Dokyouz, dwg cungj hong aeu youzcaqdoj gag dok youzduhdoem he. Cungj hong dokyouz gaeuqgeq neix, seizneix gaenq gig noix miz vunz caenda yawjraen lo.

Bineix bet nyied cibngux caeuq cietgozging caemh ngoenz, danhvei naihoz sizgungh, fat di fukleih hawj caezgya gvaq bwenz(ciet). Mbouj lai, 200 maenz cienz doxgaiq. Miz haeux- san, cijvaiz, dangzbingj, lij miz doengj youzduhdoem 4 swng ndeu. Doengj youz riuj youq ndaw fwngz, roxnyinh naekgywdgywd. Aenvih aendoengj ronghcingx, daj baihrog ndaej raen gij youz ndaw doengj henjmyigmyig, sawdikdik, gig yienjda, ndaw uk gou sawqmwh yat ok gij saeh seiziq daeuj.

Mwh lwgnyez gou, hix miz gij saeh fat gvaq youzduhdoem. Naeuz dwg fat youz, gizsaed dwg faen youz. Youq aen 20 sigij roek caetcib nienzdaih, lajmbanj gijgwn gijdaenj gig hoj ra, daegbied dwg gijgwn ceiq noix miz. Gaej naeuz miz noh gwn lo, lienz youzduhdoem cungj mbouj miz. Baeznaengz cawj byaek, ndaw rek hawqmbwkmbwk, mbouj raen saek ndik youz. Dangseiz, vunz ndaw singz, cawx maz cungj aeu biuq, vunz lajmbanj lienz biuq cungj mbouj miz, cij ndaej gag guh gag gwn. Lumjbaenz youzduhdoem, cij dwg gungsiuhse miz gai, gwnz haw mbouj hawj gai, miz gai hix mbouj miz cienz cawx. Yiengh- neix, cij ndaej gag ndaem duhdoem gag dokyouz. Swnghcanjdui dokyouz le, couh faen hawj gak ranz gak hoh, hix mbouj lai, cij ndaej geij gaen youzduh gwn baenz bi bae.

Dwen daengz dokyouz, gou doq mizyinx sisi.

20 sigij 60 nienzdaih geizlaeng, gou lij doeg siujyoz, aenvih gwnz- biengz guh yindung, hagdangz hwnj- dangz hix mbouj cingqciengz. Lauxsae mbouj gamj dawzyiemz hagseng, hagseng ni, aenvih mbouj yungh boihsaw, sij cozyez, hix mbouj yungh gaujsi, ndaej ngoenz gvaq ngoenz. Yienghneix, hagdangz hixnaengz caeuxcaeux couh cuengqhag. Cuengq- hag le, maranz mbouj miz doih guhcaemz, mbwq lai, gou couh caeuq geij boux doengzhag youq henzgyawj hagdangz “hoenxciengq” guhcaemz. Hoeng, aenvih ndaw dungx mbouj miz huq, gyoengyatyat, mbouj geij nanz, din fwngz couh unqniekniek, “ciengq” hix mbouj mizrengz “hoenx” lo, caez naiqnueknuek ninz youq gwnznamh, mbouj rox caemz maz.

“Yawj dokcaq, bae!” Gou hemq sing he, daihgya doq cingsaenz gvaekgvaek fonj ndang hwnjdaeuj.

Gou ceiq haengj yawj dokcaq (dokyouz) lo, daegbieb dwg seiz dungxiek, yawj dokcaq mboujdan ndaej gaijmbwq, ceiq youqgaenj dwg ndaej “yw” dungx iek.

Ranzdokcaq liz hagdangz mbouj gyae, dou lumj lajdin cang miz aenloek nei, hemqyatyat bongh baecadcad.

Caengz byaij daengz fungh ranzdokcaq, raq heiq youzduhdoem he couh homfwdfwd con haeuj ndaeng daeuj, ngaeu dawz duz nonngah ndaw hoz canqnywdnywd. Buet daengz ranzdokcaq, caezgya ciuq sibgvenq muengh coh aen cauq gokciengz gonq. Aenvih ndaw rek hung gwnz cauq haenx, cingqcaih ceuj mbaduhdoem, gij heiq homfwtfwt haenx couhdwg daj gizhaenx biu gvaqdaeuj lo. Boux- boux byaengq da aj bak, myaiz rih- noengnoeng. Gou haenqrengz sup gaemz heiq he, lumjbaenz gij youzduh cingq youq gwnz linx raihyanyan, gou vaiqdi ndau linx riz bak, haenqrengz ndwnj raemxmyaiz. Gou gaenq haujlai nanz mbouj miz youz roengz dungx lo, aendungx lumj deng feiz remj gvaq nei, hawqmiengmieng, heiqyouz baez sup roengzbae, caen miz di dungx- rongx rumrum.

Boux ceuj mbaduh haenx dwg goengsaedaeuz, heuhguh Lungzbinq. Lungzbinq yaek rim 50 bi, vunz haemq daemq, mbouj daengz mij roek sang, hoeng ndangdaej cangqmaenh. Faj gen de loetlwtlwt lumj ngauq faexmbaenq, rengz coek dangqmaz. Lungzbinq gig miz daegdiemj, gig noix raen de riu loh gwnz naj, aennaj ciengzseiz saepsaengsaeng, haenrwd- rwd. De youh baknaek vah noix. Cingq aenvih yienghneix, gij vunz riengz- laeng de guhhong haenx, cungj miz di lau de. De gangj vah baenz coenz, heuh mwngz guh saeh, mbouj raemh coenz daihngeih. Ndigah, gyoengqvunz cungj lauxlaux saedsaed guhhong. Yienghneix, vunzlai hawj de guh goengsaedaeuz dokyouz, couh engq cuengqsim lo.

Ceuj mbaduh dwg cungj hong gisuz ndeu. Dokcaq ndaej mbouj ndaej youz, cungj baengh gij goengfou goengsae lo. Ceuj remj roxnaeuz ceuj mbouj cug, okyouz cingzsoq couh noix. Duh noix vunz lai, daengx mbanj bak geij hoh, baenzlawz ndaej gaeuq faen? Yienghneix, caezgya cungj dak gij maqmuengh hawj goengsae lo. Lungzbinq vunz lauxsaed, din fwngz youh raeh, rox guh miz gisuz, daihgya cungj cuengqsim hawj de dokyouz. Daengx mbanj ra mbouj ok boux daihngeih lawh ndaej de.

Seizneix Lungzbinq capmax ndwn youq henz cauq, song fwngz gaem ndaet gaiq gucanj raezrad he, diuz hwet baez gungj baez iet, song gen baez goz baez soh, rengzrwdrwd fonjndau gij mbaduh ndaw rek hung. Yienznaeuz dwg seiznit, hoeng, de lij lohgengz guhhong, gwnz ndang raemxhanh lumj gyoengq nonhaeux he raihgemgem. Gij fwindat ndaw rek oenq ndaej song cehda de buenq hai buenq laep.

Geij boux lwgsae hauxseng haenx, mizmbangj daem duh, miz- mbangj sonh feiz. Bouxboux cungj nyaengqfoedfoed din fwngz mbouj hoengq.

Dokyouz daihgaiq faen baenz roek caet bouh. Ceuj mbaduh, gaenq daengz bouh daihsam lo. Gaxgonq lij miz mbiq byuk ok naed, daem mienz baenz mba song bouh neix. Ceuj cug le, caiq dawz mbaduh duk baenz aen bingjgu, yienzhaeuh caet haeuj aen caqsongz bae. Bouh doeklaeng couh- dwg dokcaq lo.

Gou doq myaiz rihnoengnoeng doq yawj goengsae dawz gij mbaduh ceuj cug haenx duk baenz aen bingjgu luenzlili. Bingjgu sien yungh liebduk san baenz aen gyongx aiq 30 lizmij gvangq, yienzhaeuh cuengq bingz youq gwnzdeih, caiq dawz mbaduh bu youq ndaw gyongx liebduk, aeu fwngz caeuq benj dawz mbaduh at saed, couh guh baenz aen bingjgu lo. Geij boux goengsae din fwngz riengjret, mbouj geij nanz, couh duk ndaej geijcib aen bingjgu.

“Veq, veqdeuz. Ndwn gvaq henz bae.” Dou cingq yawj ndaej dawzyinx yiyi, ndaejnyi sing hat, dou vaiqdi saet gvaq henz bae, nyiengh hawj goengsae guhhong. 4 boux goengsae gotdawz bingjgu, boux riengz boux byaij daengz henz caqsongz, doxswnj dawz bingjgu caet haeuj ndaw cauzcaq bae.

Caqsongz dwg aeu gofaex youh lot youh genq haenx guh baenz. Gofaex raemj roengzma le, sien gawq baenz gyaengh raez ndeu, caiq soek bae caengz naeng baihrog, yienzhaeuh youq cungqgyang faexgyaengh siuq diuz cauzluenz he, aiq miz song mij lai raez, 30 lai lizmij gvangq, daihgaiq caet ndaej sam seiqcib aen bingjgu. Caet bingjgu ndei le couh daengz bouh hong dokcaq lo. Gou ceiq gyaez yawj bouh neix lo.

Goengsae dokcaq itgungh miz 4 boux. Goengsaedaeuz guh boux dazyinx, lingh 3 boux gaem ngauqdok (miz 20 lai gaen naek) guh dokcaq, faenbied heuhguh ngauqdaeuz、 ngauqngeih caeuq ngauqsam. Lungz- binq guh saedaeuz, de sien aeu aen caqheng ndeu demh youq dangqnaj bingjgu, yienzhaeuh dawz diuz lwg- saekbej ndeu saeb roengz dangqnaj caqheng bae. Saeb maenh le, de hemq coenz he:“Dok!” 3 boux lwgsae couh boux swnj boux, yaengx ngauqdok sang gvaq gwnz gyaeuj, doq hat doq dok roengz lwgsaek bae. Sikhaek, “Hai! Dub!” “Hai! Dub!” “Hai! Dub!” Sing hat sing dok, giz hwnj giz roengz, goksasa, lumjbaenz canghheiq roq gyong ndaek laz, dawzbanj raixcaix, nauhyied dangqmaz. Hawj gou daengx ndang lwed ndat goenjcancan, caen siengj caen fwngz yaengx ngauqdok baez he, haenqrengz dok roengzbae.

Gig vaiq, diuz caqheng couh deng dok daemx daej. Ciepdaeuj, Lungzbinq caiq saeb diuz caqheng daihngeih. Caezgya youh ciuq yiengh doq hat doq dok. Dok sat diuz daihngeih, youh saeb diuz daihsam, diuz daihseiq…… itcig saeb rim gumzcauz.

Bingjgu baez deng nap bej, youzduh couh daj gwnz bingjgu iemq okdaeuj, ciemhciemh, yied iemq yied lai, doeklaeng bienqbaenz roenxlala, youh daj aen congh lajdaej caqsongz laecedced coq roengz doengjyouz bae. Yawjraen gij youzduh sawdikdik ndaw doengj, gyoengq lwgnyez dou cungj naj haiyabyab, bak ajngubngub. Hoeng, yawj gyoengq goengsae, daengx ndang gaenq hanhdumz hanh- rih, naj hoengzgoedgoed, diemcaw baegfofo caez.

“Naed haeux dij baenz gim, gwn imq gaej saiyaix.” Caen dahraix, naedhaeux, ndikyouz ndaej daeuj mbouj yungzheih. Daj vanq ceh daengz dajsou, caiq daengz fad baenz naed, dok baenz youz, mbouj rox sai bae geijlai goengrengz, conh bae geijlai lwedhanh. Youq aen nienzdaih noix gwn noix daenj haenx, gou deng dungx iek lau lo, roxnyinh ra gwn mbouj yungzheih, daengz seizneix yienghyiengh miz gwn lo, hix gwn nywnx lo, hoeng, gou lij caensaed insik naedhaeux ndikyouz, mbouj gamj guh gij saeh “saisaengq byai- linx”. Gou ciengzseiz gienqmienx bonjfaenh, geiq maenh coenz vah lajneix:

“Naed haeuxhau ndaw vanj, aeu lwedhanh ndaem baenz”.