11 nyied 27 hauh, gozgyah cujsiz Siz Ginbingz youq gwnz yizsiz hainduj Aenhoih Daih Cibcaet Gaiq Cung- guek-Dunghmungz Bozlanjvei caeuq Aenhoih Bouxdaeuz Doxyaeng Saeh Seng’eiq Nem Roengzcienz Cung- guek-Dunghmungz de gangjvah.

Siz Ginbingz lai dawznaek naeuz, bi 2013, gou naeuz muengh Cungguek caeuq doengh guekgya Dunghmungz guhdoih hwnqguh diuz roen seicouz gwnz haij 21 sigij, yien fwngz doengz- caez cauhguh aen cingjdaej Cung- guek-Dunghmungz caezcaemh mingh- yinh gaenjndaet ndeu. 7 bi neix, Cung- guek-Dunghmungz doxcaeuq doxgyau gaenq baenz le yienghbanj ceiq baenz- saeh caeuq ceiq rengzak ndaw ranghdieg Yacouh Daibingzyangz, baenz aen saehlaeh sengdoengh cingq- mingz raeuz doinyoengx cauhguh aen cingjdaej vunzloih caezcaemh mingh- yinh. Miz binghraq bwtndat le, song baih doxhaeuj doxcoengh, guhdoih gwnhaemz gwnhoj. Aen seiqgyaiq seizneix cingq ginggvaq yiengh gaij- bienq bak bi doxdaeuj caengz miz gvaq, gij minghyinh lwgminz gak guek caengz lumj ngoenzneix baenzneix doxlienz gaenjndaet. Baih Cungguek caeuq guekgya seiqhenz doxgyau couh dangq Dunghmungz baenz baih daeuz senj aeu doxgyau gonq caeuq giz daeuz guhdoih hwnqguh“rangh ndeu roen ndeu”lai ak lai ndei, maqmuengh caeuq Dunghmungz doinyoengx gak yiengh hongsaeh doxgap, henhoh ranghdieg neix laebdaeb hwngfat mwnhoengh, cauhguh aen cingjdaej Cungguek- Dunghmungz caezcaemh minghyinh.

Siz Ginbingz lai dawznaek naeuz, bimoq Cungguek yaek hwnjdin yamq hwnj diuzroen moq gizgiz cungj hwnqguh aen guekgya sevei cujyi yendaiva. Cungguek laemxsim dingj- maenh coh baihrog hailangh gya- gvangq gyalai, Cungguek caeuq Dunghmungz doxgap daengzcog couh lai lai dem.

Mwh gangjvah ceiq sat, Siz Ginbingz muengh song baih baengh baez hoihhoengh neix, ndaej guh seng’eiq lailai, ndaej baenzsaeh lailai, guhdoih okrengz hawj coglaeng gyalai mwnhoengh gyaeundei.

（ciuq Gvangjsih Yizbau）