Ranz neix dwg ranz Aucin, ranz gungzhoj “guh dangj laeb gaj” ndeu, Song fungh ranzvax daemqded gaebgeb, lajroq geij fagso geij faggvak fag ing gvaq lengq、doiq gei caeuq doiq gyoi cik vit giz, ndawranz gij doengj gij bat caeuq gij doenghyiengh wnq doeng gveng sae coq, dimz baenz goeg baen doi, geij gep benj song aen daengqraez dap baenz aen mbonq youq henz ciengz fungh “ranzding”, gyaeuj mbonq dab miz geij daeh haeux, song daeh lajgiek cungj deng nou mbon congh gvaq, gwnznamh henz congh aen daeh rebhaeux、haexnou sanqyag. Daengx Mbanj- nazcwz lauheiq couhdwg ranz neix ceiq luenh lo.

Gaenh bi daeuj caenh dwg Aucin bouxdog youq ranz, hong nyaengq yaek dai, cungj mbouj ndaejhoengq caebliemx gvaq. Yah de bi’gvaq mwh bae ndaw doengh yawj raemxnaz deng bingbagmou fat hwnjdaeuj ringx roengz mieng naz bae, deng dai lo. Song laeq lwg bae doegsaw, gwn ninz cungj youq ndaw hagdangz.

Laujcangh sawqmwh youh daeuj daengz lo. Aucin miz di doeksaet, gag roxnyinh mbouj gvaq ndaej eiq, de laihnaeuz Laujcangh mbouj daeuj nyaenx yoeng, bonjlaiz dajsuenq gvaq saek ngoenz baj ndaejhoengq caiq caebcomz doxgaiq baet ranz seuqset caj hek daeuj, byawz rox ndwen neix Laujcangh couh daeuj ndaej nyaenx caeux, ndwennaengz de cungj dwg yaek daengz byaindwen cij daeuj ha. Mbatneix Laujcangh sawqmwh daeuj caeux cixbah, lij daiq dahsau oiqupup ndeu caez daeuj dem, lumj dwg daegdaengq yaek hawj ranz de coujnaj coujndaeng nei.

Cij raen song boux de riengjret cek mbaw “lenzhigaj banggungz” bangxciengz rog dou roengzdaeuj, dauqcungz nem bej moq hwnjbae.

Aucin caeuq dahsau baez yawj doxcoh, dahsau daengx da aj bak, cix mbouj gamj oksing. Aucin roxnyinh dah neix miz di najsug, cix ngeix mbouj hwnj youq gyawz raen gvaq. Dahsau dongx sing “daxau” le couh ngaemgyaeuj roengzdaeuj, lumj lij miz di najyomj launyaenq.

Baez nyi dahsau gvaigvet neix heuh “daxau”, Aucin ndawsim gag goenjbyoegbyoeg, de fwt dauqngeix hwnj cibgeij bi gonq Dahlinz dahlwg hawj de ciengx gvaq haenx. Dahlinz dwg dahlwg yahgonq Aucin, bihaenx caengz ndaej rim 8 bi meh de couh daiq de daeuj haq hawj Aucin lo, hix couhdwg dahlwgciengx Aucin.

Mehdahlinz daiq Dahlinz daeuj daengz ranz Aucin le, de mbouj ep Dahlinz heuh Aucin guh “boh”, couh hawj de heuhguh “au”, vunz Mbanj- nazcwz mbouj gvenq heuh bohlaeng guh “boh”, cungj heuhguh “au”. Daengz ranz Aucin le, Aucin raen Dahlinz gvaigvetgvet, ndaw hoz gig gyaezmaij, yawj de baenz lwg caenseng, ra ngaenz hawj de bae hagdangz doegsaw, haet soengq haemh coux, ngoenzsinggeiz lij haengj daiq de bae haw cet cawx saejdaeuz gwn. Mwhhaenx, Dahlinz lumj gyoengq lwgnyez doih nei, ndaej angqangq yangzyangz gvaq seiznyez.

Hoeng, “gwn liux gangj mbouj liux, byawz ndaej yiuq baihlaeng, yahbamz caen dwgcaengz, gag ra haemz ra hoj”. “Yuenzbonj gvaq ndeindei, boihseiz fwtfwh laeuh (daengz), doxceng heiq hwnjdaeuj, gyaeujyah gag sanq deuz”. Aucin gvanbaz vih gij saeh iqetet doxceng, yied ceng yied haenq, boux mbouj nyiengh boux. Mehdahlinz hozgaek couh gip buhvaq ragdawz Dahlinz naeuz yaek yamqdin okdou lizhai aen ranz neix. Aucin giengh gvaq maz bae, nyengh mbouj hah de, yienghneix Mehdahlinz couh daiq Dahlinz deuz- dak dauq baema Mbanjnazgut lo……

Mbouj rox seizneix song mehlwg de gvaq ndaej baenzlawz yiengh.

Aucin dawz cenj caem raemx- goenj doq heuh Laujcangh caeuq dahsau song boux gwn, doq raemhraex haenh naeuz banneix cwngfuj doiq bouxhoj baenzlawz baenzlawz ndei. “Gwnz hawj ngaenz hawj yiengh, coengh dajciengx dajndaem, ak gvaq boux vunzcaen, fwngz gaem fwngz son guh.”

Laujcangh gaisau lwnh Aucin naeuz, ndwen baihlaj de couh yaek deng doiqvih yietlaux lo, bouxdaeuz anbaiz dahsau Siujyenj neix daeuj Mbanjnazcwz ciep diuzrap de guh banggungz ranz neix. Aucin sim baez anj, miz di doeksaet, fwt gaemdawz song cik fwngz Laujcangh mbouj cuengq. “Gaem fwngz ndaetndwtndwt, raemxda ndik ndaw hoz, dwgrengz lumj duzmoz, gyo mwngz guh ndaej hwnj”.

Laujcangh baez yiengh baez yiengh cam Aucin byongh bi gonq souhaeuj ndaej geijlai, dajndaem dajciengx daengxheij ceiok ngaenz- goek geijlai, song laeq lwgnyez youq hagdangz doegsaw ndaej ngaenz bangbouj geijlai…… Yienghyiengh cam gvaq doh, caiq itit ngeihngeih lwnh hawj Siujyenj sij roengz mbawbiuj bae. Siujyenj lumj doengh- baez boux guenjsoq gunghsiuhse ndaw yangh guh buenzdiemj nei, nyinhcaen daenggeiq sojmiz soqmoeg mbouj hawj lauq saek diuz. Boux ganbu guh banggungz caen mbouj yungzheih ha, dingqnyi naeuz dienz gij dangjanq caizliuh neix itdingh mbouj hawj miz saekdi loengloek, baihgwnz ciengzseiz baij vunz fueng daihsam daeuj gamduk, gyoengqde baez genjcaz raen miz aen soqmoeg maz mbouj deng sikhaek coh daengx yienh doengbauq, doeklaeng lij dwg daeuj dauqcungz guh baez moq.

Aucin naengh youq gyaeuj mbonq gag cit ien babbab, de mbouj bae gyawj Laujcangh, engq mbouj gamj bae gyawj Siujyenj, de gag rox, geu buhgaeuq gwnz ndang de gaenq haujlai ngoenz mbouj ndaejhoengq rieg daeuj saeg lo, loq miz heiq saeuhanh ha.

Aucin mwh coz bohmeh couh gvaq lo. De beizheiq gyaengj, lij miz di gujgvaiq, mbouj caeuq bouxwnq doxhuz ndaej daeuj geijlai. Doengh bi haenx de bae goengloh daubanh guhhong gvaq, doeklaeng caeuq bouxdaeuz doxdingj couh deuzdak mbouj guh, dauq ranzmbanj guh hongnaz hongreih. De ha, “ndawranz mbouj doengz vunz, noix gaiq gwn gaiq daenj, gag laemx couh gag hwnj, caeuq bouxwnq mbouj huz. Samcib mbouj miz yah, sam haj mbouj baenz ranz, vunz miz lwg miz lan, de bouxdan bouxdog. Yaek cauxgya cauxranz, vunzbamz ciuqyiengh lax, nienzgeq siengj aeu yah, maiq gvaq ciuqyiengh aeu”.

Bihaenx, dingjlingz Mbanjnazgut miz boux ndeu dai caeux, ce mehyah caeuq dah lwgmbwk nyaeq ndeu, dah lwgmbwk nyaeq haenx couhdwg Dahlinz. “Meh maiq lwg cix gyax, hoj gvaq ndwen gvaq ngoenz, dangq gyad youq gyang roen, goemzdoem mbouj raen nywj. Bohranz gaenq bae im, ndi boux ing boux baengh, meh raemxda daej caenh, couh naemj caiq haq vunz”. Yienghneix, yahmaiq oiq haenx couh daiq dahlwg de riengz boux- yiensienq haq daeuj hawj Aucin.

Yah deuz le, Aucin caiq hix giengh mbouj ndaej lo, de miz di ienqhoij, yaek siengj bae ngaeq yah de dauqdaeuj, hix gag roxnyinh mbouj miznaj geijlai. Bihaenx hawndaep, youq gyang haw Aucin cingqcingq roeb Mehdahlinz, ngamq yaek haibak bae dongx, Mehdahlinz cix baenq ndang ndoj deuz gig yoeng. Aucin yawjyawj mbouj raen ngumhngaeuz de lo, gag ngeix yah neix gaenq mbouj yienzliengh de lo, couh mbouj bae ra lo. “Ndwenngoenz baeyetyet, ciet gvaq ciet cix daengz, seizgan mbouj ndaej laengz, cin daengz va dauq angj”. Doeklaeng Aucin dingq meh- moiz naeuz lingh aeu yah fatbagmou ndeu.

Yahlaeng seng dah lwgmbwk caeuq daeg lwgsai ndeu hawj Aucin. Yah de ngoenznaengz bingh mbouj fat hix daengh Aucin caez bae guhhong, yienznaeuz mbouj ndaej baenzmiz, cix gag ndaej caux gwn caux daenj, ndwenngoenz lij gvaq ndaej bae. Song laeq lwg cungj haeujhag doegsaw lo, meh gyoengqde cix boihseiz deng dai bae.

Yahlaeng dai le, Aucin gag goq song boux lwg. “Dang boh youh dang meh, ngoenzngoenz veq ra gwn, ciengz dingj ndit dingj fwn, lij ienq mbwn mbouj caeuh. Boux vunz bungz boihseiz, bakcauq feiz hix ndaep, dangq fangz doz fangz gyaep, caeklaiq miz banggungz”. Lij ndei, doengh bi neix ndaej cwngfuj daihlig guh cinjdeng banggungz, Aucin gyolaih raq rumzcin neix, ndaej gaijgez le aen vwndiz gwndaenj caeuq soengq lwg doegsaw.

Song boux ganbu banggungz nyaengq baenz byongh ngoenz le, cungjsuenq guh sat gij hong ngoenzneix lo, mwh doxbiek yaek dauqbae, Siujyenj coh Aucin naeuz:“Daxau, dou camh baema gonq, baezlaeng couhdwg gou daeuj bang ranz mwngz duetgungz, danghnaeuz mwngz miz maz gunnanz couh dwk aen hauhmax gwnz ‘lenzhigaj’ hawj gou.”

Siujyenj caeuq Laujcangh hwnj ci dauqbae ndaw yienhsingz lo, Aucin ra fouq gingqda he daeuj daep yiuqyawj bej “lenzhigaj”. Baihgwnz geij cih “bouxbanggungz Yenj Linz- linz” haenx ingjsad haeuj lwgda de daeuj, de dadaengx yaep he, fwt ngeix hwnj maz, sikhaek mbon soujgih okdaeuj ciuq aen hauh dienhvah baihgwnz bued gvaqbae.

“Vei, mwngz couhdwg Dahlinz?”

“O, daxau, dwg ha, dwg gou, miz maz saeh lwi?”

“Mwngz……mwngz lij geiq ndaej gou lwi?”

“Geiq ndaej ha, mwngz couhdwg daxau gou ha.”

“Gou……gaxgonq doiq mbouj hwnj meh mwngz, meh mwngz haemz gou, mwngz cix……”

“Haiya, daxau, gaej dwen gij haenx lo. Neix dwg hong cwngfuj. Faenh gou hix dwg gyo miz gij cwngcwz banggungz cij ndaej bae doeg daihhag sat ha.”

“O! Saehgonq gyae’gyanggyang, guenj byawz vang byawz yak, mbouj ciuq ei ciuq hag, gak daih gag aen- caeuz.”