Moix bi liggaeuq ndwenngux cibngeih, doiq gyoengqvunz Gungh- cwngz Yauzcuz Swciyen ma gangj, caeuq ngoenznaengz cungj mbouj doxdoengz. Ngoenzde, gyoengqde aeu banh aen ciet hunghoengh heuhguh “miuhhoih Gvandaeq” haenx, vunzlai Gunghcwngz、gyoengqhek daj Guengjdoeng、Huznanz daeuj foed- foed, doxcomz Gunghcwngz camgya gij hozdung caeqbaiq、geiqniemh Gvandaeq.

Miuhfoux Gunghcwngz hix heuh Miuhgvandaeq, youq Mingzciuz couh laebbaenz lo. Bouxgun、Bouxcuengh caeuq Yauzcuz Gunghcwngz cungj gungq Gvanyij boux Samguek daih- ciengq mizmingz neix, cwng de guh Goengswngqfoux. Gunghcwngz miz aen cienzgangj ndeu, gangj naeuz bi ndeu mbwnrengx lai, gvaq baenz bak ngoenz cungj mbouj miz saek di fwn, reihnaz cungj rengx dwk dek bae, bouxvunz caeuq doenghduz ra raemx gwn cungj gig hoj. Doeklaeng, Goenggvan yienjlingz, doek fwn roengzdaeuj gouq le daihgya. Vihliux gyo’mbaiq de, vunzlai Gunghcwngz youq liggaeuq ndwenngux cibngeih cungj aeu caeq de, mbaenjgouz bingzan miz fuk.

“Bi ndeu siuj hoh, sam bi daih hoh” dwg gij cienzdoengj Gungh- cwngz miuhhoih Gvandaeq. Siuj hoh duzyou Goenggvan mbouj yungh ok dou, gyoengqvunz hix haeuj ndaw miuh bae siu yieng. Hozdung daih hoh hix lai hoengh lai nauhyied, cawzok gij yizsiz Gvandaeq cunzyouz, lij miz heiq cienzdoengj biujyienj、gyonghoih Bouxcuengh Majsanh、caij din venz Yungzsuij、diuzhaw baij gai gijgwn cienzdoengj daengj. Ndwen- ngux cib’it gyanghaet, gyoengqvunz Miuhgvandaeq Lijswvei caeuq geijcib vunz rox goengfou haenx riengz sing bauq goksat haeuj ndaw Gunghez- dienh bae, sam gvih gouj baiq le couh aeu raemx mbaw makbug cawj haenx ma hawj duzyou Goenggvan swiq ndang. Swiq ndaej le, gyoengq- vunz couh siu yieng gvihbaiq. Banringzgvaq, gyoengqvunz gien ngaenz hawj miuhhoih Gvandaeq haenx couh youq guengjciengz Miuh- foux、Miuhfaenz nda daiz gwnlaeuj, gingqhoh ngoenzseng Goenggvan. Gyanghaemh hix cingj gij heiqduenz ndawbiengz daeuj yienj heiq cienz- doengj. Yaek daengz lingz diemj, gyoengq beksingq dangdieg couh foenfoen daeuj siu yieng hawj Gvandaeq, mbaenjgouz Goenggvan baujyouh.

Ndwenngux cibngeih dwg miuh- hoih ngoenz ceiq hunghoengh ndeu. Gyanghaet caet diemj, gij sing bauq、sing gyong couh yiengj hwnjdaeuj, vunzlai hainduj baijcuengq doxgaiq、swiq fwngz siu yieng、goenggingq caencingz bae caeqbaiq、doeg cuk- faenz, itheij cuknyienh fwnraemx ndaej yinz、 biengz bingz an’onj. Gyanghaet gouj diemj, doih goengsae hoh saenz、doih geizlaisaek liengj- yiemh、doih fangeiz baizbenj、doih gyonglaz、doih lungzsae daengj 40 aen doih gyonj guh aen doih cunzyouz ndeu, humxhop duzyou Gvandaeq daj Miuhgvandaeq hwnj roen. Vunzlai dangdieg hix youq henz gai dingh gonq haenx nda cibgeij aen daizyieng ma dajcaeq, baij samseng caeuq gak cungj mak, youh nda’nduengq laeuj、youzcaz hawj doih cunzyouz caeuq bouxhek cimz. Duzyou Gvandaeq moix bae daengz aen diegcaeq ndeu, bouxlaux couh doeg cukfaenz, haenh Gvandaeq cungcig ngeihheiq、sim- cung mbeilaux, mbaenjgouz ndang- cangq、siucawz cainanh daengj. Gvandaeq cunzyouz dwg gij cungdenj miuhhoih Gvandaeq, diuzroen cunz- youz miz 8 goengleix gyae, guh baenz sam diemj lai cung, it loh siu yieng cit bauq、foux lungz foux saeceij, ndaw yienh rog yienh miz gyawj fanh boux hekyouz daeuj humxyawj, honghhaw honghgai vunz lai vunz daih、ndaet- ndaet yaenyaen, nauhyied dangqmaz.

Gij ciengzmienh fanh vunz caeqbaiq miuhhoih Gvandaeq Gungh- cwngz hawj bouxhek saenqdoengh, de dawz gij vwnzva Gunghcwngz nanaek haenx langhbaij hawj vunzlai yawj, hix hawj vwnzva swnghhoz gyoengq- vunz Gunghcwngz bienq ndaej engq lai yiengh. Bi 2010, Miuhhoih Gvan- daeq Gunghcwngz ndaej senj haeuj buek daihsam swcigih gaep feihvuzciz vwnzva yizcanj mingzloeg.