Cienznaeuz, Mingzciuz ndaw seiz Gyahging, gij dinfwngz cugguh lungz- foux Bouxcuengh Lungzanh youq dieg Bouxcuengh ndawde dwg ceiq ak, gij daiqbiuj de couhdwg lungzfiengz, guh dwk lumj duz caen nei. Lungzfiengz, daj gij coh de couhdwg ngeix daengz duzlungz aeu gij fiengz ndaw naz ma guh baenz haenx. Doiq gij vunz Lungzanh ma gangj, lungz- fiengz youh saenzmaed youh dox- ndiep. Aenvih de mboujdan lizsij naihnanz, lij biujyienh le gyoengqvunz siengjniemh ciuhgonq caeuq gyaep- gouz gij ndwenngoenz vuenyungz haenx.

Gij dinfwngz guh Lungzfiengz saepsoiq dangqmaz, baumiz seiq bouhloh: Genj fiengz、san gyaeplungz、roix ndanglungz、guh gyaeujlungz, yaek guh haujlai nanz、baengh gij goengrengz vunzlai cij ndaej guh baenz. Youq Lungzanh Yen Cwngz- siengh Cin Gozdai Segih miz aen dieggoek cienzciep naz vwnzva ndeu, gizde miz aen doih cienmonz guh lungzfiengz ndeu, gungh miz cibhaj boux vunz. Guh duz lungzfiengz ndeu gyoengqde yaek aeu moix ngoenz guh cib diemj cung doxbae, guh baenz song ndwen lai seizgan yienghneix cij guh ndaej okdaeuj.

Cinz Saucangh dwg boux cangh- vehnda lungzfiengz, gij lungzfiengz ginggvaq fajfwngz de vehnda okdaeuj haenx miz cib lai duz, duzduz cungj miz cien lai gaiq gyaep, gyaeujlungz、rienglungz、cawlungz caiq gya caet hoh ndanglungz, itgungh miz cib hoh. “Aenvih gaiqgaiq aeu vunz ma guh, ndigah duzduz cungj maqhuz naek. Duz ceiq naek ndeu aiq miz song bak lai gaen, duz ceiq raez ndeu miz ngeihcib haj mij, duz ceiq dinj hix miz seiq mij.” Baeznaengz guh lungz- fiengz, Cinz Saucangh cungj aeu caenndang baijhong, caemcaiq dawz baenz dauq dinfwngz san guh lungz- fiengz son hawj gyoengqvunz, cungj mbouj louz saek di. Yenzlaiz, gyoengqde feiqcawz gij cienzciep sibgvenq rwix mbouj cienz vunzrog haenx, dawz gij dinfwngz guh Lungz- fiengz yiedsim cienz hawj vunzrog, lij gungganq ok le buek vunzcaiz ndeu. Cingq lumj de naeuz, cijaeu bouxcoz nyienh naihsim hag, gij dinfwngz cienzdoengj guh lungzfiengz Lungzanh couh ndaej ciuh dem ciuh riuzcienz roengzbae.

Doenghbaez, aen gyaeujlungz lungzfiengz yungzheih vaih, gij daj- cang ndanglungz hix mbouj gaeuq ndeiyawj. Ginggvaq mbouj duenh vehnda cauhmoq, gij lungzfiengz seizneix dingzlai lumj gyaeplungz、ndoksaenlungz、rienglungz caeuq nyaujlungz daengj lij aeu fiengz ma san, youq gwnz giekdaej neix cij cungdenj gaijcaenh gyaeujlungz. Gyaeujlungz genj yungh duk cug guh aen gyaq ndeu, yienghneix baklungz aj ndaej gaeuq gvangq, yienzhaeuh yungh baumoz bieg ma deu guh heuhlungz, aeu suliu hoengz ma guh diuzlinx, mumhlungz hix yungh gij gangsei san ndei haenx ma guh, gij dalungz hix aeu gij caizliuh cienmonz haenx daeuj guh, daengz gyanghaemh lij ndaej doeng dienh hawj de yaprongh, ndeiyawj raixcaix.

Youq Lungzanh Yen, gvaq cieng、seiq nyied bet ciethongdawz、ngux nyied cibsam caeq saenzhaeux daengj ciet hung cungj ndaej raen duz lungzfiengz. Daegbied dwg liggaeuq ngux nyied cibsam caeq saenzhaeux haenx, lungzfiengz engq dwg gij cawjgiek aen minzsug conzdungj hozdung neix. Ngoenz haenx, ranzranz hohhoh、bouxlaux lwgnyez cungj ok rog daeuj guhcaemz guh’angq, yawj foux lungz, mbaenjgouz bilaeng fwn raemx yinzrwd, saedceij yied daeuj yied hoengh. Gij lungzfiengz mbouj- dan san ok gij naz vwnzva Boux- cuengh raeuz, vanzlij cienzciep gij meijdwz gaenxguh ciuhgonq raeuz, gikleih bouxcoz gaenxguh baenzfouq.