“Goeng, ngaizromh cawj ndei lo, hwnqdaeuj gwn ba.” Mehgveivah naeuz.

“O, bae——bae lo.” Daxgoeng han.

Mehgveivah daek souh daek byaek ce gwnz daiz le, cienqndang byaij coh rog dou, gizde miz doengj buhvaq vunz ranz haemhlwenz rieg caengz ndaej saeg, de naengh gizde din fwngz riengjret saeg buh. Sing “cici coco” daj ndaw rug daxgoeng cienz daeuj, haemq nanz daxgoeng cij byaij ok rug, rag haiz “getget” byaij coh henz daiz.

Sawqmwh “gvangh dangh” sing ndeu. Mehgveivah ngeuxgyaeuj dauq yawj coh ndawranz, gaendwk sikhaek buet haeuj ranz bae, cij raen duix souh dwk soiq youq gwnznamh, gouhdawh ga ndeu youq gwnz daiz, lingh ga doek laj daiz, souh yag gwnz daiz youh yag gwnznamh. “Goeng, mwngz baenz maz ne?” Mehgveivah cam.

“Gou hix mbouj rox ni. Haetneix hwnqdaeuj, song fwngz song ga mbouj miz rengz, fwngz cungj saenz, gaem maz cungj mbouj baenz, gaem duix hix dwk doek lo.” Daxgoeng gangj vah miz di mbaj, caeuq bingzseiz mbouj doxdoengz.

Mehgveivah daj gyaeuj daengz din cim daxgoeng mbat ndeu, caen dahraix, daxgoeng song fwngz saenz- dedded, bak de miz di guiz, lij myaiz yag dem. Mehgveivah geizheih lai lo, de doq sousib doq naeuz:“Fwt baenz yienghneix lau dwg fangz doz nw, gou aeu heuh bouxdauh daeuj yawjyawj cij ndaej.”

Mehgveivah mbon ok soujgih, baez dwk couh doeng lo:“Vei, goeng- sae, gou dwg Mehgveivah Mbanj- nazndoi, daxgoeng ranz gou miz di saeh, cingj mwngz daeuj yawjyawj, ndaejhoengq lw?”

Goengdauh naeuz:“Ndaej, yaep dem couh bae.”

“Ndei, gou youq ranz caj mwngz.” Mehgveivah sim’angq raix- caix, goengdauh mbanjnden neix nyaengq lai bw, dingqnaeuz ca mbouj geijlai ngoenzngoenz miz vunz heuh de bae ranz “gaij saeh”, ngoenzneix baez heuh de couh ndaej daeuj, Meh- gveivah baenzlawz mbouj angq ne?

Daxgoeng gwn imq le naeuz naiq lai haeuj rug bae yiethwet. Meh- gveivah dawz douranz haep dauq, bae aen bouq gai huq ndaw mbanj cawx yieng、ngaenzceij doenghgij neix.

Yaepyet, goengdauh daengz lo, de hai mohdozceh cigsoh cung daengz ranz Mehgveivah, raen douranz haep, namboedboebd naeuz:“Mbouj dwg naeuz youq ranz deq gou ma, vunz mbouj youq ranz dou haep! Neix mbouj dwg nguh saeh gou ma? Ngoenzneix gou aeu “gaij saeh” 3 ranz bw!” De ngamq yaengx fwngz yaek roq dou, baihlaeng couh cienz daeuj sing gangj.

“Goengsae mwngz daengz la.” Mehgveivah ngamq dauq daengz dou- gyok, “Gou bae cawx yieng ceij.”

“O! O!” Goengdauh han.

Mehgveivah doq hai dou doq naeuz:“Haeuj ranz naengh, haeuj ranz naengh gonq.” De aeu daengq hawj goengdauh, youh ciep aeu aen daeh naekwt goengdauq aemq ce gwnz daiz, de byaij bae dou rug daxgoeng hemq:“Goeng, hwnqdaeuj nw, goengsae daengz lo.” Daxgoeng han naeuz:“O, daeuj lo.”

Goengdauh cam:“Daxgoeng ranz mwngz baenzlawz?”

Mehgveivah naeuz:“Haemhlwenz de lij ndeindei ne, haetneix hwnq- daeuj couh ndwn mbouj maenh, byaij soenxsax, gen ga mbouj miz rengz, fwngz saenz myaiz rag.”

“O, yienghneix ha.” Goengdauh naeuz.

Haemq nanz, daxgoeng cij ok ndaej dou rug daeuj, goengdauh yawj daxgoeng coh cihgeij byaij daeuj gaeuda nyaeuq mbat ndeu. Meh- gveivah aeu aen daengqdaemq ndeu baij youq dangqnaj goengdauh, hawj daxgoeng naengh.

Goengdauh cim naj daxgoeng, cam:“Goeng, mwngz raen gyaeuj ngunh lwi?” Daxgoeng naeuz:“Gyaeuj ngunh da raiz, gen ga mbouj miz rengz.”

Goengdauh heuh daxgoeng iet linx ok bak daeuj hawj de yawj, youh heuh daxgoeng iet soh song cik gen hawj de yawj, sat le, de ngauxngaux gyaeuj, mbouj guhsing. Yaep he, goengdauh naeuz:“Aeu betcih daeuj gou yawjyawj.”

Mehgveivah muengz bae aeu betcih daxgoeng daeuj hawj de, cij raen goengdauh gaenq dawz ok 3 bonj saw haemq na baij gwnz daiz. De yawj gvaq betcih le, yaep he bienj bonj neix yawjyawj, yaep he bienj bonj haenx lahlah, seiz mbouj seiz lij yaepyaep lwgfwngz dem.

Moix bonj saw de bienj geij baez gvaq le, naeuz:“Daxgoeng minghfeiz, mingh de daiq 4 gong feiz, gij feiz neix bi beij bi haenq, gong beij gong haenq. Seizneix gij feiz neix coemh ndaej de gyaeuj ngunh da raiz ndang haw. Daxgoeng bineix ndaej 69 bi, miz vah naeuz ‘minghfeiz loegcib gouj, bet fangz gouj gvaiq daeuj fouj, duzmoed deq gwnz laeuj’, lau daxgoeng nanz ndaej gvaq aen gvan neix lo.”

Daxgoeng baez dingq haeujaw lo. Mehgveivah baez dingq gip lo, cam:“Baenzlawz guh mo cijndei?”

Goengdauh naeuz: “Aeu gyaep gij bet fangz gouj gvaiq neix bae seuq, daxgoeng couh ndangcangq lo.”

Mehgveivah naeuz:“Hauhneix vaiqdi gyaep vei!”

Goengdauh naeuz:“Gyaep fangz aeu miz doxgaiq cij rox gyaep ha, fwngz hoengq gyaep ndaej gyoengqde bae ha?”

Mehgveivah cam:“Aeu maz dox- gaiq, mwngz naeuz.”

Goengdauh naeuz:“Duzgaeq doj、duzbit doj caeuq 3 gaen nohmou, cungj aeu dumq cug, duz maningq lix ndeu.”

Mehgveivah naeuz:“Bit gaeq ndawranz ciengx miz, nohmou ndaw mbanj miz gai, hoeng, maningq nanz ra di bw, gou bae cam vunzmbanj ranz lawz miz maningq gai gonq.” Gangj sat couh baenq ndang yaek okdou.

Goengdauh naeuz:“Dauqdaeuj, dauqdaeuj, aeu gij yieng ceij mwngz cawx daeuj hawj gou raed, bwh ndei gonq.” Mehgveivah naeuz:“Deng, deng!” De dawz gij yieng ceij hawj goengdauh le, youh cam daxgoeng:“Goeng, mwngz ndaej bang gou caux feiz ndat raemx lwi? Yaep dem gou dauq couh ndaej gaj bit gaj gaeq lo.”

Daxgoeng naeuz:“Ndaej ne, gou menhmenh guh.”

Mehgveivah naeuz:“Mwngz siuj- sim di nw. Guh ndaej couh guh, guh mbouj ndaej cixbah.”

Mehgveivah byaij daengz bakdou le, youh cienq ndang dauq naeuz:“Goengsae, mwngz bang gou ciuqgoq daxgoeng gou yaep he nw!”

Goengdauh naeuz:“Ndaej, ndaej, mwngz cuengqsim bae ba, vaiq bae vaiq dauq.”

Mehgveivah haeuj gyok dem gyok, cam ranz riengz ranz, cungj mbouj miz ranz lawz miz maningq gai. De cawx nohmou le couh maranz lo. Yamq haeuj dou seiz, aen naj de nyaeuq lumj aen lwghaemz nei, naeuz:“Goengsae, ndaw mbanj mbouj miz ranz lawz miz maningq gai, bae haw cawx youh gyae lai, baenzlawz guh?”

Goengdauh naeuz:“Yienghneix aeu ngaenz daeuj dingjlawh duzma ba, yaep dem gou aeu ceij daeuj raed guh duzma.”

Mehgeivah cam:“Aeu geijlai ngaenz?”

Goengdauh naeuz:“Bak maenz he, mbouj aeu mwngz lai!”

Mehgveivah cam:“Laexceih guh mo ne, geijlai?”

Goengdauh naeuz:“Yawj bingh daeuj sou laexceih, binghmbaeu sou 360 maenz, binghnaek sou 720 maenz. Daxgoeng mwngz suenq ndaej bingh- naek, gij fangz gvaiq daeuj muz de daiq lai lo, aeu gyaep deuz, youh aeu ndaep 4 gong feiz ndaw ndang de, mboujnex gij feiz haenq neix coemh de da mengz、rwz nuk、bwt dek bae bw, hong gig lai!”

Mehgveivah ndawsim yiemz goengdauh aeu bengz lai, hoeng, mbouj gamj oksing.

Goengdauh raen de lawq, couh gyaep de naeuz:“Vaiq bae gaj bit gaeq, gou deq gij doxgaiq neix daeuj gyaep fangz.”

Mehgveivah naeuz:“Gou mbouj miz baenz lai cienzyienh youq ndang bw.”

Goengdauh naeuz:“Veihsin hawj gou hix ndaej ne.” De daj ndaw daeh mbon ok mbaw baiz, baihgwnz miz aen wveizmaj sou cienz ndeu, “Mwngz sauj mbaw neix hawj ngaenz hawj gou.”

Mehgveivah naeuz:“Veihsin gou hix mbouj miz baenzlai ngaenz, daeggvan gou youq Guengjdoeng dajgoeng, gou heuh de cienj ngaenz gvaqdaeuj cij miz ngaenz hawj mwngz.”

“Vaiqdi heuh.” Goengdauh naeuz.

Mehgveivah byaij okdou bae dwk denva. De dawz gij cingzgvang lwnh hawj daeggvan nyi, de sing daemq naeuz goengdauh aeu cienz lai. Daeggvan naeuz sai di cienz couh sai ba, cijaeu daxboh ndangcangq couh baenz. Dwk denva le, de couh bae gaj bit gaj gaeq lo.

Mehgveivah din fwngz riengjret cuz bit cuz gaeq. De guh maz hong cungj guh ndaej vaiq, guh ndaej baenz. Mbouj geij nanz, bit gaeq nohmou dumq cug lo, cang ndaw bat, ndaej bat noh rimfoegfoeg ndeu, hoenzfwi biufifi.

Goengdauh heuh de caeq coj- coeng gonq. Mehgveivah dawz bat noh daengj gwnz daizcaet, gaendwk diemj yieng.

Goengdauh naeuz:“Daeuj sauj maj gonq, roengz laexceih le, cij guh baenz hong.” Mehgveivah cijndei ei de guh lo.

Goengdauh ndwn youq dangqnaj daizcaet, mo naeuz:“Cingj cojcoeng daeuj gwn laeuj gwn noh, daeuj lingx cienz lingx ngaenz, baujyouh ranz gaeq bouxhung bouxiq, bouxgeq bouxcoz, bouxboux ndangcangq an- onj……”（caengz sat）