Gouj diemj hai laz, byonghhwnz haihoih, cungj dwg doeg vwnzgen (vwnzgen doeg mbouj rox liux), caiq cienz gij vah baihgwnz, gangj daengz baij hong seiz gaeq gaenq haen baez daihsam lo. Ma daengz ranz ninz saek yaep, youh deng hwnqdaeuj muh haeux daem haeux, gizlawz lij ndaej- hoengq daeuj guenj daengz Yahlaux ne?!

Seizneix, faen reih bau guh, bienq ndei lo, hoeng Yahlaux youh lingh yousim, boux guhhong mbouj gaeuq. De mbouj hawj Daegsam sij saenq naeuz dwgrengz, mbouj ndaej beng galaeng Daegsam, de rox danghnaeuz bouxbing yaek goq daengz gyaranz couh goq mbouj ndaej guekgya, guekgya mbouj andingh, gyaranz hix bauj mbouj ndaej, cungj dwgrengz neix de souh gaeuq lo. De ndwn hwnjdaeuj, fwngz moebmoeb diuzhwet gyaengjgyat de, swnhfwngz cug diuz cagndaij ndeu youq gwnz hwet, byaij daengz gok ciengz, gaem fag lienz ndeu naep youq gwnz hwet, gwed faggvah, haebheuj ndaetndet, bae doengh lo. Yiengh baijdaeuz neix caen mizdi lumj bouxlaux Sez Daiginh hwnj ciengzciengq hoenx vunzdig! Rumzbaek bongjhuhu biengj aekbuh de, ci gaen’gyaeuj de, de byaij bae vaiqvit, yawj mbouj ok de gaenq dwg mehlaux 80 bi ndeu ne!

Daengz ndaw reih, Yahlaux muenghyawj seiqlengq, ndaw reih gak ranz, mizmbangj gvej nywj, miz- mbangj geng reih, mizmbangj dawz- cae, nyaengqnyatnyat. Yahlaux sawq- mwh okyienh youq ndaw reih, hawj gij vunz gyae’gyawj haenx doeksaet yat, mbouj iu cix doxdoengz dingz gij hong ndaw fwngz, dinghdingh coh gaiq reih neix muengh bae. Mbouj miz vunz byaij gvaqdaeuj, hix mbouj miz vunz cam saek coenz vah. Mbouj guhsing yawj yaep ndeu, vunzlai youh hainduj guh gij hong bonjfaenh.

Ngoenz daih’it, yienghyiengh cungj dinghdingh guh bae. Yahlaux cawzliux nyaenx mbouj ndaej mbouj dingz ae caixvaih, hix mbouj caeuq vunz gangjvah, de lau hawj vunzlai doeksaet. De baegfofo hix mbouj naengh roengzdaeuj yietnaiq, cij naenghyung youq dieggaeuq ae’ngab. Miz geij baez youq mbouj onj le, de gyad naengh roengz gwnznamh bae, de nyaenx mbouj ndaej muenghyawj seiqcawq, yawj miz mbouj miz vunz yawjraen yienghceij de baenzneix diuqgah. De mbouj ndaej hawj vunz hojlienz de, vihneix naengh youq gwnznamh de hix vad fagliemz ndaw fwngz de, bued gij nywj seiqhenz, hawj vunzlai laihnaeuz de dwg naengh guh hong. Ngoenzneix, vunzlai geij baez dingz hong cimyawj gaiq reih Yahlaux, mbouj miz vunz byaij gvaqdaeuj, hix mbouj miz vunz dongx saek coenz. Yahlaux daj banringz mbouj dingz dwk guh hong daengz banhaemh ranz laep, lumj vunz san mbinj nei, gvej gij nywj ndaw reih lumj sam buenz mbinj hung nei, de muenghmuengh daeng- ngoenz, youh yawjyawj gaiq reih gvej gvaq nywj neix, gig habhoz soeng gaemz heiq ndeu, yamqdin lumj ndaejhingz ityiengh menhnyetnyet baema.

Song dah lan lumj song duz saeceij nei faen youq song mbiengj dou naengh, dinghdingh caj yahlaux maranz. Yahlaux byaij hwnj gwnz mbaekrin, boux cup gaemz ndeu, raen baihnaj din songde cungj miz song dong byuk lwgmaenz iq, fajfwngz raeuzrwdrwd. De byaij daengz henz saeuq, biengj facauq yawj, cauq lwgmaenz dumq cug vet congh loq hung ndeu, rox gyoengq dahlan gwn imq le, sim hix onj lo, swhgeij hix vax gaem lwgmaenz ndeu, diemzswdswd gwn lo. Hwnzneix de ninz ndaej ndaek dangqmaz, ranz rongh le cij ndiu.

Lox song dah lan ndei le, Yahlaux youh bae guh reih, de gietsim ngoenzneix aeu guh song boix, beij ngoenzlwenz guh ndaej lai byotbyat di. Daengz ndaw reih, de couh ngaem- gyaeuj guhhong. Hix mbouj rox guh ndaej geijlai nanz, de siengj ndwn hwnjdaeuj ietiet diuz ndokhwet lumj yaek raek nei. Ngamq ndwn hwnj- daeuj, sawqmwh fatyienh gwnznamh miz song bouxvunz cingq ning’yetyet, gyoengqde gungq hwet, ngaem gyaeuj, buekrengz bang de gvej gij nywj ndaw reih de. Nywj mbouj sang, hoeng vad haenq lai, de yawj mbouj cingcuj dwg byawz, cij roxnyinh bakaek ndat- foegfoeg, lumjnaeuz deng gijmaz doxgaiq bungqdaemj, ndokhwet hix mbouj iet lo, gijmaz hix mbouj ngeix lo. De ganjgip naenghyung roengz- daeuj, doenghfwngz guhhong, gij yienghceij de, lumjnaeuz lau vunzlai ciengjaeu gij hong de bae nei. Ngoenzneix, nywj reih gvej ndaej benq hung ndeu, nyengh mbouj miz vunz cam vah. Ranz fuemx lo, Yahlaux got rop nywjsauj ndeu, goemq fajnaj mongmeng baema lo. Hwnzneix de ninz mbouj onj, moengzmoengz loengzloengz, cungj roxnyinh ranz gaenq rongh lo, seiqgeng seiz couh caeuxcaeux hwnqdaeuj, gwn geij aen lwgmaenz ndat, cupcup song dah lan, youq laj ndaundeiq ronghgywg bae doengh lo.

Yahlaux byaij daengz ndaw reih, ranz gaenq momj lo, ndaw reih de liuh mbouj daengz nauhyied dangqmaz, feizmbaw yubyub yabyab, vunzlai geujfoedfoed, hix mbouj rox daeuj geijlai boux, mizmbangj cingq coemh nywj, gyoengqvunz wnq lumj doxdax beijak gvej nywj, aencae geij gaiq gyaq gaenq dauq haeuj ndang duzvaiz bae dajcae lo. Yahlaux mbouj rox rengz daj gizlawz daeuj, gingqyienz hai din couh buet, ndaenj haeuj ndaw vunzlai bae, couh doenghfwngz guh- hong, baezneix dauq lumj dwg de cingq ciengjaeu gij hong bouxwnq. Mbouj rox dwg laux le fwngz saenq, roxnaeuz dwg ndawsim luenhlab mbouj haeujsim, ngamq guh mbouj geijlai nanz, fagliemz Yahlaux gyod ok, luet ok fwngz fid bae, mbouj naek mbouj mbaeu, moed deng gwnz mbaq bouxvunz baihnaj mbiengjgvaz liz song sam yamq gyae haenx, hwk dwk de ndangsaenz bae. Bouxvunz haenx fwngz iet dauqlaeng gip fagliemz, ndenq gvaqdaeuj, Yahlaux dinghdingh cimyawj, caen dwg ien’gya doxbungz youq gwnz giuzfaexdog, baihgvaz baihswix mbouj dwg roen, Dahfungh neix baenzlawz hix daeuj lo? Nanz- dauh dwg fangzbaed coi guh, fagliemz youh bienbien moeb youq gwnzndang de, dwg saetfwngz? Dwg bauqwngq? Fanjcingq mbouj dwg daegdaengq guh, bae boizlaex ba. Dahfungh youh mbouj dawz haeujsim saek di, riu- nyumnyum, ngauzngauz gyaeuj, naeuz: “Yahlaux, mwngz bouxlaux gaej guh dem lo.” Yahlaux ndawsim raeuj- rubrub, ngaemgyaeuj roengzbae baez vad liemz “caz” yiengj dwk, sojmiz gij saeh nyapnyuk couh lumj nywj ityiengh cawzbae lo.

Sojmiz gij vunz ndaw reih cungj haeujsim guhhong, bouxboux ngaem- gyaeuj, lumjnaeuz youq gaiq reih gaeuqgeq neix ngeixnaemj diuz daezmoeg gaeuqgeq ndeu, roxnaeuz dwg naeuz youq gaiq reih ngamq haiok neix ngeixnaemj diuz daezmoeg moq ngamq bungzdaengz haenx, hoeng gij yienghsiengq de, youh lumj dwg cingq yunghsim ra huqbauj gyoengqde gyaepgouz lai bi haenx.

Roegbuguz gwnz bya cingq heuhcumcum, heuh gijmaz ne? Dingq hwnjdaeuj dwg “guzbu, guzbu……” youh lumjnaeuz dwg heuh “najrongh, ginhsuz……” Vunzlai mbouj bae gyaepcaz, cij dwg gak boux youq ndawsim ngeixnaemj.

Itcig daengz doeksat faenzcieng mbouj mingz mbouj beg soubit, daezmoeg hix ganj mbouj gib ciuq yaem hoiz roxnaeuz ciuq eiqsei bae hoiz. Yahlaux coenz Vahcuengh neix, ndaw faenzcieng cix gangjmingz lo, “gaej vei”, coenz Vahcuengh neix, caen mizdi gangj mbouj doeng, de ndaej dwg cuswz mbouj miz gijmaz eiqsei, ciuq swzloih daeuj yawj, aeu gij eiqsei “coh”, hix lumjnaeuz ndaej gangjmingz gij cawjdaez bien faenz- cieng neix lo. Hoeng, de youh dwg coenz Vahcuengh ndeu, eiqsei dwg “gaej”. “Vei” baudaengz cingzgamj fukcab, cekgej okdaeuj dwg souhheiq、souhvei、yousim、gwnvei daengj. Aenvih Yahlaux bien faenzcieng neix sij haenx, simcingz fukcab dangqmaz, itseiz ra mbouj ok diuz daezmoeg hab’eiq ndeu, hix mbouj rox baenz- lawz nai bouxlaux doekseng youq bi 1900 neix, cijndei cengqgengz yungh coenz Vahcuengh neix guh daez, gou saenq gak cuz beixnuengx ndaej lijgaij.

（3 sat）