It

Geij ngoenz neix daeuj, Fangh Vanj simfanz raixcaix.

Ngoenzlwenz, miz vunz youh daeuj ranz cam aeu cienz lo, Fangh Vanj cijndei daengx naj dwg riu ndatcingz dakdaih. Caj boux haenx laeuj gaeuq ngaiz imq le, Fangh Vanj lij muengz ndenq ien youh ndingq caz, vah ndei vah unq gangj caenh. Boux haenx cij yamqdin dauqbae.

Fangh Vanj rox, seizneix ciq cienz beij bin hwnj mbwn lij nanz, gunnanz seiz bouxwnq haengj ciq cienz bang swhgeij cungj dwg simndei simsienh, seizneix bouxwnq miz saeh aeu banh yaek yungh cienz, swhgeij hix siengj caenhrengz boiz cienz neix dauq.

Song fanh maenz ngaenz, doiq gij vunz miz cienz daeuj gangj, mbouj suenq maz saeh, hoeng doiq Fangh Vanj daeuj gangj couhdwg gij cienz hungloet ndeu.

Buenq bi gaxgonq, dahlwg Fangh Vanj Lingzlingz baenzbingh, de doeng ciq sae comz cij ra gaeuq 7 fanh maenz ngaenz haeuj yihyen, yienz- naeuz yihbauj siu bae dingzlai ngaenz yw, hoeng de lij yiemq vunz geij fanh maenz dem.

Ngeih

5 bi gonq, Fangh Vanj caeuq bouxgvan cungj dwg ciengzciengz vih gij saeh saepsoiq doxceng, doeklaeng mbouj ndaej mbouj doxliz, Lingzlingz riengz Fangh Vanj.

Miz vunz cam Fangh Vanj:“Boh Lingzlingz gak fuengmienh caemh mbouj yaez, vihmaz doxliz ne?” Fangh Vanj dingq le couh riumbw naeuz:“Yawj vunz mbouj ndaej dan yawj baihrog, mwngz mbouj caeuq gou caemh ranz youq, baenzlawz rox gij saeh simfanz gou, song boux gvaq mbouj roengzbae, cengqgengz youq itheij hix dwgrengz.” Boux de dingq le, hix couh mbouj caiq oksing lo.

Ngoenz haenx Fangh Vanj caeuq bouxgvan daengz minzcwnggiz doxliz, Fangh Vanj naeuz:“Gaej yawjsiuj gou dwg boux mehmbwk nyieg he, gou ciengx ndaej Lingzlingz, mbouj citgeiz mwngz ciengx!”

Mbouj rox bouxgvan gonq Fangh Vanj dawz gij vah neix cuengq haeuj sim, roxnaeuz daegdaengq yienghneix guh, gvaqlaeng de caen mbouj ok saek faen cienz daeuj ciengx Lingzlingz. Cij dwg moix bi caet nyied cibseiq caeuq ndwencieng, de cij bae ranz meh Fangh Vanj yawjyawj Lingzlingz, cawx saek dauq buhvaq roxnaeuz ndenq saekdi cienz ndwi.

Ngamq hainduj de lij gaenx bae di, doeklaeng couh yied bae yied noix, mbangj bi mizseiz cungj mbouj raen ngaeuz.

Lingzlingz youq ranz daiq doegsaw, Fangh Vanj swhgeij boux ndeu bae baihrog dajgoeng. Cij aeu guh ndaej cienz, Fangh Vanj cungj mbouj lau sinhoj, hong uq hong dwgrengz de cungj guh. Mizseiz ndangdaej naetnaiq yaek dingj mbouj ndaej seiz, de baez siengj hwnj Lingzlingz fajnaj dwggyaez haenx, youh miz rengz bae guh roengzbae lo.

Fangh Vanj mizseiz hix mbouj sim’onj geijlai. Moix baez ma ranz meh, daeggo swhgeij mbouj miz maz, cungj raen fajnaj daxsauj saepsat，hix gig mbouj nyienh caeuq swhgeij lai gangj saek coenz vah, lumjbaenz yiemq de geij fanh maenz nei.

Aensim Fangh Vanj cungj bienq ndaej naekgywg, de amqamq roengz gietsim: Itdingh haenqrengz rom cienz youq baihrog cawx aen ranz ndeu. Geiq youq laj roq vunz, souhheiq lai, vunz aeu swhgeij ceng gaemz heiq ndeu.

Miz vunz naemj gaisau bouxsai hawj Fangh Vanj, naeuz miz bouxsai ndeu daeuj baengh ndei gvaq di. Fangh Vanj naeuz, danghnaeuz ra ndaej boux vunz ndeu daeuj baengh hix mbouj loek, hoeng it lau bouxwnq doiq Lingzlingz mbouj ndei, ngeih dwg de roxnyinh mbouj miz geijlai boux caensim.

Vunz miz gietsim caeuq ceiqheiq, mbouj lau guh mbouj baenz saeh. Geij bi gvaqbae, Fangh Vanj youq yienhsingz cawx ndaej dauq ranz ndeu lo.

Haeuj ranz moq ninz haemh haenx, Fangh Vanj lumhlumh aen- gyaeuj Lingzlingz, gag riunyumj, meh- lwg netsim haeujninz. Mbouj caiq geiq youq ranz vunz, simsoeng lai lo, swhgeij siengj ndwn couh ndwn, siengj naengh couh naengh, mbouj gaz daengz byawz, hix mbouj caiq yawj saeknaj vunz guhsaeh. Moix baez naemj daengz gizneix, Fangh Vanj cungj sim’angq, couhsuenq guh loq- fangzhwnz cungj siengj riu.

Sam

Ngoenz ndeu, bouxgvan gonq Fangh Vanj riuj haujlai doxgaiq daeuj gouz Fangh Vanj caeuq de fukvaen, naeuz gaxgonq cungj dwg de guh loek, cingj Fangh Vanj yienzliengh de, lij naeuz Lingzlingz mbouj ndaej mbouj miz daxboh, lij naeuz danghnaeuz Fangh Vanj lingh bae cauxgya, bouxsai wnq mbouj itdingh dangq Lingzlingz dwg lwgcaen swhgeij daeuj ciengx…… Fangh Vanj dingq le, caemrwgrwg mbouj dap saek coenz.

Haujlai nanz, Fangh Vanj cij damzdwddwd naeuz:“Docih mwngz gvansim gou caeuq Lingzlingz, gou nyinhnaeuz dou mehlwg seizneix gaenq gvaq ndaej gig ndei lo, mbouj siengj vunz daeuj saunyaux, gij doenghyiengh neix mwngz riuj baema ba.”

Fangh Vanj daj gwnz laeuz yawj roengzbae, raen bouxgvan gonq naiq- nueknuek roengz laeuz, gwih hwnj gyaq cimozdoz gaeuq naeuh haenx yied bae yied gyae, sim naemj: Cungj naeuz max ndei mbouj gwn nywj dauqlaeng, gou yienznaeuz mbouj dwg maz max ndei, nyumq nywj dauqlaeng neix gou baenzlawz hix mbouj gamj caiq gwn lo, hix mbouj nyienh caiq bae gwn lo.

Seiq

Vah caiq gangj dauq, seizneix ceiq youqgaenj couhdwg bit cienz Lingzlingz baenzbingh haeuj yihyen ciq bouxwnq, seizneix bae gyawz ra ngaenz boiz hawj vunz gonq. Fangh Vanj sawqmwh fwt siengj daengz Daegmienz. Daegmienz caeuq Fangh Vanj caemh mbanj, dingq vunz naeuz geij bi neix daeuj de youq Sinhcin guh baenzgwn lai lo, youq gizhaenx gaenq cawx ndaej geij dauq ranz, haeujok miz geij aen ciiq doxlwnz hai ne.

Naemj daengz Daegmienz, Fangh Vanj nyaenx mbouj ndaej guhcaeg riu hwnjdaeuj.

Seizde Fangh Vanj ndaej 5 bi, Daegmienz ndaej 3 bi, Daegmienz maj ndaej mbouj ndeiyawj geijlai, hoeng gig ganq de. Baez he, gyoengq lwgnyez caez comz youq giz ndeu guhcaemz gaeuq le, caezgya couh naengh youq gwnz aen daengqfaex raez ndeu faen mak gwn. Daegmienz doiq gyoengq nyezdoih naeuz:“Gwn mak couh gwn mak, aeu faen lai di hawj Fangh Vanj, danghnaeuz byawz mbouj dingqgangj, gou couh fak de.”

Loq hung di haeuj hagdangz doegsaw le, Daegmienz caeuq Fangh Vanj vanzlij guhcaemz ndaej gig ndei. Fangh Vanj caeuq Daegmienz haet- haemh itheij guhdoih bae hagdangz, danghnaeuz aen danci Fangh Vanj vaih le, Daegmienz couh doz de bae, gyoengq doih iq cungj riu songde caen lumj song gvanbaz iq. Yienznaeuz dwg vah loenghriu, Daegmienz caeuq Fangh Vanj dingq le, cix najhoengz daengz goekrwz bae. Mbouj rox Daegmienz dwg mbouj dwg lij geiq ndaej gij vah seiziq loenghriu neix.

Miz baez ndeu, songde caeuq gyoengq nyezdoih bae ndaw lueg langh vaiz, Fangh Vanj mbouj siujsim doek roengz ndaw dah bae. Fangh Vanj mbouj rox youzraemx, da yawj cij miz nyumq bwngyaeuj he fouz youq gwnz najraemx, yaek caem roengzbae lo. Gyoengq nyezdoih cungj hwk ndaej ndwn youq gwnz haenz hemqcaca, mbouj gamj roengz dah bae gouq. Couh youq seiz yungyiemj neix, Daegmienz “budung” sing he diuq roengz dah bae, haenqrengz rag dawz Fangh Vanj daengz gwnz haenz daeuj. Gienh saeh neix hawj Fangh Vanj baez naemj couh roxnyinh sim diemz- soebsoeb.

Majhung le, Daegmienz hix byaujsi doiq Fangh Vanj miz eiqsei gvaq, mbouj rox vihmaz, Fangh Vanj cungj roxnyinh de doiq Daegmienz mbouj miz maz cingzgyaez, it di hix mbouj doenghsim gvaq.

Fangh Vanj doiq Daegmienz naeuz:“Daegmienz, gou sijsaeq naemj gvaq, raeuz song boux mbouj habcik.” Daegmienz dingq le, gip ndaej muenx gyaeuj dwg hanh, gazgaz gwdgwd cam:“Vihmaz, dwg mbouj dwg gou……gou maj ndaej yakyawj, ndaw……ndaw……ndawranz gungz- hoj lai?”

“Mbouj dwg gijneix law.” Fangh Vanj laebdaeb naeuz, “Gou itcig dawz mwngz guh daegnuengx swhgeij, caiq- lix gou mbouj gyaez bouxsai beij swhgeij iq.”

Couh yienghneix, Fangh Vanj dauq yawj ndaej hwnj bouxgvan gonq, roxnaeuz de beij Daegmienz baenz- mbauq di? Roxnaeuz aen bak de raeuzrad rox gangj vah van vah diemz lox vunz angqyangz? Fanjcingq Fangh Vanj hix gangj mbouj ok vihmaz, roxnaeuz sojmiz dahsau nienzoiq seiz cungj doxdoengz, danghnaeuz laemx- sim gyaez boux vunz ndeu, byawz cungj beng mbouj dauq, guenj de dwg byawz, swhgeij gyaez couh ndaej. Hoeng cix liuh mbouj daengz song vunz byaij mbouj gvaq ciuh, gak vunz gak sanq giz. Danghnaeuz seizhaenx haq hawj Daegmienz youh baenzlawz yiengh ne? Danghnaeuz cij dwg danghnaeuz, Fangh Vanj mbouj gamj lai naemj roengzbae lo.

（caengz sat）