“Gamgit yied bae yied bienq yiengh, mbauq sau laux nyez angqvauvau”. 11 nyied 19 hauh, gyoengqvunz Bwzswz Si Denzyangz Gih Bahbez Yangh Mbanjgamgit gag baij aen daizheiq doxdax eufwen. Gyoengqde iu le geijcib aen doihfwen laeng Denzyangz Dwzbauj haeuj mbanj daeuj itheij doxdax eufwen. Gyoengq canghfwen danq gij cwngcwz fouq minz aendangj, haenh duetgungz demsou coh siujgangh, eu gij bienqvaq moq lajmbanj moq sevei cujyi. Canghfwen gaisau naeuz, diuhfwen gyoengqde eu haenx heuhguh diuhfwen Bahbez, hix heuhguh diuhfwen Dwzbauj. Aen doihfwen ndeu noix aeu miz seiq boux vunz, lai cix miz cibgeij ngeihcib boux vunz. Moix aendoih lij aeu boux eu yaemsang ceiq sughangz haenx cienmonz bae eu yaemsang, ndigah gij singfwen gyoengqde hix gok hix sang. Yienhciengz sing fwen giz hwnj giz roengz, mbouj dingz mbouj duenh, eu daengz ranzrongh gyoengqvunz lij mbouj sij baema ranz.

(Vangz Gozsun/黄国顺)