Cazloegbauj youq Gvangjsih dwg cungj cazndaem ceiq mizmingz haenx, gij lizsij de daengz seizneix gaenq miz 1500 lai bi, soqlaiz miz “nding、noengz、gaeuq、swnh” seiq cungj daegsaek riuzmingz lajmbwn. Gvangjsih Canghnguz Yen Loegbauj Cin bya sang mok lai、ndoengfaex mwncupcup, ndigah couh ndaej ok cungj caz daegbied neix. Gij dinfwngz guh Cazloegbauj youq Loegbauj Cin Mbanjbuyij、Mbanj- daemzbingz、Mbanjseiqliux、Mbanjleixcung、Mbanjsanhbingz、Mbanjgoengbingz、Mbanjcanz daengj dieg miz lai. Gij cangjguhcaz doengh aen mbanj neix aeu gij caz gyoengqde gag ndaem haenx ma guh yienzliuh, guhcaz hix yungh gij fuengfap conzdungj cinghseuq haenx guh, ginggvaq lai aen bouhloh couh ndaej guh ok gij Cazloegbauj saek ndingfwg、feih swnh gam sangj、miz gij feih hom maklangz daeuj.

Gij bouhloh guh cungj caz neix baugvat cawz heu、nu nyaenj、naengj baez nduj、oemqdong、dauq naengj、gyaat、oemqfat、 daksauj daengj. Cawz heu couhdwg aeu dohraeuj daemq ma gangq caz; nu nyaenj hix dwg hawj mbawcaz gienj baenz diuz baenz diuz; naengj baez nduj、oemqdong、dauq naengj dwg gij bouhloh gvanhgen guh caz haenx, yienghneix ndaej gyavaiq gij doxgaiq mdaw caz bienqvaq, hawj feih saephaemz bienq noix, hawj gij feih bienq swnh, hix ndaej cawz gij heiq heu okdaeuj. Geij aen bouhloh neix yaek fanfoek guh baenz geij mbat cij ndaej, guh daengz mbawcaz miz raemxniu hix miz heiq homhaenq okdaeuj bae couh habngamj; gyaat、oemqfat couhdwg dawz gij mbawcaz oemq ndei haenx cang haeuj ndaw ndijlaep bae, dimz ndaet le hawj de gag oemqfat; gij bouhloh hawj gijde hawq baugvat coemh fwnzcoengz aeu feizmbaw ma gangq caeuq langhcuengq、hawj de bienq gaeuq daengj. Moix bouh cungj gaujniemh gij goengfou caeuq naihlig canghguhcaz. Gyoengqde baengh fajfwngz lumh、cehda yawj caeuq aenndaeng nyouq daeuj roxyiuj gij bienqvaq dohraeuj、heiqhom iq mbawcaz, gaem ndei seizgan, cij rox yungh rengz hung hixnaeuz iq.

Loegbauj Cin liglaiz cungj miz gij sibsug mbaet cazsix, cazsix couhdwg gij caz youq ngoenz cuengq six mbaet guh haenx. Cungj caz mwh cinfaen mbaet guh neix cix saeq cix oiq, dijbauj raixcaix. “Cazsixgonq” dwg Cazloegbauj ndawde ceiq dijbauj, cungj caz neix ngaz oiq reuxred, ngaz dog haemq lai, ngaz ndeu mbaw ndeu, guh baenz caz le ngazsoem miz “duqbyoem hau”; diuzdiuz giet dwk gaenjmaed、saeq ndaem youznyinh、gutgeuj lumj diuzngaeu nei, vunz Loegbauj heuh de guh “caz bakset”; gij ngaz miz naeng biux haenx lij miz cungj heiq homfwt he, gwn le daiq ndaw bak cungj miz heiq hom; gij raemx de loq henj, loq miz di heu, cinghseuq ronghcingx, gij saek de haemq lumj gij raemx cazheu; gwn haeuj bak gij feihdauh gig ndei, feihcaz naek noengz、gwn liux youh miz di gam; aenvih gij caz neix canjlieng daemq, ok ndaej gig noix, ndigah baez ok haw cungj mbouj gaeuq gai.

Gij dinfwngz guh Cazloegbauj gig daegbied, dwg faenh lizsij vwnzva yizcanj dijbauj dangqmaz ndeu. Bi 2008, Canghvuz Yen gij dinfwngz guh Cazloegbauj ndaej senj haeuj buek daihngeih swcigih gaep feihvuzciz vwnzva yizcanj mingzloeg; bi 2014, de youh ndaej senj haeuj buek daihseiq guekgya gaep feihvuzciz vwnzva yizcanj hanghmoeg mingzloeg.