Yaepyet de couh heuh Meh- gveivah dawz aen daiz daemq ok rog dou bae an, bat noh hix deng senj bae gwnz daiz daemq lo, youh heuh Mehgveivah aeu 3 duix haeuxsan daengj gwnz daiz, lingh aeu duix raemx ndeu daeuj coq gwnz daiz, de dawz mbaw makbug ndeu ceh youq ndaw duix raemx, mbaw neix dwg de gag daiq daeuj. Youh raen goengdauh daj ndaw daeh dawz ok fag giemq ndeu daeuj coq gwnz daiz. Goengdauh youq ndaw 3 duix haeuxsan cang 9 diuz yieng. De naengh youq henz daiz, naj cienq coh dougyok, laeng cienq coh ndawranz. Goengdauh heuh daxgoeng naengh henz daiz baihswix, heuh Mehgveivah naengh henz daiz baihgvaz, guh gij hong daek laeuj、coemh sacienz daengj.

Goengdauh daj ndaw daeh dawz aen laz iq caeuq aen gyong iq ndeu okdaeuj, doq roq doq nam:“Mbwn miz lingz, deih miz lingz, baujyouh ranz singq Yangz an’onj. Cingj saenzmbwn saenzdeih、duzsien duzbaed、bohcawj dojdeih daeuj gwn laeuj gwn noh, daeuj lingx cienz lingx ngaenz lingx buhvaq, baujyouh ranz singq Yangz seiqgeiq bingzan, guh baenz gwn. Lawh ranz singq Yangz siu cai siu nanh, baujyouh ranz singq Yangz yienghyiengh swnh. Aj bak miz haeux gwn, iet fwngz miz ngaenz sou, ok haex ok nyouh bienq baenz gim, bouxboux gyaeu ndaej bak bi. Cingj fangz hung fangz iq、 iucing iu’gvaiq daeuj gwn laeuj gwn noh, daeuj lingx cienz lingx ngaenz lingx buhvaq, gwn imq ndoet doh lingx cuk le, sou dauqbae, mbouj ndaej daeuj saunyaux、goenjgeuj vunz ranz singq Yangz.” Gangj sat, ndoet gaemz raemx cimq makbug ndeu boq haeuj ndang daxgoeng bae, laebdaeb ndoet 3 gaemz, boq 3 baez. Youh dawz faggiemq youq dangqnaj、baih- laeng daxgoeng “raemj” geij baez.

De youh heuh Mehgveivah aeu aen duix ndeu caeuq aen geh ndeu daeuj, de dauj di youzdoengz roengz ndaw duix bae, diemj feiz, dawz duix feiz coq youq ndaw geh, naeuz:“Mbatneix raeuz bae gyaep fangz bw! Haeuj ranz bae gyaep gonq.”

Goengdauh fwngzswix dawz geh, fwngzgvaz gaem giemq, Mehgveivah dawz duz ma’gyaj byaij riengz baih- laeng de. Goengdauh doq byaij doq vanghvax faggiemq, aen bak de nam mbouj dingz, nam coenz maz bouxwnq mbouj rox, cij miz de gag rox.

Ndaw rug、bakdangq, guggug gehgeh de gyaep caez lo. Ndawranz “swiq seuq” le, youh ok rog ranz bae gyaep. De heux aenranz byaij 3 hop, couh coh dougyok byaij bae. Youq baihrog dougyok, de dawz aen duix feiz boek dauq, aengeh goemj roengz gwnz duix bae, naeuz:“Iucing iu’gvaiq gyaep bae caez lo, gij bingh daxgoeng ranz mwngz gig vaiq couh ndaej ndei lo, mbouj you ndwi. Vaiqdi bae sousib doxgaiq gwnz daiz, gou lij yaek bae song ranz ‘gaijsaeh’ dem.”

Mehgveivah naeuz:“Cawj haeux- ringz gwn gonq ha.”

“Mbouj bienh gwn ringz lo, lau hong ngoenzneix guh mbouj sat.” Goengdauh naeuz.

Bit、gaeq、nohmou cungj aeu baen dingz ndeu hawj goengdauh, 3 duix haeuxsan cungj hawj de caez. Goengdauh dawz gij doxgaiq neix cug gwnz rieng mohdozceh couh hai baenaj lo.

Mehgveivah cienq ndang dauq coh daxgoeng cam:“Goeng, mwngz raen ndang ndei saekdi caengz?” Daxgoeng han:“Caengz, mbouj ndaej ndei baenzlai vaiq ba?”

“Mwngz ndeindei yietnaiq nw, gou yaek bae doengh guh hong lo.” Mehgveivah naeuz.

Haemhde gwn caeuz seiz, gij bingh daxgoeng lij lumj yienghgaeuq ne.

Haet daihngeih, Mehgveivah cawj ngaizromh ndei le heuh daxgoeng hwnqdaeuj gwn, cij ndaejnyi dax- goeng “o o a a ” han geij sing. Gvaq le yaep he, sawqmwh ndaejnyi “byoeb” sing ndeu, lumj maz doxgaiq naek doek nei. Mehgveivah haeuj rug daxgoeng bae yawj, cij raen daxgoeng laemx youq bakmbonq, song cik ga song cik gen caeugaen, bak de beij ngoenzlwenz engq guiz, myaiz engq yag, gangjvah engq mbouj baenz coenz.

Raen yienghneix, Mehgveivah simvueng lo, saeknaj bienq heu caez, de buet okrog bae yaek heuh ranznden daeuj bang fwngz. Dingjlingz, Vuz suhgi boux ganbu banggungz byaij daengz dougyok, Mehgveivah lumj- baenz gaem ndaej diuz fiengz gouq- mingh nei, buet gvaqbae couh nengh gen Vuz suhgi naeuz:“Suhgi, mwngz vaiqdi bae yawj daxgoeng ranz gou, de laemx youq bakmbonq……”

Vuz suhgi yawj gvaq le naeuz daxgoeng aiq dwg baenz bingh- mauhfung, aeu sikhaek soengq bae yihyen.

Mehgveivah baez dingq simgip ndaej yaek daej bae, naeuz:“Hoeng, hoeng, gwnz ndang gou mbouj miz saek faen cienz.”

“Mbouj youqgaenj ndwi, ranz mwngz dwg ranzgungzhoj, ndaej yiengjsouh ‘sien ywbingh laeng gyau cienz’ aen cwngcwz neix.” Vuz suhgi nai.

Mehgveivah naeuz:“Ngoenzlwenz heuh bouxdauh daeuj gyaep fangz caeuq ‘swiq ranz’, sai cienz bae caez lo.”

“Sou bamz lai, bae saenq boux- dauh bouxgimq! Gyoengqde rox ywbingh ha? Gyoengqde dwg yaeuh vunz aeu cienz ndwi. Mbouj gangj baenzlai lo, daeuj, caeuq gou ram daxgoeng hwnj ci gou bae, raeuz bae yihyen gonq.”

Youq yihyen ndaw yienh guh gvaq geij yiengh genjcaz le, canghyw naeuz dwg binghmauhfung, lij naeuz caiq ceiz di soengq daeuj couh nanz gouq lo. Mehgveivah dingq le couh naeuz:“Gyo’ndaej Vuz suhgi ngamq daeuj daengz, mboujne……” De baez siengj daengz goengdauh yaeuh aeu gij cienz bae, youh sim’in youh hozndat.

Ngoenz daihsam, daxgoeng ndei di lo, genga mbouj caeugaen lo, myaiz hix mbouj yag lo, hoeng, caengz byaij ndaej maenh, gangjvah lij miz di mbaj.

Haemh de, youh miz boux vunz- bingh ndeu haeuj ranzbingh daeuj, caeuq daxgoeng caemh fuengz. Boux neix ninz youq gwnz gyaqram, swenj- nga’nga hemq dungx in, hemq dai hemq lix, sing hemq gingdoengh daengx caengz laeuz. Miz geij boux vunzbingh roxnaeuz vunzranz boux- bingh ranznden binghfuengz daeuj bakdou ngonz.

Mehgveivah nyinhnaeuz sing hemq neix haemq sug, sijsaeq cim baez he, laxlawz dwg goengdauh haenx, cij raen de naj heu hanh conh. Mehgveivah ndawsim caegriu.

Husw haeujhaeuj okok, dag hezyaz, daeq bwn goekga, cap guenj- nyouh, dawz buh bouxbingh daenj daeuj heuh de rieg, naeuz yaek guh soujsuz. Mbouj geij nanz goengdauh deng vunzranz caeuq husw soengq okbae lo.

Gyanghwnz goengdauh cij dauq ranzbingh. Haet daihngeih de baez ndiu dauq, Mehgveivah couh dongx de:“Goengsae, mwngz geiq ndaej dou lwi?”Goengdauh yawj le yawj, ngaekngaek gyaeuj, mbouj guh sing, gig vaiq couh dawz naj veq gvaq mbiengj he bae. Mehgveivah baenz- lawz cuengq gvaq de, byaij daengz henz mbonq de naeuz:“Mwngz mbouj dwg naeuz mwngz ak la? Rox gyaep fangz ywbingh, iucing iu’gvaiq cungj lau mwngz caez, mwngz vihmaz mbouj hawj swhgeij gyaep、mbouj yw bingh swhgeij ni? Lij daeuj yihyien ywbingh?”

“Boh, mwngz lij guhdauh ha? Gou daengq gvaq mwngz lai baez, mbouj cinj mwngz guhdauh, mwngz dawz gij vah gou guh rumz henzrwz ha?” Daeglwg goengdauh dajduenh vah Mehgveivah, sawqmwh swenj naeuz, haep ndaej Mehgveivah doek- saet bae.

Goengdauh naeuz:“Neix dwg saeh geij bi gonq lo, geij bi neix daeuj, gou gaenq mbouj guh lo. Mwngz vaiq bae cawx ngaizromh hawj gou gwn, gou dungx iek.” Daeglwg de cijndei okbae lo.

Daeglwg baez okbae, goengdauh sing daemq doiq Mehgveivah naeuz:“Gou doiq cienz dauq hawj sou. Lwg gou caeuq lwgbawx gou dwg ganbu guekgya, songde mbouj hawj gou guhdauh, danghnaeuz songde rox gou lij guhdauh, couh ndaq dai gou bw.”

“Mwngz hab ndaq! Mwngz hab dai! Byawz heuh mwngz guhdauh yaeuh vunz aeu cienz ne!” Meh- gveivah ndaq.

Goengdauh naeuz:“Cungj saeh neix mbouj dwg gou boux dog guh ndaej baenz ha? Boux he nyienh cingj boux he nyienh guh!”

Mehgveivah dingq daengz neix itseiz mbouj rox gangj maz lo.

Daxgoeng ciep vah goengdauh naeuz:“Aenvih mwngz bingzseiz dauqcawq gangjboq naeuz mwngz maenh’ak, rox gyaep fangz rox ywbingh, vunz cij saenq mwngz, cij cingj mwngz. Mwngz naeuz fangz muz gou, cijaeu gyaep gij fangz bae, gij bingh gou couh ndei lo. Hoeng, mwngz gyaep gvaq le, gij bingh gou mboujdan mbouj ndei, lij yied daeuj yied naek dem. Neix mbouj dwg yaeuh vunz dwg maz?”

Goengdauh dingq le mbouj miz vah gangj lo.

Youq rog ranzbingh, Mehgveivah laeglemx lwnh hawj daeglwg goeng- dauh naeuz:“Boh mwngz itcig guh- dauh ne, yaeuh vunz aeu cienz. Song ngoenz gonq gou ngamq deng de yaeuh bae 820 maenz.”

Daeglwg goengdauh maenjheuj naeuz:“Caj de okyen dauqranz gonq, gou couh sousib de. Cienmonz guh gij saeh saetnaj haih vunz, gou mbouj cuengq gvaq de. Gij cienz de yaeuh mwngz gou boiz hawj mwngz. Doiq mbouj gvaq sou lo.” Gangj sat couh mbon ok ngaenzbau.

Mehgveivah bi fwngz naeuz:“Mbouj yungh lo, boh mwngz gaenq boiz dauq hawj gou gvaq lo.”

Ngoenz daihngeih, daeglwg goengdauh dawz mbaw gaj moq soujgih ndeu daeuj vuenh mbaw gaj gaeuq soujgih daxboh de, dawz mbaw gaj gaeuq gveng roengz cingjhaex bae, lij hat boh de naeuz:“Daj seizneix hwnj, danghnaeuz mwngz lij guhdauh, gou mbouj leixlangh mwngz, mbouj hawj mwngz ciengxlaux, caih mwngz baenzlawz baenzde, mbouj saenq mwngz couh yawjyawj. Daengz seiz- haenx heuh duzfangz daeuj hawj mwngz ciengxlaux. Okyen le youq ndaw singz caeuq dou caemh youq, mbouj cinj mwngz dauqbae ranzcoj youq……”

（sat）