Gyongfaexcuk caemh heuhguh gyongjdauh、gimzfaexcuk. Gyong- faexcuk Gveilinz vunz heuhguh dauhcingz lai, dwg gij yisuz gangj ciengq conzdungj Bouxgun Gveilinz. Daj diuz Mienglingz vat doeng dawz Dahcangzgyangh caeuq Dahcuh- gyangh doxciep hwnjdaeuj le, gij vwnzva Cunghyenz couh mbouj dingz mbouj duenh cienz haeuj Gveilinz daeuj, bienqbaenz gij vwnzva minz- sug gag miz daegsaek haenx, gyongfaexcuk Gveilinz couhdwg ndawde aen daiqbiuj ndeu. Mingz- ciuz bi doeklaeng、Minzguek seiz cungj miz canghheiq gyongfaexcuk Huznanz daeuj daengz Gveilinz cienzciengq gyongfaexcuk, youh youq gizde youqdingh.

“So so so la do do ci mi do ci mi fa so” dwg gij diuh gyongfaexcuk ceiq goekdaej haenx. Gyongfaexcuk faen miz lohbaek caeuq lohnamz, gij diuh lohbaek haemq sang haemq gok, gij lohnamz cix haemq duemh haemq rwenz. Seiz lwnhgangj cawjdaeuz yungh lohbaek lai, gij diuh de haemq angqyangz; gij goswz conzdungj cix dwg yungh lohnamz haemq lai, lumjbaenz “ndit haemh veq sae roeg haeuj rongz, dongzdax dongzdax dongzdax, ci so ci mi so, baenz sueng baenz doiq gig vaiq- vued……” Doenghbaez, gyongfaex- cuk Gveilinz cawjdaeuz aeu aen- gyong caeuq bajbenj ma buenx- ciengq, seizneix menhmenh fatlai baenz gij vunqsik minzyoz buenx- ciengq, baugvat cung’yonj roxnaeuz bizbaz. Gyongfaexcuk dwg aeu go- ndoek ciggingq aiq miz cib’it goengfaen raez、song cik sang haenx ma guhbaenz, najgyong ndaej aeu naengngwz、naengduzgoep roxnaeuz naengmou ma goemq hwnjbae, linghvaih caiq aeu genjbanj、ngeih- yienz、cungyienz、nyiedgimz、cung- yonj、samyienz、aendig、aendeb、cenjlaeuj daengj guh dapboiq ma yungh. Gij hingzsik yienjciengq miz song cungj, it dwg “dwk gyongj dog”, couhdwg boux ndeu fwngzswix umj gyongfaexcuk, fwngzgvaz ndaek gyong, gag roq gag ciengq; ngeih dwg gij hingzsik daiq buenxciengq, haenx miz song vunz gap aen cuj、sam vunz gap aen cuj、haj daengz caet bet vunz engqlij cib lai vunz gap aen cuj daengj. Song vunz gap aen cuj dwg bouxciengq de giem daz cawjyienz, boux linghvaih ndaek gyong; boux- ciengq de sam vunz gap aen cuj haenx giem daz cawjyienz, linghvaih caiq miz bouxndaekgyong dem bouxboiqyienz.

Laeng dieg baihbaek Gvangjsih, miz vunzlaux gvaqseiq、vunzlaux guhsouh、aeubawx haqsau caeuq ndaw mbanj gij miuhhoih conzdungj, gyoengqvunz gizde cungj yaek cingj canghheiq gyongfaexcuk daeuj ciengq. Cij aenvih yienghneix, gyongfaexcuk cungj dwg ciengq guhhong dajndaem、gij saedceij gyoengqvunz lai. Gij go gyoengqde ciengq haenx gig dep diegheiq, yungzheih yinxndaej vunzlai doxhap; gij goswz de dinjdet, aeu vahdoj ma ciengq, doengsug dingq rox; gij diuh de boeksaed riengjret, gij banjsik bienq bae bienq dauq lwnhdoi ok gij gojgaeq fungfouq lai yiengh haenx, gyoengqvunz cungj maij cienzciengq. Aen seiqgeij gonq betcib nienzdaih, miz vunz youq Cenzcouh Yen Doengsan Yauzcuz Yangh Ginjyungz Cunh soucomz ndaej bonj《Geiq Samgux》ndeu, bonj swz ciengq gyongfaexcuk neix aeu benjfaex deu baenz, dwg Lij Giuhdenz seiz Gvanghsi samcib sam nienz deuguh haenx. Bonj sawfaex neix miz roek bak geij coenz, ranzranz hohhoh、bouxlaux lwgnyez laeng Hingh’anh、Cenzcouh、Gvanyangz、Swhyenz daengj yienh rox caez.

Gyongfaexcuk Gveilinz dwg ngauq “rinvaqsig lij lix” youz gij vwnzva lai dieg yungzhab baenz ndeu, daj ndawde ndaej yawjraen lai cungj saedceij lajbiengz ciuhgeq, doiq mumaeq gij lizsij ndwenngoenz、lizsij gangjciengq Gvangjsih gig miz yiyi. Bi 2014, gyongfaexcuk Gveilinz ndaej senj haeuj buek daihseiq guekgya gaep feihvuzciz vwnzva yizcanj mingzloeg.