Youq Cungguek, Yauzcuz dwg aen minzcuz vunz noix gig lauxgeq hix hojrox ndeu, gyoengqvunz Yauz- cuz cawjdaeuz youq laeng diegbya Yinznanz、Guengjsae、Huznanz、Guengjdoeng、Gveicouh youqdingh, liz hawsingz gyae, ndoengfaex mwncupcup, gij vwnzva de conz- dungj、sengcingz dingzlai cungj lij ce miz. Ndawde, gij fungsug baenzgya couhdwg aen daegsaek hung ndeu. Doiq Bouxyauz ma gangj, haenx dwg aen laexsug baenz seiqvunz ceiq youqgaenj ndeu. Gij lizsij de nanzgyae, youh daegbied youh hojrox.

Gyonj hwnjdaeuj gangj, gak dieg Yauzcuz gij bouhloh baenzgya daih- gaiq cungj doxdoengz: Soengq cin、doiqfwen、daej haq、couxyah、baiq- dangz daengj. Bi 2018 ndwen 10, gyoengqvunz Yauzcuz daj Yangzsoz、Lungzswng、Yungjfuz、Fuconh、Bingzgvei Gih、Bazbu Gih daeuj laeng Gveilinz Yungjfuz Yen camgya aen hozdung langhbaij gij fungsug baenzgya Yauzcuz hoenghhwd ndeu, miz Yauzgvaqbya、Yauzbingzgyaeuj、Yauzbingzdeih、Yauzdoj、Yauzbuenz、Yauzhoengz、Yauzva daengj gak nga Yauzcuz daeuj camgya hozdung. Gij fungsug baenzgya langhbaij daj ngoenzde gyanghaet 9 diemj cung hainduj, guh baenz diemj lai cung cij sat, aen doih soengq cin miz 200 lai vunz, gyoengqde daenj buhvaq Yauzcuz, baez okdaeuj cix yinx hauj- lai hekyouz humxyawj.

Hoeng aenvih Yauzcuz faensanq youq gak dieg, doxliz gyae, ndigah gij fungsug baenzgya gyoengqde caemh lij miz di mbouj doxdoengz dem, lumjbaenz laeuj daizraez Hocouh、fwen buenxhaq Gunghcwngz daengj. Laeuj daizraez dwg Yauzdoj Hocouh aen daegsaek hung baenzgya ndeu, doenghbaez cungj yaek aeu gwn baenz song ngoenz sam hwnz cij ndaej, doeklaeng gaij baenz ngoenz ndeu hwnz ndeu, hoeng gij yizsiz lij mbouj bienq. Gij daiz daengq laeuj daizraez dwg cienmonz aeu ma banh gij laeuj neix, aeu doenghgij benj 2 mij raez haenx doxdaep hwnjdaeuj, guh faj najdaiz 60 lizmij gvangq ndeu, baihlaj aeu daengqfaex daeuj daemxcengj, yienghneix couh dawz baenz faj baenz faj najdaiz lienz hwnjdaeuj. Daengz gokvan hix van, daj ndaw ranzding nda daengz lajroq baihrog. Miz geijlai vunz daeuj gwn laeuj, aen daizlaeuj couh nda geijlai raez. Baez haeuj daiz, bouxcawj iu bouxhek naengh roengzma le, boux- laux ndaw coengcug couh ciengq fwencouxhek, bouxcawj hix yiengq bouxhek gingqlaeuj. Sing fwen yiengj hwnjdaeuj le, couh mbouj rox daengx lo, gou dingz mwngz ciengq, mwngz dingz de ciengq. Bouxmbauq caeuq dahsau doq ciengq doq nip byaek hawj bouxhek. Yienznaeuz haujlai bouxhek dingq mbouj rox gij fwen dwg eu gijmaz, hoeng daj gij riu angqyangz bouxcawj couh rox haenx dwg aen minzcuz gig yiedcingz、daihhek ndei、hix swnzsienh sim ndei ndeu.

Linghvaih, mbangj dieg laeng Gunghcwngz Yauzcuz Swciyen, baez miz dahsau yaek okhaq couh aeu eu fwen buenxhaq. Fwen buenxhaq caemh heuhguh golabva roxnaeuz gobuenxlaeuz. Bawxmoq lij caengz lizhai ranzmeh seiz, gyoengq caencik baengzyoux、bouxhek (baugvat gij vunz bouxsai daeuj ciep bawxmoq haenx) caiqlij bawxmoq swhgeij cungj youq aen ranzfwen ndaw ranz doiq fwen. Gij neihyungz fwenbuenxhaq dwg daegdingh he: Ciengq gij aencingz bohmeh、ciengq go mbouj sij hawj beixnuengx baengzyoux、ndaq aeuyah haqsau baubanh、ienq yahmoiz、 gyo’mbaiq bouxhek ciep bawxmoq、 fueng bouxsai caeuq fueng bouxmbwk doxcam doiqciengq daengj. Gij doiqsiengq、neiyungz fwen mbouj doengz, gij cingzgamj couh riengz de hwnjhwnj roengz- roengz、bienq bae bienq dauq.

Gij daegsaek baenzgya Yauzcuz gig naek, dwg aendap Yauzcuz doxaeu、gyau baengzyoux、doxgyau vwnzva youqgaenj ndeu. Bi 2010, gij fungsug baenzgya Yauzcuz Hocouh Bazbu Gih caeuq Gunghcwngz Yauz- cuz Swciyen ndaej senj haeuj swcigih gaep buek daihsam feihvuzciz vwnzva yizcanj mingzloeg.