Ngoenzneix gou hwnjdaiz,

Fwen hawj vunzlai dingq,

Doxhuz fanh saeh hingh,

Dingq le couh aeu hengz.

Bouxmbwk caeuq bouxsai,

Doxmaij gap goengyah,

Doengzcaez daeuj cauxgya,

Boux ra boux doxcoh.

Doengzcaez daeuj cauxgya,

Goengyah dawz boux gonz,

Mbouj rox couh doxson,

Gaej najmong doxcoh.

Doengzcaez daeuj cauxgya,

Goengyah dawz boux mbiengj,

Gaej cug loh cug siengj,

Doxriengz gvaq ciuhvunz.

Doxeuq dangq ciengqheiq,

Gaej dawz guh dahraix,

Daengq bouxmbwk bouxsai,

Aeu doxmaij doxnyiengh.

Gwnz daiz dwg goengyah,

Lajdaiz dwg baengzyoux,

Gaej cug mbaenq cug youq,

Doxaeu mbouj yungzheih.

Goengyah baenz ciuh vunz,

Hwnzngoenz doengzcaez gvaq,

Boux yiuq boux dwg da,

Doxndiep gvaq ciuh vunz.

Baenz ciuh vunz goengyah,

Doengzcaez gvaq saedceij,

Boux yiuq boux dwg’eiq,

Hwnjheiq caux gyaranz.

Bouxyah ndiep bouxgoeng,

Lumj daengngoenz hwnjma,

Bouxgoeng ndiep bouxyah,

Lumj gyang dah hwnj feiz.

Ndawranz ndaej doxhuz,

Cujyau dwg goengyah,

Mbouj doxceng doxndaq,

Cienzgya doq vuenyungz.