Gou diuh daengz gyauyuzgiz gaenq ndaej haujlai bi lo. Ngoenz ndeu banhaet gwn haeuxromh seiz, gou caeuq doengzsaeh bae daengz aen hagdangz ndeu genjcaz hong son- gyauq.

Dou baez gvaq aen henz cueng gyausiz, raen geij boux hagseng yungh gyaeq dumq dek sanq le daeuj guh- angq “hoenxciengq”, lij miz mbangj ndingq gij cijvaiz youq gwnz daizsaw dem. Gou raen le sim fwt suk, gyoengq hagseng vihmaz baenzneix ne?

Raeuz rox, Gozvuyen gietdingh daj bi 2011 haggeiz seizcou hwnj, hengzguh gij giva gaijndei gwnbouj hagseng ndaw yivu gyauyuz youq lajmbanj, youq gij digih daegbied gungzhoj, hawj moix boux hagseng youq yivu gyauyuz moix ngoenz 3 maenz bangbouj haeuxgwn yingzyangj, maqmuengh ndaej hawj gyoengqde ndangcangq ndangnoengq. Baihgwnz baenzneix haeujsim daihlaeng ndaej ndeindei majhung, vihneix sai le geijlai rengz sai le geijlai ngaenz, hoeng, mizmbangj hagseng lij mbouj insik saekdi!

Ngeix daengz gaxgonq gou doeg siujyoz seiz, hagdangz diuzgen yaez lai lo. Mwhde gou youq ndaw mbanj doeg sat siujyoz sam nienzgaep, couh deng hamj gvaq rungh daengz mbanj wnq 10 lai leix gyae doeg seiq nienzgaep. Hagdangz rug youq mbouj gaeuq, gou cij ndaej dauqranz youq. Cuengqhag le buet maranz, haetlaeng 5 diemj cung hwnqdaeuj cawj haeux, cawj baenz le gwn buenq, ce buenq dawz bae hagdangz daengz banngaiz gwn.

Haggeiz daihngeih, hagdangz miz di diegmbonq hoengq, dou ndaw mbanj geij boux doengzdoih daezgonq haihag geij ngoenz bae dingh mbonq. Gig nanz cij dawz mbinj bae dingh ndaej gek ndeu. Gij mbonq haenx dwg benj raez bu baenz, baen guh gek, boux hagseng boux gek, it gek ngamq bu roengz fan mbinj ndeu. Rug youq dwg ranzvax, song mienh mbouj miz ciengz, mbouj miz cueng, doek fwn soen mbin daengz, ok ndit ndit cik daeuj. Ciengzseiz gyanghwnz fwn doek byajraez le, mbonq deng fwn soen dumz, daengx hwnz mbouj ndaej ninz.

Seizde hagseng youq hagdangz mboujdan ninz mbouj an’onj, gij gwn lij noix dem. Gyanghaet dou cungj mbouj miz haeuxromh gwn. Banhaet hwnqdaeuj gag cang haeux byaek youq habhaeux caeuq goujcungh, seizde hagdangz caengz doeng swlaizsuij, ndigah aeu dawz bae henz rij cat le soengq bae daengz sizdangz naengj. Haeux byaek cungj dwg gak boux gag daj ranz dawz daeuj. Dingzlai vunz dawz gij haeux dwg haeuxyangz, mbangj muh baenz naed iq, mbangj muh baenz mba. Aenvih mbouj ndaej boq, naengj baenz gij raemz gyaux youq ndaw haeux, hoj gwn dangqmaz. Gij byaek ciengzseiz dwg duhhenj, daj sizdangz lingx daeuj le gyaux di youzmou couh gwn, mizseiz ndaej naengj saek donq gvalad roxnaeuz duhnoh couh roxnyinh ndeigwn raix- caix, lumj ndaej gvaqcieng nei.

Seizde youq hagdangz cungj mbouj ndaej gwn byaekheu, engq mbouj gangj gwn noh lo. Ranz lawz fouqmiz di danghnaeuz bohmeh hawj geij gaiq nohmoulab daiq daeuj, cuengq song gaiq caeuq haeux caez naengj, gwn seiz daengx aen diegyouq homfwdfwd caez, hawj bouxwnq ndwnj myaiz mbouj dingz, gig hozhaenz. Hoeng cang noh bae naengj seiz mbouj ndaej hawj bouxwnq raen, cuengqhag lij aeu bae caeuxdi, mboujnex couh deng caeg bae lo. Baez he boux hagseng deng vunz caeg aen habhaeux naengj nohlab bae, raemxda rih mbouj dingz, ca di daej ok sing daeuj.

Ceiq simfanz dwg sizdangz hag- dangz ciengzseiz naengj haeux mbouj cug, yaucangj naeuz dwg aenvih haeux lai cauq iq, yozyau youh mbouj miz cienz gaijgez, yienghneix dou hagseng couh deng nanh lo. Baez cuengqhag gyoengq hagseng doxnap ndaej gyaeuj yaek dek bae cij raen habhaeux cihgeij. Mizseiz doxciengj lai gij byaek ndaw goujcungh deng boeg okdaeuj caez, donq de couh mbouj miz byaek gwn lo. Seiz haeux mbouj cug, dou dawz habhaeux vut haeuj ndaw cauq naengj haeux aeu bohfeiz daeuh ndat hoemq, gvaq buenq aen cungdaeuz cij gwn, danghnaeuz deng boeg roxnaeuz feiz mbouj gaeuq, donq de couh mbouj miz gwn lo, baenzneix ciengzseiz deng dungx iek.

Sizdangz hagdangz naengj haeux mbouj cug, hoeng hagseng gyau fwnz moix boux moix haggeiz 500 gaen cungj mbouj noix saekdi. Ndawranz mbouj ndaej bang gyau, dou cij ndaej daengz banhaemh cuengqhag le hwnj bya dwk, gag gwed ma ndaw ban gyau hawj swnghhoz veijyenz, gij fwnz gak ban gak soucomz. Yozyau anbaiz ngoenz song boux hagseng fucwz bae sizdangz naengj haeux, lwnz daengz ban lawz ban de ok fwnz.

Seizneix caeuq seizde mbouj doxdoengz lo! Guekgya hawj gyoengq hagseng gak cungj gak yiengh bang- bouj. Hagseng youq lajmbanj ndaw yivu gyauyuz ndaej boux ngoenz 4 maenz ngaenz bangbouj gwn haeux. Caemhcaiq hagseng ranz gungzhoj ndaw yivu gyauyuz ndaej boux bi 800 maenz gwndaenj bangbouj, gij youq caeuq gobwnj mbouj aeu sai saek faen cienz. Yienghneix, gyoengq hagseng youq ndaw yivu gyauyuz haeujhag mbouj aeu sai geijlai cienz. Sizdangz moix ngoenz miz canghdajcawj daj- cawj, ngoenz 3 donq mbouj siuj. Haeuxromh miz faenj、haeuxcuk miz noh, roxnaeuz gyaeq dumq caeuq cijvaiz, donqringz caeuq haeuxcaeuz miz noh miz byaekheu miz raemxdang, rangfwt dawzbak.

Gyoengq hagseng seizdaih neix gig vuenyungz ha! Gvaiq mbouj ndaej vunz cungj naeuz lwgnyez seizneix lumj “duzgaeq doek loz haeuxsan” nei mbouj youheiq gijgwn.

Dauqngeix gijneix, gou gig siengj son’gyauq gyoengq hagseng mbouj insik gijgwn neix! Baenzneix, gou couh sikhaek yamq vaiq byaij haeuj ndaw gyausiz bae……