Siu Cuh dauqfuk le, gaenq caem roengzdaeuj, saeknaj hix menhmenh hoengzmaeq.

“Ngoenzlwenz gou youq gwnz bya neix ra le buenq ngoenz.”

“Ra maz?”

“Ra mwngz ha!”

“Laihdai!”

Siu Cuh youh naengh roengzbae lo, dawz aen lwgmaenz ndaw mauh- diemx okdaeuj vut hawj de, laebdaeb gwn ceiz.

Lungz Byauh coux gvaq lwg- maenz, roengzrengz gveng youq gwnz- namh.

“Guh maz? Mwngz mbouj gwn?” Siu Cuh doeksaet muengh coh de.

“Cungj dwg aen lwgmaenz naeuh neix, yiemjyiemj nguh saeh!”

“Mwngz gag guh saeh loeng, lij gvaiq neix ienq de.”

“Ngoenzlwenz deng iek, ngoenz- neix laihnaeuz daiq geij aen lwgmaenz daeuj couh mbouj deng iek lo, liuh mbouj daengz ok loek lo.”

“Boux vunz mwngz caen bamz, daeuj guh maz?”

“Daeuj yawj mwngz gvej nya ha!”

“Miz maz ndeiyawj?”

“Gou roxnyinh mwngz gig sin- hoj!”

Siu Cuh ngiengxgyaeuj cim de, gig gyo’mbaiq de.

“Ngoenz baenzneix ndat——” Lungz Byauh namnam gangj, youq dangqnaj Siu Cuh maeuq roengzdaeuj,“Siu Cuh, gou youq gwnz gofaex yied yawj yied simget ne!”

“Vahbyangz!” Siu Cuh najmong ndaej gemj maeqfwdfwd, lwgda cienj bae yawj gizwnq laebdaeb gwn ceiz,“Byawz aeu mwngz simget?”

“Gou dwg gangj lauxsaed, danghnaeuz mwngz nyienh, gou siengj bang mwngz guh.”

“Vah gangj ndaej dauq van, mwngz caeux couh wnggai roengz- daeuj bang gou guh lo!”

(caengz sat)