh baenz sien lo. Gyoengqvunz vih le geiqniemh Guxiq, couh dawz ngoenz de baenz sien haenx dingh guh “cietdahsau”, maq- muengh caemh miz dah lwgmbwk ndeu, lumj de gaenxguh simndei nei. Bi 2013, cietdahsau Lingzconh ndaej senj haeuj buek daihseiq swcigih gaep feihvuzciz vwnzva yizcanj mingzloeg.

Cietdahsau lij riuz miz gij gangjfap “seiq raemx”. Liggaeuq ndwenngux cibit dwg “raemx swiq roen”, ngoenzde ndaw mbanj bouxsai bouxmbwk、bouxlaux lwgnyez cungj aeu bae baetsauq caeuq dongj swiq gehhongh ndaw mbanj, caepcawq ciep Guxiq ma; ndwenngux cibngeih dwg “raemx rongfaengx”, ngoenz haenx ranzranz hohhoh cungj swiq rong- faengx ma suek faengx, deq Guxiq ma gwn; ndwenngux cibsam cix dwg “raemx baenz cax”, moix ranz cungj baenz cax gaj gaeq gaj bit, bae caeq Guxiq; ndwenngux cibseiq dwg “raemx raemxda”, dwg naeuz gyoengqvunz sij mbouj ndaej Guxiq, danghnaeuz ngoenzde miz fwn, gyoengqvunz couh nyinhnaeuz dwg Guxiq sij mbouj ndaej bae gyae couh daej lo. Hoeng seizneix vunzmbanj cungj guh ndwenngux cibseiq ngoenz dog lai lo. Ngoenz cibseiq, vunzlai daj ndaw mbanj senj dahsau swnzsienh simndei ndeu cang guh “Guxiq” gonq, gyoengqde cix daj coengceiz Maijva’ngaeux hwnjdin bae daengz Gamjbyadoeng ciep “Guxiq”. Itbuen dwg doih saeceij byaij youq baihnaj, hopngomx daengx mbanj byaij gvaengz ndeu le, youh youq baihnaj coengceiz biujyienj gak cungj cezmuz. Doeklaeng hix dwg doih diuqfoux caeuq doih ruzbaengz, byaij itloh couh biujyienj itloh. Vunzmbanj hix fwngz riuj va’ngaeux、byaleix aeu ceij guh haenx riengz byaij youq baih- laeng. Caeq Guxiq sat le, banringz- gvaq couh soengq Guxiq ma Gamj- byadoeng lo. Sing gyonglaz angq- yangz、singfwen goksat、 foux hix gyaeu, daengx mbanj vunz cungj angqvauvau. Sat le couhdwg gak ranz gag gwn haeux lo, hohhoh cungj loengh byaek, lumj faengx Gyangh- douz、nohgaeq、gyaeqgaeq hamz、nohgoeb、daeuhfouh raemx ranz Cou daengj, cingj caencik baengzyoux daeuj guh hek.

Cietdahsau Lingzconh gag miz daegsaek haenx、vwnzva senjguen、vwnzva maij va’ngaeux Cougyangh- douz cungj yinx gyoengq beixnuengx henzgyawj caeuq haujlai hekyouz daeuj youz, coicaenh gij cienzciep caeuq hwngfat lijyouz caeuq vwnzva lajmbanj.